佢用3粒Bitcoin買起一間7仔: 第四章 時代流轉這刻在這地是否選中我 三之一

18歲少女散發出嚟嘅化學物香氣，就係面前。
 
有冇試過發夢聞到氣味？嗅覺唔似視覺同聽覺要喺大腦進行複雜嘅轉換過程，所以發夢好少聞到味道。
 
打自己一巴，或摵下自己大髀都多餘，唔使試，也然斷定，「我唔係發緊夢」，搞幣輸錢啫，唔係輸咗自己嘅sense。要幾有自信，先可以咁冷靜，重覆之前發生嘅事喎，背脊一滴汗都冇流。
 
也然亦唔相信自己有精神病、幻覺或者撞邪，所有視覺觸覺聽覺嗅聞，都同18年嚟嘅經驗一樣，好真，好真，只係好似喺片場咁！確認多一次，佢吞啖口水試下，「咕嚕」，101%真係實世界。
 
《Groundhog Day》係單日重覆，《Boss Level》係打機式不斷restart，《Déjà vu》係既視感、似曾相識，《Source Code》又係無限輪迴，《12 Monkeys》係失敗嘅定點時空穿梭，以上電影，講經啦，也然係回帶多過一日，隔咗成個Chapter呀。
 




以琳一如噚晚咁四圍望，好似小朋友入咗奇趣天地咁奇趣，佢又留意到KALLAX層架上面個比特幣鐘，「咦，呢個乜嚟㗎？」，佢講嘅嘢，一模一樣。
 
「我唔係講過你聽咩？」也然要知道究竟發生過甚麼事，一定要試探下以琳知唔知咩事。
 
「呢個鐘幾得意喎，睇乜㗎？」以琳頭擰擰，好靚，眼神好真心，唔似玩嘢。
 
「你唔記得我講過你知咩？」也然試問多次。
 
「我第一次嚟咋喎，之前又未見過類似嘅嘢，唔知呀，係咪啲facebook或者Instagram like數？」以琳真係唔知，也然判斷係自己返咗噚晚，眼前嘅以琳，係噚晚啲以琳，自己就係未來返嚟、搞隻幣失敗咗嘅也然。
 




至於點樣去返順序嘅時空，鬼知。
 
最迫切嘅問題係，噚晚好似因為《今際之國的闖關者》山下智久，同埋兩個神秘短信令到以琳急急腳走人，只要唔提呢套爛尾嘅日劇，同埋唔好畀佢睇Message，就應該有更長時間同佢獨處一室。
 
更重要嘅係，呢晚過得越長，即係逃避投資者追擊嘅時間更耐。
 
「係喎，又話睇Netflix嘅？你電視都未有，唔係用Notebook睇啩？」以琳呢句話，又係一模一樣。
 
也然記得以琳對比特幣鐘零興趣，即刻轉話題，「其實我呢度有好多舊CD同黑膠，有冇興趣睇下呢？」手指向紙箱堆，大量舊唱片。
 




以琳徐徐向紙箱堆，「嘩，你好多CD呀」，睇得好雀躍，同第一晚見嘅佢一樣，梗係啦，依家咪係噚晚咯。也然雙眼瘋狂喺掃瞄立立亂嘅碟海，高速搵到陳綺貞隻《華麗的旅行》，一手擸出嚟話：「原來《旅行的意義》係呢隻碟㗎？」望向以琳，睇下佢有乜反應。
 
「係呀！係呀！係呀！」以琳條馬尾發來發去，一樣嘅香氣，冇濃到冇淡到，所有嘢按噚晚喺時間刻畫嘅軌跡，以雷同嘅方式運行多一次。
 
「係呀，首歌都幾出名。」也然用返一樣嘅答案，再加以發揮，試下會有咩唔同，「陳綺貞其實我都有啲研究㗎，早幾年嘛，佢被人踢爆戀上人夫，文青女神形象全毀丫嘛，但啲阿叔輩個個都話我夠係人夫，點解唔戀我，明顯音樂地位超然到冇畀件事影響啦」。
 
也然臨急急忙，只係講到呢個咁唔關音樂事嘅答案。