佢用3粒Bitcoin買起一間7仔: 第二章 Netflix but not chill 三之二
「好，咁一陣我畀個地址你，其實都係附近。」也然呢刻先認真望望以琳，換咗便服嘅佢，長短適中嘅馬尾，仲靚，靚過着校服個Look。只有再冇機會再着校服嘅大人，先會為校服look着迷，你再試下日日着呀，包你着一次鬧一次。
「咁我返去執執嘢先，一陣你去到樓下，我接你丫。」新屋入伙，以琳即刻上嚟，也然都驚亂到嚇親人。
「一陣見。我趕返去餵貓先。」以琳拎返個AirPods落袋，再珍而重之咁，塞晒成抽印花入去，同也然講聲Bye Bye就閃先。
谷德昭已經喺佢兩個唔知嘅情況下，開返玻璃門個鎖，趁以琳離開咗之後，行返入後欄，笠返件制服再開工。下意識拍下領口袋入面部電話，睇唔見摸唔到嘅三粒比特幣，袋袋平安。
「哥仔，你以後有咩需求，隨時搵我啦，你買咗好多貨未拎㗎。」谷德昭笑笑口，已經當正也然係佢老細，40萬貨慢慢扣數，攞幾年都應該未清晒。
「得啦，之後會嚟搵你。」也然個心已經飛走咗，頭都唔回趕返去執執啲嘢。以琳餵貓唔知係咪真，但也然返去就係真嘅，佢要安排啲一男一女獨處一室最重要嘅嘢。
也然匆匆返到搬咗入去只得兩日嘅小天地，好多嘢未執好。呢啲新式大廈，出名地方唔實用，但由於算係旺區，細細一間Studio Flat已經要14,000蚊租一個月，一般學生，頂多都係幾人夾份月租幾千蚊嘅工廈單位，也然雖然冇家底，亦未出嚟打工搵錢，但佢自有生財方法。
睇中呢個300呎小單位，係因為也然鍾意新樓乾乾淨淨，而發展商自己有網絡公司，個寬頻閃電咁快，保安級數又好，不過呢度只係佢嘅工作間，並非過夜用，除咗今晚。
也然屋企人都唔知佢花咁多錢喺出面租單位，知嘅只有也然同個經紀，以琳將會係第三個。
小天地好多雜物，最企理只有正話呆坐嘅梳化位，同埋茶几上嘅Macbook Pro，其他好多都係之前擺係倉、也然親戚朋友唔要嘅嘢，同埋自己嘅舊物，例如書、CD、MD、DVD、黑膠唱片等等，點解冇舊玩具？值錢丫嘛，唔會有人送畀也然。
張敬軒《酷愛》、衛蘭《WISH》、古巨基《大雄》、陳柏宇《Lost And Found》，一隻又一隻童年回憶，甚至係未出世已經面世嘅歌。喺CD堆入面，也然搵到一個發黃嘅小膠盒，入面有另一樣時代遺物：一堆五顏六色嘅USB手指。輕輕力打開個膠盒蓋，一陣陳舊嘅氣味直撲入鼻，最吸引也然眼球嘅，係一隻擺明係老翻嘅海綿寶寶USB。
兩個人坐喺度傾偈，個位好坐係最重要，所以也然好着重張梳化，張梳化仲係自己揀嘅，唔使理屋企人感受，係自己話事嘅舒適之座位。
執嘢唔係一日可以完成，也然稍事安排到啲紙皮箱有返個整齊感覺後，就宣告放棄。然後拎隻老翻海綿寶寶USB，插入電腦度睇下讀唔讀到。
一堆凌亂程度唔比啲舊物差嘅電腦檔案，大部份係影音檔，其中一個係寫住「2010-BDAY」，應該係也然5歲生日嘅短片，順手click開嚟睇。
包括也然在內幾個小朋友開生日會，彩色波波、Happy Birthday橫額、小朋友一人一頂生日帽，仲有成枱果汁、菠蘿腸仔、三文治、啫喱糖，色彩繽紛，令人懷念嘅童年氣氛。
條片並冇收到現場聲音，配咗一隻用玩具樂奏出嚟嘅音樂，「定釘~乒~乒~啦啦釘~釘~嘟~啦~嘟~」，熟悉嘅旋律，配落散亂嘅鏡頭，也然除咗見到細個嘅自己，根本睇唔到仲有邊個出席。「定釘~乒~乒~啦啦釘~釘~嘟~啦~嘟~」，揸機嗰個應該唔係幾識拍嘢，也然要睇下影唔到其他朋友仔，或者當年嗲地媽咪係唔係度，一概得唔到答案，影得太亂。
喔噢！
「我嚟緊啦，麻煩你畀個地址我。」 10:45
也然睇得太入神，唔記得原來等緊以琳，即刻畀地址佢，再臨急臨忙拎個Dyson無線吸塵機清潔地板，令地方整潔啲。
以琳依照也然畀嘅地址去到樓下，「嘩」，由於只得街名同門牌號碼，以琳一心以為係舊樓，點知係一個仲未入晒伙嘅新樓，仲要係好多人話嘅假豪宅，究竟發生乜事？點解也然咁有貨嘅？也然個小天地位處唔係豪宅嘅地段，起到扮晒高尚物業，唔夠二十層樓，再自稱低密度，然後以豪宅價出售，但隔離仍然係等拆嘅舊樓。
也然為咗畀以琳自己探索佢個小天地有幾型仔，並冇落去接佢，由得佢摸上去。
呢啲新樓都好麻煩，由於伙數唔多，保安認得晒出入嘅人，問咗以琳一輪搵幾多樓乜水，登記完先帶佢入𨋢。以琳入到𨋢，舉起右手準備㩒𨋢，但保安已光速攝入嚟，拍一拍IC卡，再幫佢㩒𨋢。
派頭使唔使咁勁。
以琳出𨋢之後，按地址走向C單位，大門係一道全黑嘅木門，裝咗古怪嘅電子鎖，並無防盜門眼，行到相距五步先以按到門鐘，C單位嘅門口已經打開，開門嘅就係也然。
「你門口裝咗閉路電視？我都未行到嚟你就開咗門。」以琳好驚訝咁問。
「個密碼鎖可以用藍芽控制，有埋鏡頭，所以見到你行緊埋嚟。」
「嘩，呢度就係你嘅地方。」以琳眼前係一個夢𥧌以求、但有少少亂嘅小天地，對於一個DSE準考生係遙不可及，但唔知點解也然做到。
一張小型黑色LANDSKRONA梳化，配STOCKHOLM胡桃木茶几，枱面有部16吋MacBook Pro，貼牆有個5乘5嘅KALLAX層架，已經係全屋嘅傢私，餘下就係一個個叠起咗嘅紙皮箱，呢堆舊物比例之多，同幢咁新嘅大廈一啲都唔夾。