佢用3粒Bitcoin買起一間7仔: 第三章 無雙是笑話、華爾街狼人笑死 三之三

 
也然真係好似自己間舖咁（佢真係預早畀咗錢），狂擸酒精類飲品，啤酒、新世界紅白酒、韓國白酒、鬼佬Cocktail，一次過飲晒包醉，仲有一堆零食，塞爆晒兩個白膠袋，氣沖沖衝返上樓。
 
如果有其他人喺便利店，以為佢光天化日打劫不特止，一定會拍片放上網，推到畀各大context farm當大柒事咁笑。
 
回到300呎嘅小天地，冇電子產品嘅世界，先至係真正嘅寧靜。也然出力揈甩兩隻鞋，東一隻西一隻，成個人撻落自己㨂嘅梳化，冇電就接觸唔到區塊鏈世界，做返未踏足幣圈嘅也然，佢催眠自己可以，但呢個世界邊有得咁易返轉頭。
 
也然坐喺梳化，乜酒都開嚟飲，每樣一兩啖，佢覺得好鬼難飲，但越唔好味就越大啖，咁溝酒法，一定會醉。覺得餓就剝幾粒花生食，啲殼亂咁掉落地，難剝嗰啲就連殼食，發覺根本咬唔落就四圍吐，好爽。
 
一下子冇得睇手機其實又好悶，佢開始搬箱舊唱片去梳化旁，成個人行都唔穩，爭得跌落地，好在又平衡到，坐返梳化，想拎一兩隻出嚟聽。半醉嘅也然突然諗到重點，有唱片冇Player係咁冇用㗎，有錢點解成間七仔都識買，唔買定個嘅唱盤呢？哈哈哈，原來自己咁蠢。




 
最怕空氣突然安靜，唔知以琳依家點呢？
 
也然摷返以琳噚日拎過出嚟隻黑色封套黑膠唱片，用同一個手勢拎，用一個角度睇，嘗試感受以琳雙手。也然定住同一個動作好耐，嗯，嗯，嗯，係感受唔到嘅，連殘留嘅洗頭水味道，都畀市區嘅空氣溝淡到唔存在，淨係聞到自己噴出嚟嘅酒氣。
 
唱片封套圖案折射出嚟嘅光，有幾多隻顏色呢？一、二、三、四、五、六，再嚟，一、二、三、四、五、六、七、八、九，迷迷糊糊，也然醉到瞓咗。
 
也然發咗好多個夢，包括童年生日會、第一次買Crypto、見到自己喺老人院坐輪椅、以琳結婚新郎係Francis，五花八門，有啲係回憶，有啲係冇發生過嘅片段，但一覺醒來，已經唔記得發過咩夢。
 
也然張開雙眼，300呎依然係300呎，瞓咗咁耐，點都要鼓起勇氣拎手機睇幣價，手機唔知點解着住，明明熄咗機㗎喎。




 
吓？隻幣聽日先上？係咪有咩出錯？
 
也然定一定神，望望呢300呎，黑色封面黑膠仲喺箱入面，枱面啲酒樽鋁罐唔見晒，地下啲花生殼唔見埋，對鞋仲着住。
 
點解有人執過晒啲嘢？也然出力醒一醒，碌大眼再望手機，2022年12月16日，晚上11點15分。
 
叮噹！叮噹！
 
也然用手機app睇下邊個㩒門鐘，係以琳，仲係洗完頭嘅以琳，隔住個Mon都聞到佢洗頭水嘅香味。




 
也然完全唔敢相信，拖住冇酒氣嘅身體去開門。
 
「嘩，呢度就係你嘅地方。」以琳眼前係一個夢𥧌以求、但有少少亂嘅小天地⋯⋯