佢用3粒Bitcoin買起一間7仔: 第三章 無雙是笑話、華爾街狼人笑死 三之一

「DKLM，我要返工呀！」
 
「搞L錯呀又壞。」
 
也然行到九龍灣港鐵站，人山人海，問候伯母聲音四起。呢個站閒時走過大量趕時間嘅人，今日就充斥住趕唔到時間兼好暴躁嘅人，雖然係星期六，但好多服務行業、銷售行業其實都要返工，放假出街嘅人亦唔少。
 
「今日列車服務已經中止。」大堂廣播，不斷播出，「今日列車服務已經中止。」吓？第三世界呀？日光日白中斷服務，前所未有。呢個鐵路網每日載客量數以百萬計，中止服務等同宣布今日半個城市停頓。
 
以琳急急離開小天地嘅翌日，早上10點15分，也然嘅世界唔同咗，只係佢自己未知，而且好戲在後頭。
 




九龍灣港鐵站大堂兵荒馬亂，職員畀啲大媽級嘅C9鬧爆，「我要搭車呀，點解會停㗎」，如果鬧幾句可以令港鐵暢通無阻，佢應該做咗局長，唔使喺度同其他人逼車。
 
//一架將軍澳線列車連接車卡與車卡間的接駁位出現鬆脫，乘客需要經鐵軌疏散離開肇事列車。//
 
也然睇手機新聞先知咁大件事，急都無用。只係想搭地鐵返太子附近嘅小天地啫，八個站都要咁？時間唔等人，也然即刻衝去德福廣場個的士站，希望快啲返到小天地，做今日要做嘅大事。
 
香港唔少商場舖頭都開11點左右，但疫情影響之下，彈性更加大。也然穿過德福一期嘅G/F集中係電器舖、化妝品，好多舖頭都未開，細個好恨屋企人帶自己去商場買嘢，遊戲機呀，新款電腦呀，但依家好多嘢已經自己夠錢買，縱使只係一個仲未考DSE嘅中學生。
 
今日嘅也然，唔止唔恨，而係超越唔恨嘅級數，由於覺得自己好富有，對物質嘅渴求度反而冇咁多，求精唔求量。
 




乜嘢Mac、Samsung、Dyson、SONY，相機吸塵機手機電視，鍾意咪買咯，唔啱心水咪換咯，no big deal，money is king，重點係，佢有錢。商場已經唔係一個購物中心，只係一個暫存也然鍾意物件嘅地方。
 
的士站留一下條絕望嘅人龍，好多等返工嘅OL西裝友排隊，的士司機受歡迎程度由平日嘅負數變成今日嘅100。也然作為今日嘅也然，見勢色唔對，即時開Uber叫車，九龍塘去太子$450，冇問題，照叫，白色Tesla Model S，3分鐘到，firm。
 
Model S準時到達，司機似中年嘅鄭中基，佬Look加留鬚，一望佢對眼，就知會呃水吹，而且能力好強。
 
也然坐上車第一件事，係text以琳，但，講乜好呢。
 
//你隻貓食得飽嗎？今晚上我度再執嘢？//
 




咁都畀佢諗得出，都話也然唔簡單，乜都迎刄而解。
 
「唉！今日單接單，尿都未屙過。」鄭中基發功啦。「個港鐵又係嘅，出軌都夠膽死嘅，我呢啲為市民服務，但依家個個都要服務，哥仔都好彩啦，我啱啱附近落客咋。一落客部機又響啦喎，你話幾啱。」
 
鄭中基以上嘅廢話，係基於覺得一個後生，畀咁貴價錢都照坐Uber，一定唔簡單，所以呃下水吹，但喺呢區上車，又唔似富二代，乜料呢？
 
Model S塞喺太子道東，來回線龜速行車，觀塘方向死路一條，連埋旺角方向死路兩條。也然呆呆望住手機，以琳仲未讀訊息，乜事呢？
 
「你話個啟德呀，挖爛晒附近啲路，港鐵又壞，路就得一條，車又多咗咁多，有乜辦法唔塞喎，你話係唔係？」
 
也然根本唔想應酬個司機，繼續望住手機，不時望住窗外停頓嘅風景。同時不停Refresh幾個加密貨幣交易所App。
 
11點46分，得返14分鐘，你老味呀，也然個心急到爆。
 
雖然也然只係一個中六學生，但舊年食正狗狗幣升大浪，年頭衝入咗去，5月高位捨得走。呢啲低位夠膽買，急升捨得走，往往係發達基本條件。資訊發達，也然上網領悟到一套非主流嘅Crypto理論，加密貨幣乜賽道乜tokenomics都係吹水，最基礎原來係供求，只要升就有人講，多人講就有人買，有人買就有天然momentum，雖然唔會做到Elon Musk同狗狗幣咁大規模，做到一萬分一嘅比例已經可以富甲一方。




 
《無雙》周潤發幾經辛苦搵郭富城畫假銀紙，偷原料，仲要鬼祟散貨，大費周章；《華爾街狼人》Leonardo新股圍飛，踢高散貨畀監管機構拉。呢個故事同幣圈中人講，尤其是Crypto世界發咗達嘅人講，佢哋會覺得周潤發同Leonardo同新石器時代拎個粗糙斧頭同長毛象搏鬥，一樣咁原始，兼且硬膠，搞咁多嘢，風險好高。Crypto成本低，效益高，各地法例追唔上區塊鏈發展，無政府管制，係一個雲端上嘅搵錢天堂。
 
也然叻到自己寫埋Smart Contract，上埋公鏈，亦都搵到一啲前期投資者，集咗幾百萬，仲同時傾到三間交易所畀佢上市，今日就係隻幣嘅大日子，正式面向公眾。