佢用3粒Bitcoin買起一間7仔: 第三章 無雙是笑話、華爾街狼人笑死 三之二

如果你唔明上三段講乜，唔緊要，Skip咗佢。總之也然做到好多大人做唔到，或者大人唔知係乜嘢嘅嘢，而也然過程中搵到好多錢，可惜呢個準備再上一層樓嘅18歲學生，仲係被困太子道東，個心已經去咗區塊鏈世界，飄來刺鼻嘅銀紙腥味。
 
區塊鏈係一條肉眼睇唔到嘅高速公路，載住好多人嘅夢想，包括科技夢，同黃金夢。
 
幾經辛苦，終到落車，也然箭步衝入大堂，但唔知係咪有人搬屋，部𨋢郁都唔郁。六樓啫，以前啲人住唐七唐九都係咁返屋企啦，也然一條氣跑上去，指紋解鎖、入密碼，喺餐枱打開Macbook，放低手機，喘氣。
 
12點04分，手機13個missed call，25個短訊。
 
跑樓梯時，集中力只會落喺呼吸同對腳度，也然感受唔到手機震，一個二個搭車嗰時又唔搵佢，係要唔得閒嗰時先搵人。
 




Macbook Pro開機真係暢順啲，也然未回氣就開到，當睇到三間交易所報價，由喘氣變成停止呼吸。
 
三間交易所嘅報價，都比隻幣嘅發行價低一半。簡單啲講，係前期投資100萬畀也然呢隻幣，帳面呢刻得返50萬，仲要未沽貨，沽完可能更低。
 
鈴！鈴！~鈴！鈴！鈴！
 
「喂，點搞㗎？跌咁多嘅？」呢個係Alex，也然上網識嘅。Alex係做股票經紀出身，早年前搵落錢，呢兩三年先開始接觸加密貨幣，參與唔少前期融資，每次涉及嘅銀碼唔大，預咗有贏有輸，十隻都有五隻做咗韮菜，但冇諗過好似也然呢次輸得咁核突。
 
「我⋯⋯我都唔知咩事。」也然有番呼吸。
 




「投錢落你度係因為你有能力一次過上三間交易所，好多人都做唔到；你肯聽我電話又唔似割韮菜走佬，究竟發生乜嘢事？」Alex冇嬲呢個𡃁仔，況且已打定輸數，錢啫，打嚟唔係追究，只係想搵返失敗嘅原因。
 
也然答都唔識答，兩個人靜咗幾秒。
 
「你同啲交易所傾嗰時，佢有冇叫你擺某個比例嘅幣喺度，畀佢做個流通量？」
 
「有呀，呢個係畀我上市嘅條件。」也然照事實答。
 
「DLLM有冇常識㗎，你擺幣喺交易所度，咪有貨借畀人沽空咯，你擺1粒佢夠膽借夠3粒畀客。唔怪得你傾到三間同步上啦，依家係有三間交易所聯手一齊踩低你個幣價，冇啦。」
 




也然腦海並唔係一片空白，而係諗緊點同唔同投資者交代，自己成副身家都唔夠賠畀人。
 
「呢舖唔得咪下次咯，好多人唔係一次就成功嘅。」Alex並無畀輸錢沖昏頭腦，仲安慰返啲個初遇滑鐵盧嘅小朋友。「過到呢關先，再算咯，咪當自己係割人韮菜啲仆街咯。你睇下點收科啦。」隨即收線，Alex就係知也然冇心割韮菜，只係輸經驗。
 
也然終於明白，上網學嘅嘢未必係真，你冇真實run過一次，都唔好亂話畀人知自己做到。
 
短訊量已經升到78個，其中一個來自以琳。
 
//飽//
 
真cool，問一句，答一個字，女仔諗乜真係捉摸唔到，也然呢刻更加無心情去揣測。
 
再望望幣價，跌六成，也然索性熄機，手機電腦通通熄。佢想靜靜。
 
呢次係一個人的幣災。




 
人無論幾絕望都應該有曙光，至於曙光喺邊嚟，可能係心底一個信念，可能早早積穀防饑。係喎，也然買咗間便利店㗎嘛，落去開餐咪得咯。
 
噚日為啖氣掃咗間7仔，救到今日嘅也然，起碼兩餐唔使愁。如果冇人刮佢，食幾個月都得。
 
落到7仔，冇乜客人，谷德昭喺度，仲向也然低調點頭，做埋個「歡迎老細」嘅口型。
 
「畀個膠袋我。」也然行去收銀搵谷德昭。
 
「唔得呀，政府要收交袋稅，有人放蛇罰好多錢㗎。」唔係點也然，聽講如果拉到，真係會罰錢，個個賣嘢嘅依家都咁講。
 
錢，又係錢，也然聽到錢呢個字就着火，即時打開銀包，拎張一百蚊出嚟，大力掉落枱面，自己擸咗兩個大膠袋。