佢用3粒Bitcoin買起一間7仔: 第二章Netflix but not chill 三之三

「咦，呢個乜嚟㗎。」以琳好似入咗只得300呎嘅大觀園咁，周圍打量，佢目光停留咗喺層架一個好奇怪嘅「跳字鐘」，上面寫住16888，有時跳到16897，有時變咗16850。
 
「呢個鐘幾得意喎，睇乜㗎？」
 
「吓！你未見過咩？」
 
「未呀。」
 
「唔係掛，比特幣鐘喎，即時顯示Bitcoin價錢㗎，單位係美元。」
 




「哦。」以琳其實唔明，只係用最優雅而又唔敷衍嘅方法，應咗佢就算。「係喎，又話睇Netflix嘅？你電視都未有，唔係用Notebook睇啩？」
 
以琳唔係要答案，亦唔真係想睇Netflix，一個男仔叫一個女人去佢度，有正常智力都估到係咩事，佢只係想扯開話題。以琳冇理也然咩反應，講嘅過程直情零眼神接觸，佢注意力轉移到一個又一個紙箱上面。
 
「嘩，你好多CD呀。」新一代聽歌只需要聽串流音樂，聽一首歌要入一隻碟嘅情景可能已想像唔到。逝去咗嘅嘢，就等同新奇，尤其是CD封面實實在在，內頁仲有歌詞。
 
文明社會嘅人類鍾意儲意實體物件，斷捨離只係其中一種品味，但我哋嘅未來，趨向越來越唔重視實體，最重要嘅嘢，偏偏放喺摸唔到嘅雲端。
 
也然見到以琳睇得咁雀躍，慶幸好多親戚朋友畀咗啲舊物嚟，其實也然都幾鍾意唔同年代音樂，只係從來未得閒去深究背後嘅故仔，佢打算將大堆唱片執整齊，當裝飾，幾有風格。
 




「原來《旅行的意義》係呢隻碟㗎？」以琳拎起咗陳綺貞隻《華麗的冒險》嚟睇，個頭又擰向也然，馬尾又發來發去，令到呢間充滿雜物嘅小空間飄起一陣香氣，也然覺得係以琳少女嘅香氣，但其實只係以琳洗完頭洗頭水殘留嘅氣味，佢正話應該返屋企洗完頭再出嚟。
 
「係呀，首歌都幾出名。」也然畀呢浸化學氣味，聞到唔識畀反應咁滯，其實今晚約以琳上嚟，主要係想星期五晚多個人幫手執嘢，點知變咗開放新竇畀人參觀，拖慢晒進度。
 
兩個人分批搬咗啲碟去茶几睇，準備分門別類放上層架。
 
中文一堆，外語一堆；覺得年代舊啲一堆，認為係新啲嘅又一堆。但其實佢哋分唔到，大部份係舊嘅，呢十幾年，你有幾可聽到人買碟？除咗玩黑膠之外，但已經唔係學生嘅趣味。
 
「其實好多新嘅歌我都未聽過。」以琳沉浸喺碟海入面，突然拋出呢句。「爹吔媽咪細個成日播佢哋鍾意嘅歌我聽，同依家啲歌相比，以前嗰啲真係好聽啲。」
 




大家誤會咗啦，一男一女獨處一室，未必係嗰味嘢。靜靜地，有個空間，先係突破心理圍牆，講到啲平時唔會提及嘅話題。
 
「你話，如果由張敬軒或者周杰倫出道第一首歌開始聽，同我哋聽返佢嘅當佢嘅歌，感覺係唔係完全唔一樣呢？」
 
也然完全估唔到變咗藝文分享時間，話題忽然大南街，係爭杯啡啫。「你唔喺嗰個時代，一定唔同感覺㗎啦。等如我哋唔明點解啲籃球中坑咁鍾意Michael Jordan，足球大叔咁鍾意碧咸一樣。」講完之後，也然望住個比特幣鐘，雙眼放光，覺得呢個時代，就係Crypto，係我嘅時代。
 
「係喎，不如用MacBook Pro睇Netflix啦，16吋夠大㗎，《今際之國的闖關者》第二季上咗架啦。」也然見九成九執唔成嘢，咁就無忘初衷，睇Netflix算。
 
「Sorry，呢套我睇咗啦。」以琳完美終結話題，「山下智久又係奇怪，套劇搵個大叔全祼，睇都唔睇佢啦。」又係一句打沉也然。
 
以琳繼續喺碟海浮沉，好似小朋友入咗玩具舖咁，佢仲開始搬開啲紙皮箱，踎喺地下，越摷越積極。也然唯有一齊搜索堆唱片，穿梭呢個音樂時光之旅。
 
「呢隻好得意呀，黑到咁，玩個稜鏡折射啲光出嚟。呢隻黑膠睇個樣都好舊，以前冇Photoshop，唔知點整嘅呢。」以琳近距離睇緊隻黑膠封套，原來唔用Mon嘅睇圖，放到31厘米乘31厘米咁大，好好睇，實在好多。
 
喔噢！




 
以琳單手喺褲袋掏出佢部Flip 4摺機，望一望短訊，露出可笑嘅眼神，刪除短訊，繼續雙手伸入碟海。
 
係咪有其他男仔搵佢呢？也然第一時間諗到呢個問題。原來對一個異性有好感，對方發生小小事都會牽動到自己嘅情緒，一定會分心，所以啲大人成日話，讀書唔好拍拖，做大事又唔好拍拖，當然，佢哋有佢就講，唔會有人理呢啲廢話。
 
喔噢！
 
以琳手機再有短訊，佢望到新一個短訊，臉色一沉，徐徐抬頭望向也然。
 
「我⋯我⋯我隻貓又肚餓，要走啦。」以琳露出慌張神情，唔似係知道貓貓食唔飽嘅正常反應，但目光仍然冇離開也然，急步走向梳化，「聽日無論發生咩事，你都要加油。」
 
「油」個尾音au未講完，以琳已經擸齊Airpods盒同手袋，衝去門口。「bye bye」喺也然眼中嘅以琳係由後尾枕發音，點解要趕到咁？我係咪做錯咩事？定係山下智久得罪咗佢？