佢用3粒Bitcoin買起一間7仔: 第五章 開發你的新秩序 三之三

也然已經確定Alex係壞人，其實可以即時揭穿佢，但又唔知有咩乜可以揭穿，兩日之間前言不對後語，不足以知道佢背後有乜邪惡計劃，要拆解問題，都係靠住自己先。

「也然，呢隻好得意呀，黑到咁，玩個稜鏡折射啲光出嚟。呢隻黑膠睇個樣都好舊，以前冇Photoshop，唔知點整嘅呢。」顧得拆彈，以琳又嚟啦，也然今晚精神上，疲於奔命。

「係喎，咁得意嘅，哈哈。」也然好想識得魔法，令到時間永遠停喺呢一晚，永遠同以琳共處呢個小空間，唔需要有明天，不過你同我都知，梗係冇可能啦。時間只會一分一秒過去，唔快唔慢，好公平，無論富貴或貧窮，健康或病患，一日都係有24小時，人人均等。

也然望住以琳手上嘅黑膠唱片封套，自己好似左面條白光咁，穿過咗個棱鏡後，喺右邊折射出嚟，五顏六色，但自己冇得揀顏色。以琳無間斷講咗一大堆嘢，也然已經聽唔入耳，「係喎」、「咁得意嘅」、「哈哈」三個答案隨機答，炒車機會好低。

也然再認真望望黑膠唱片封套，光、入鏡、折射，光、入鏡、折射，光、入鏡、折射，自己一定係經過某個時間點，先至墮入呢個迷陣，但又好彩發生咗呢件神奇嘅事，自己呢一刻先未畀人追債，咁認該唔開心定係慶幸呢？





也然內心極度矛盾，自己隻幣聽日就上市，同時又預知會大跌，明知Alex有古怪，但又唔知有咩可以做。也然呆呆滑動手機，不斷游走三間加密貨幣交易所網站，全部都預告佢隻幣聽日上市，幣圈反應亦都好湧躍，好多人關注，究竟點先可以阻止聽日嘅災難呢？

「係喎，又話睇Netflix嘅？」也琳執嘢執到攰，行去部Flip 4望咗一眼，突然問返也然呢個問題，打破咗空氣嘅寧靜，「部電話好似仲有排Update，不如搵啲嘢睇丫」。

也然嘅注意力，重回以琳身邊，開始發掘返啲新話題，「你有冇諗過，港鐵聽日會出軌，然後全港大塞車？」

「無啦啦邊會諗啲咁嘅嘢喎。」

「如果我話你知，我有預知能力呢？」





「咁，咪早啲出門口咯。同埋，有預知能力嘅話，點解唔睇遠啲嘢嘢？例如你睇，到2023年Past Paper，我哋咪知DSE份試卷咯。」

「係喎，預知大塞車有乜用呢？」一言驚醒夢中也然，明知自己發隻幣必跌，自己沽埋一份咪得咯。自己沽埋一份，只係因為見勢色唔對，同大圍齊齊沽；割韮菜就係賣咗幣之後，攞咗錢唔理個project走咗去。喂，有得諗喎，幣價跌，唔代表個project冇前途可能仲多資金湧入嚟呢。

也然重拾自信，終於諗到新方向，唔使再驚聽。精靈嘅眼尾見到Flip 4個螢光幕閃一閃，已經重新開機中，淡淡然問以琳：「你係咪要返去餵貓啦？」

「吓？正話咪餵完貓先嚟你度咯。」

也然清清楚楚知咩事，都話餵貓係無敵閃人理由。





喔噢！喔噢！以琳手機一如所料，要嚟嘅message終於嚟，佢拎起手機時，面色一沉。

「你冇事呀嘛，係咪要走？」也然明知故問。

「係呀，貓貓話未飽，我要返去救佢，哈哈。」以琳雙眼冇離開個芒，講得好慢，一個個字講出嚟，「哈哈」直頭係生硬，佢急步邊走向梳花執齊嘢，「聽日無論發生咩事，你都要加油。」

也然今次好留意以琳一舉一動，佢個芒顯示，佢收到係一個好多字嘅短訊，但由於太遠，睇唔清楚啲字。同時可以肯定，發出呢個短訊嘅嘅人，一定有提及也然，所以每次以琳都有叫佢加油。

究竟邊個發短訊畀以琳呢？也然想問都冇機會問，而點解一個短訊可以令到以琳咁緊張要走呢？

也然呆呆坐喺梳化，打算睇下點樣沽空自己隻幣，一打開Macbook，個芒閃閃發光，慢慢又失去意識。