佢用3粒Bitcoin買起一間7仔: 第四章 時代流轉這刻在這地是否選中我 三之二

呢個答案並無改變以琳，以琳主動拎咗啲碟喺茶几睇，準備分門別類放上層架，好似患有OCD嘅朋友，去到書局或者特價舖，想幫你執整齊啲貨咁。
 
以琳將啲碟分類，也然就放慢手腳，諗緊有乜方法留住以琳。
 
「iOS出咗個新Update喎，唔更新部手機會好危險，又係重大保安漏動嗰啲。」也然想出招令到以琳兩小時內用唔到電話，出此下策。
 
「唔驚喎，我用Samsung㗎。」
 
頂，二揀一都撞L錯！
 




「哦，Android OS都咁啱一齊Update呀，我睇unwire講㗎，要download個特別apk先可以更新，如果就咁更新或者唔更新呢，部機隨時被人惡意攻擊。」
 
「係咩，咁好危險喎。」以琳半信半疑，不自覺拎咗部Flip 4出嚟。
 
「反正未走，幫你Update咗先啦。」也然心諗冇個零鐘都未搞得掂啦，自己再搵多機部機狂Load嘢，拖慢個Wi-Fi，最好更新到沒完沒了。
 
以琳交咗Flip 4畀也然，也然入咗慢速嗰個Wifi，整古做怪扮搵apk，拖得就拖，然後幫佢揀開始更新，未來個幾鐘，唔會再有神秘短訊。
 
「其實好多新嘅歌我都未聽過。爹吔媽咪細個成日播佢哋鍾意嘅歌我聽，同依家啲歌相比，以前嗰啲真係好聽啲。」
 




也然張開口，但冇出聲，驚又講咗啲嘢中斷話題，加速以琳嘅離開。
 
「你話，如果由張敬軒或者周杰倫出道第一首歌開始聽，同我哋聽返佢嘅當佢嘅歌，感覺係唔係完全唔一樣呢？」
 
「你唔喺嗰個時代，一定唔同感覺㗎啦。等如我哋唔明點解啲籃球中坑咁鍾意Michael Jordan，足球大叔咁鍾意碧咸一樣。」也然唔敢太多發揮，唯有跟「劇本」行，但佢有霎時諗到有新招，「你對流行音樂都幾有認識喎，不如你講多啲我聽吖？」
 
有人問佢，佢就會講，依家人嚟啦，講得。
 
「爹吔話，佢聽上一代講，好多聽鍾意Beatles嘅人，都希望見證到Beatles走紅嘅年代。佢哋60年代橫掃全球，周圍表演，創造咗好多經典，喺文化層面影都照玩，大個總有一日知道Lego架潛水艇概念係自來幾十年前嘅四個英國人」。
 




「仲有呀，」女人講嘢，真係可以唔停，「幾年前有套戲叫《Yesterday》，又關Bealtes事，講全世界唔知點解未聽過Beatles，主角就表演Bealtes嘅歌，大家都以為係佢作嘅，令到佢全球走紅，重複Beatles當紅走嘅路」。
 
叮，係燈膽着燈嘅聲，喺也然腦海好響又亮咁叮咗一聲，「唔知點解」同埋「重複」，撥動到佢嘅神經，好貼切咁形容到依家嘅處境。
 
「係喎，不如用MacBook Pro睇Netflix啦，16吋夠大㗎啦。呢排啲劇好似冇乜好睇，不如睇下Netflix有冇呢套戲咯。」
 
以琳唔反對啦，都係爛尾日劇唔好。