佢用3粒Bitcoin買起一間7仔: 第一章 2022.12.16 BTC/USDT=$17,400 三之二
件事唔應該係咁。Francis花咁大力氣講咗四句嘢，足足三十三個字，太珍，太貴啦，加埋嘭雪櫃嗰度力，唔尋常。
//你唔做啲嘢嘅話，冇㗎啦！//
//有女冇女//
//女//
「Francis知我對以琳好有感，要同我搶」，也然心諗，頂呀，諗住考完DSE先吖嘛，冇理由公開考試前搞啲咁嘅嘢，哎，但Francis今次擺明挑機喎。
也然遠望喺收銀處數緊印花嘅以琳，以琳拎到19粒印花就由心笑度出嚟，齊戢戢嘅留海配長短適中嘅馬尾，好靚，同埋真心為呢啲也然覺得戇居嘅贈品而開心。
//我係咪真係做啲嘢？//
//係咯，不如做啲嘢//
也然靜咗半秒，盡量靜到半秒，但畀Francis嗰三十三個字激到暫時冇咗理智。所謂暫時冇咗理智，唔係失控，係會高速做出自己能力範圍內嘅嘢，但完全唔盤算後果。
半秒內，也然腦海閃出一個無人諗過、諗過亦都做唔出嘅想法。
也然雙手插褲袋，扮繼續睇嘢，攝下攝下，踱步去到仲喺收銀枱享受印花嘅以琳背後，用0.01秒速度偷咗佢掛喺粉紅色書包嘅Airpods盒，塞落自己後褲袋。
故事就係咁樣開始。
眾人各自回家，輕輕鬆鬆又一天。
也然已經逃離唔盤算後果嘅狀態，冷靜落嚟，但係走向另一個極端，不斷諗後果，因為被Francis挑釁臨時諗到偷以琳Airpods盒計劃嘅成功咗，可惜又算漏咗CCTV因素，唉，點解突然咁蠢，玩偷嘢真係唔係也然強項。
無限輪迴地諗完又諗之際，也然已經返到自己新租番嚟嘅小天地門外，佢伸出摸過以琳Airpods盒嘅手出嚟，左手拉開口罩，用右手放近個自己鼻，咦，好變態，怪味咯，分唔到香定臭，總之轉頭要第一時間洗手，左手條件反射移返好個口罩。
「嘟！」
「嘟！嘟！嘟！嘟！嘟！嘟！嘟！嘟！」
也然放右手落指紋鎖對指紋，再按密碼，左手拎塊眼鏡布出嚟，抹返走留喺鎖上面嘅蛋白質同人體脂肪。呢款鎖係最新款，成一萬蚊一個，唔係咁普及，好多人都唔捨得買咁貴，亦冇必要保安程度高到咁。
時間只係下晝5點左右。
也然放低書包，靜靜坐喺皮梳化上面，然後擺即興偷返嚟嘅AirPods盒同自己部白色iPhone落茶几，呆呆咁坐喺度，腦海不斷反覆推演剛才用半秒閃出嚟、未完成嘅計劃。
打開同以琳whatsapp嗰版，佢未Online，記錄顯示彼此冇乜訊息來往，對上已經係舊年聖誕大家都會濫發嘅Merry Christmas Emoji。成年前嘅事，證明大家冇乜來往，成班人嘻嘻哈哈，或者喺Group入面吹水就有，私下嘅交流近乎零。
也然左手有節奏咁把玩個AirPods盒，無間重演即將發生嘅情景，由初初覺得好緊張唔知點做，變得熟練，可以應變唔同嘅即時反應。
到咗6點，也然見電話仲未響，連whatsapp﹑TG message都冇。梗係冇啦，以琳鬼知係你偷咗或者執咗咩，知係你報警拉鬼咗你啦。
係時候做啲嘢。
也然拎起白色iPhone，開始whatsapp以琳。
「你係咪跌咗個Airpods盒？我正話喺便利店附近執到個，好以你平時用嗰個。」 下午6:05
「太好啦，我搵咗好耐，原來你執到。」 下午6:08
「不如今晚畀返你先啦。」 下午6:09
「好呀。」 下午6:13
「食完飯，九點正話間7仔等丫。」 下午6:14
「CU。」 下午6:18
一切如也然所料，一步一步推進。
也然換返套便服，拎起AirPods盒同埋枱面個電話，再喺書枱攞多另一部黑色iPhone，向案發現場進發。
6點48分，便利店並唔多人，也然一眼就知店員仲係正話嗰個，仲未換更，店員整理緊收銀處嘅雜物，依家舖面地方唔多，又賣熱食，最新仲要賣埋即沖咖啡，個店員忙到唞氣都唔得閒，加上個個戴口罩，唔會有心機認到客人。
也然揀咗碗鳳爪排骨飯，加罐可樂，同埋香口珠，行去收銀畀錢。
「先生，呢隻香口珠買多包18蚊，多一個Moomin印花喎。」戴粗黑框眼鏡、成個谷德昭咁樣嘅收銀員機械式促銷啲特價item。
「嘟。」也然擰擰頭，快快手拎咗個八達通出嚟，香港就係呢個速度，講多句都懶，最緊要快。店員已經用𠝹刀𠝹開碗飯，方便入微波爐。
//一、二、三⋯⋯⋯四，四，係咁多啦//
去到微波爐旁邊，也然右手按包裝指示加熱盒飯，眼就不斷四圍望，數下便利店裝咗幾多部閉路電視。
好彩，閉路電視唔多，況且，就算幾多部機、即使影到，轉頭就會冇用。
7點半，也然差唔多嘆完個飯，佢食飯期間，觀察到「店員」做咗唔少paperwork，亦不斷打電話聯絡唔同人，似係編更，「店員」應該係呢間特許經營便利店嘅老細。
加上也然見到「店員」戴住隻Omega Speedmaster、唔係同Swatch合作嗰隻Moonwatch喎，打工唔會戴隻幾萬蚊嘅錶掛。
也然好有手尾，將吉嘅汽水罐同飯盒丟落垃圾桶，口罩都唔戴，行埋收銀處搵「老細」。