佢用3粒Bitcoin買起一間7仔: 第六章 我過得並不好但是我會活著 三之一

行入電梯，樓層按鈕由G樓去到二十八樓，㩒十樓返屋企。鋼纜同纜輪嘅磨擦產生刺耳嘅聲響，打開𨋢門，點解會係十一樓走廊？一定係部𨋢壞咗。㩒多次十樓，升降機徐徐下降，頭頂嘅照明系統閃閃下，似足阿飄出嚟嘅氣氛，𨋢門打開，係三十五樓！走廊燈光仲要陰陽怪氣，急急狂按閂門鈕，𨋢門高速合埋，顯示樓層嘅顯示燈亂閃，𨋢門再以更快嘅速度打開，眼前係一個滿布怪獸嘅森林。
 
係咪好恐怖？你哋有冇試過雷同嘅夢境？
 
也然依家經歷嘅，比呢個夢更加大鑊。佢聞到自己一身酒氣，仲有嘔吐物嘅味道，眼前一地空酒樽空酒罐，仲有花生殼同薯片碎，左腳隻鞋喺右邊，右腳隻鞋踢咗上KALLAX層架上面。
 
佢已經唔太相信記憶同感覺，幾經辛苦喺梳化底，摷返個熄咗嘅iPhone出嚟，着機，好彩仲有電，屏幕顯示2022年12月18日。也然跳過咗全港大塞車、幣上市，直接去咗12月18日。
 
已經諗唔到任何嘢去解釋呢個現象，好亂，也然個心好亂，之前做咩都冇用，呢一日要嚟始終都要嚟，係宿命。
 




一不做二不休，也然覺得電話要繼續熄，但熄之前點都望下有咩Message，來自Alex同其他投資者嘅未接來電同短訊，四捨五入後有成千個。也然搵來搵去，搵到來自以琳嘅短訊，「你有冇事呀？」「做乜全日唔搵我？」「咁大件事要幫手出聲喎。」「如果唔方便，今日就唔好去George度啦。」
 
兵荒馬亂之際，仲得到嚟自以琳嘅溫暖，係也然心靈上嘅一小滴安慰。前晚講解乜嘢係加密貨幣時，以琳完全搭唔到嘴，冇理由隔咗一日明白晒，好多大人、甚至係金融界嘅專才，對區塊鏈都係一知半解。同埋，究竟嗰晚同以琳示愛仲有冇效？呢個空間嘅以琳，仲有冇嗰一刻嘅記憶？
 
「我OK，想見你，同食燒雞翼。」酒醒之後特別餓，也然覆完以琳後狠狠熄咗電話，沖個涼先出去散下心。
 
也然企喺花灑下𢱕低頭回想，呢幾日發生咗乜事，搽沐浴露時，摸到自己每一個部位嘅感覺都好真實，連水柱打落嚟嘅力度，都乎合上帝創造嘅物理，但依家沖涼洗走嘅死皮老泥，係積咗幾耐呢？香港啲樓真係好奇怪，Studio Flat都不特止，個廁所仲要冇窗，呢啲黑廁，抽風特別慢，整個黑廁都充滿水蒸氣，抽極都未抽得走，也然視線矇查查。
 
即使也然抹乾身，企喺梳妝鏡面前，塊鏡仲係滿水點，乜都睇唔到。也然好想睇下自己有幾憔悴，佢伸出右手手掌，由左至右抹咗塊鏡一下，手掌經過嘅位置推開咗小水珠，即時清晰返晒。也然個樣好攰，鬼咩，係呢兩日入面來來回回，仲要唔發生乜事，冇發癲已經算佢EQ高。
 




幾矇嘅鏡，輕輕捽一捽就清返，睇唔清嘅迴路，只要知點解走咗入嚟，就會知點走返出去，也然咁樣諗，搵到個起點，就會知個終點喺邊，咪可以脫離困局咯。與此同時，最壞打算係過咗今日後，又要重複飲醉酒後再醒一次，或者又回帶返咗去某一日，冇嘢係控制到，過得一日得一日已經係長遠，也然心態係過得一個鐘得一個鐘。
 
也然換返套乾淨衫出門，一落街，就體會乜嘢係計畫永遠趕不上變化。
 
「Crypto騙子林也然」「香港馬多夫」太子道西貼滿也然嘅街招，唔同款式嘅街招，仲有埋佢平時貼係IG、有正面樣相，好彩啲相像素唔高，雖然印咗彩色，五官都睇得唔清楚，不過也然為安全起見，即時除咗副眼鏡，耷低頭急急離開。
 
點解會有人搵我尋仇、話我係騙子㗎，隻幣跌我都唔想㗎，韮菜又割唔到，跟人沽唔到，主要係計劃晒噚日點樣拆招，但噚日冇出現到，乜都做唔到。
 
300呎本來係也然覺得最安全嘅地方，但樓下已經貼滿街招，佢買咗嗰間便利店，已經升級為最安全第一位，如果去到現場無異樣。
 




噓，便利店現場，冇事發生。也然一踏入玻璃門，谷德昭比之前更熱情咁同佢笑住打招呼。
 
「老闆，幾驚你唔嚟呀，今日想攞啲咩走呀？我準備咗啲環保袋畀你用。」