佢用3粒Bitcoin買起一間7仔: 第四章 時代流轉這刻在這地是否選中我 三之三

 
不過Netflix不造美，冇《Yesterday》，此路不通。以琳注意力，又去返碟海，「呢隻好得意呀，黑到咁，玩個稜鏡折射啲光出嚟。呢隻黑膠睇個樣都好舊，以前冇Photoshop，唔知點整嘅呢。」
 
也然已經冇心機理佢，急急用手機Search關於《Yesterday》嘅嘢，直接google「電影 yesterday 結局」，得到一個冇用嘅答案。
 
//約翰藍儂出現了，且在電影裡與音樂產業毫不相干，此外還與妻子過著幸福快樂的日子直到晚年。而正是這樣的John Lennon點醒了傑克，真愛無敵，名利如浮雲。之後，毫無懸念的是happy ending的結局//
 
冇聽過Beatles都知John Lennon死咗好耐，呢套戲嘅結局，擺明係opening ending，冇解釋過點解同一個時空嘅人會忘記Beatles嘅存在。
       
慶幸係，以琳問完隻黑色唱片後，佢電話未響。




 
喔噢！
 
頂呢頭講完，點解以琳部機仲識響嘅？
 
虛驚，原來係也然自己有SMS。但呢個訊息好奇怪，唔係網上賭場或者KK園呃人嘅搵工廣告，只有「Enuogh」一個字，仲要串錯字，多數係唔知邊個send錯，唔使理。
 
「所以上一輩成日覺得下一代唔叻咯，佢哋用低幾代嘅技術，做到20年後甚至更耐其他人先做到嘅嘢。」也然隨口講呢個百搭嘅答案。
 
「真係好靚，個封面咁黑，射啲彩虹出嚟，好好睇。」以琳仲沉醉喺個封面度，也然不斷問以琳好多音樂上嘅嘢，一問一答，好愉快，唔經唔覺已經過咗12點。




 
喔噢！喔噢！
 
Flip 4啱啱升完級，又識響啦。
 
以琳行去拎返部電話，收返原本要收嘅message，露出盡量抑制嘅驚訝表情，上次明明唔係驚訝㗎，點但解反應唔同咗嘅。
 
也然見以琳嘴角開始有動作之際，衝口問：「你隻貓食乾糧定濕糧㗎？」
 
「食，乜都食啦，係呀，佢又肚餓，要走啦。」擸齊嘢，邊講邊衝去門口。




 
BOOM！快速嘅閂門聲，令呢300呎嘅小空間慢慢回復平靜。
 
精神呀，也然得到一段自己可以100%控制時間。
 
噚晚以琳走咗自之後，也然坐多陣都返咗自己屋企，一覺醒來就係港鐵大塞車。萬一聽日一起身又遇到港鐵停止服務，有冇時間阻止自己隻幣暴跌，甚至阻止佢上市呢？
 
也然從來都係一個積極嘅人，佢忽然覺得，今次係宇宙畀佢重新嚟過嘅機會，只要喺聽日天光之前，修正到做得唔好嘅嘢，佢發隻幣就唔係壯烈犧牲。重新計算嘅同時，老土啲都要上網搵下啲時空扭曲、時空重複嘅理論，但講經嘅居多。其實好簡單，只要通知三個虛幣交易所，推遲上市，拖住先咪冇事咯，頂得一日得一日。
 
「你返到去未呀？」 12:48
 
也然覺得禮貌上，都要whatsapp問下以琳返到屋企未，即使自己已經身處一個唔知點解釋嘅空間入面，風度都要存在。佢冇等對方覆，繼續上網睇唔同資料，搵下搵下，也然慢慢失去意識。
 
叮噹！
 




也然張開雙眼，又坐咗喺小天地張梳化度，枱頭嘅MacBook Pro同電話原封不動。
 
DKLMCF，今次真係《Groundhog Day》，同一日不斷重覆，也然變咗Bill Murray。