佢用3粒Bitcoin買起一間7仔: 第五章 開發你新的秩序 三之二

「因為我鍾意你，想你對我印象深刻啲。」終於講到出口啦，不過呢個只係原因之一，未計也然要銷毀CCTV錄影，同埋令也琳驚喜個幾秒，此刻無價。

「嘻⋯⋯哦⋯⋯嗯⋯⋯」清純嘅以琳，今晚上得嚟都預咗有此一着，只係真係來到嗰一刻，唔識畀反應，成個人淨係感受到心跳，同埋好似有種任何地方都冇得賣嘅麻藥，全身亂走，帶來每個人一生人只有一次嘅興奮感覺。「其實我都OK嘅。」

「OK嘅？」

「我都有啲。」

「吓？你有啲唔舒服？」也然咁都問得出，有啲鍾意你呀，唔係要人講出口呀？





「我話我都有啲鍾意你。」以琳又真係照直講，可是「有啲」兩個字真係可圈可點，正宗進可攻退可守，「有啲」只係有啲，唔會好多，可以好易由「有啲」演變到「冇」，轉頭一話返屋企餵貓又收你皮㗎啦。即使咁虛無，已令到一生人只有一次嘅興奮感覺，感染到也然個心。

300呎嘅環境，突然生咗棵櫻花樹，樹蔭有一隻蟬，跌落以琳身邊，驚慌到失足向前，然後撲入也然一雙肩，好溫馨呀可？

也然開心之餘，仍然好知自己做緊乜，一來萬一一覺醒來，又係重複以琳來訪，即係啱啱發生嘅所有嘢，一筆勾銷，二來今晚仲未完成第二個目標：預防一個人的幣災。

「係喎，反正你未走，我睇Unwire講，Android有個緊急Update，不如幫你搞咗先？都要啲時間㗎。」

「你又知我用Samsung機？」





「今晚之前，你根本唔知我有幾留意你。」也然好得戚咁講。

「嘻。」以琳乖乖掏出Flip 4，交畀也然更新系統，一切按一條睇唔到嘅軌迹，以唔出軌嘅風格、兜兜轉轉咁再演一次。廢咗以琳部電話一兩個小時，起碼冇咁快完呢一日。

「我估你之後都好多機會上嚟坐，不如幫我整理下啲碟丫。呢堆舊書舊唱片係親戚朋友搬屋時唔要嘅，我儲儲埋埋嚟做裝飾，今日有自己地方終於大派用場，按你意思幫我布置啦。」畀機會以琳用女主人嘅姿態，停留喺呢個表面浪漫實藏暗湧嘅空間。

也然諗到呢個方法，自己就偷時間拆除一個已知嘅計時炸彈，以琳埋頭係唱片堆尋寶之際，第一時間WhatsApp Alex，「如果隻幣推遲啲上，你有冇所謂？」 11:16

「吓？係咪發生咗咩問題？」Alex秒回。





「冇事，如果啫，你都好少聽啲幣會推遲上市。多謝你對我呢個學生咁有信心，掂咗之後開香檳慶祝啦。」也然講呢句時，點都有啲心虛。

「Take it easy啦，買得幣預咗大上大落。Touchwood講，除非你惡意割韮菜，否則有咩意外都唔關你事啦。我同其他朋友都睇好你隻幣嘅概念，所以先擺錢落你度。」

對唔住，令你失望同輸錢，也然由心底裡覺得唔好意思，然而內疚係冇用，佢好清楚知道，當前急務係解決問題，「不如我打畀你講」。

「好。」

Alex接聽電話速度，同覆message一樣咁快，「今晚緊張到瞓唔着呀？」

「唔係，平時都未瞓啦，只係有啲嘢想請教你。」

「我都係知啲唔知啲，知就答你啦。」

「有冇聽過啲加密貨幣交易所，會偷偷沽空發行商嘅幣嚟賺錢？」





「咦咦！」Alex第二個「咦」字特別高音、尾音特長，顯得相當之猶豫，「咁得意？交易所都係想你隻幣交投量多，賺買賣佣金啫，沽低你冇着數㗎喎，你邊度聽返嚟？」

本來已經墜入一個扭曲時空而不安嘅也然，更加忐忑，好撚可疑啊呢個可兒，Alex對也然唔係有隱瞞咁簡單，直頭有嘢呃佢，背後可能係一盤更大嘅棋，也然只係一隻無辜辜到連河都過唔到嘅小兵。

「都係連登啲post啦。」也然表現得好鎮定，「嗰度個個專家，乜都有人講，人咁講我咪fact check下咯，哈哈。」有行為學專家講過，以「哈哈」作為一句嘅結尾並唔係真心笑，有四成機會係諗緊其他嘢。

「未聽過喎，咁得意？啲人都係噏得就噏，放心啦，聽日一切順利喎。」又有行為學專家講過，用上「咁得意」作為對一件事嘅反應，有七成機會係要掩飾某啲嘢，寄望隱藏到自己唔知咁，或者唔想表達真正意見。