佢用3粒Bitcoin買起一間7仔: 第一章 2022.12.16 BTC/USDT=$17,400 三之一

三、二、二個半、一、零點五⋯⋯
 
閉氣。
 
林也然要喺心入面倒數，先迫到自己出手，偷王以琳掛喺背囊嘅Airpods盒。
 
嗖！到手。
 
急急塞入校服長褲後袋，同時忍住呼吸，雙手快速拉住自己兩條書包帶，扮作若無其事，左望右望。
 




以琳喺便利店收銀台面前，專心數緊同學夾份兼夾硬買零食幫佢換嘅Moomin印花，有人打開佢書包拎走一兩本書都未必知，冇咗個輕升升嘅Airpods盒，邊會察覺到。
 
也然盡量扮鎮定，但個心仲係卜卜、卜卜咁跳，右邊屁股畀個Airpods盒頂住，好唔自然，覺得一定有人發現到，呢種感覺，一啲都唔好受，唔似會有好事發生。
 
弊！！！
 
也然依家先醒起，便利店係有閉路電視，呢舖GG啦。心入面暗暗地罵自己﹕「點解出手之前唔周圍望下，搵咗閉路電視盲點先落手？戴晒口罩都認到校服同髮型啦，點解隻手唔可以快啲？點解淪落到要做啲咁蠢嘅事？畀其他人知道會唔會以為我經濟有困難要做賊？平時冷靜嘅也然去咗邊？」
 
理智要長時間培養，奈何失去只需一瞬。準DSE考生喺便利店偷同學Airpods盒（仲要唔連耳筒），哈哈，（可能你會問﹕點會咁蠢㗎？）蠢到唔識形容，但背後有個曲折嘅故事。
 




故事由幾個中學生放學講起。
 
2022年嘅冬天，一如近年北半球亞熱帶地區嘅嚴冬，季節名稱好凍，實際氣溫只係一個稍凉嘅夏天，有時連秋天都不如。着晒長衫長褲唔代表天氣冷，耐唔耐仲會熱到出汗，加上返學咁辛苦，放學梗係去買嘢飲啦，尤其今日係星期五，點都要逛下散散心（Hea一Hea先返歸喇）。
 
也然、以琳同幾個同學，臨近聖誕假期已經完全holiday mood，距離DSE呢個大限仲有四個月，真係理鬼佢。一踏出學校門口，所有學術問題拋諸腦後，當前得三件大事，係聖誕玩餐勁、聖誕玩舖勁同聖誕要最盡嘅盡興，以琳就比佢哋多一件事，就係儲7仔印花，佢要換Moomin。
 
以琳由細到大都好鍾意Moomin，因為姆明同姆明谷嘅朋友，對附近環境都好好奇，富有冒險精神，所以發生好多千奇百怪冒險故事，又童真又刺激。由於得佢一個鍾意，成班同學成人之美，反正我要飲嘢，你要印花，咪畀你咯。
 
「今年聖誕係我哋考DSE之前，最後一次玩舖勁嘅假期。」後生仔冇咁鍾意農曆新年假期，所以以琳數漏咗，佢一邊眼甘甘望住飾櫃嘅Moomin產品，一邊同Annie講。
 




「24號晚我會去牛津道個表哥屋企玩，佢間屋大到有泳池㗎，但年年都係聖誕先叫人去玩，但一早就放走晒啲水話洗池喎，嘥氣咯。」Annie對重味精嘅特價薯片情有獨鍾。
 
Cindy雖然書都未讀完，但一留喺香港就有蟻咬，「今年首爾過呀，白色聖誕，個PK疫情搞到兩年幾冇飛過，去三日都要去。」
 
「唔好諗咁遠住啦，星期日要去George屋企燒嘢食。」飲飲食食，Annie最用心。
 
「係呀，我哋幾個，仲有隔離班五、六個打開波嘅都去丫嘛。」「使唔使加料買啲嘢去？」「不如買菠蘿燒丫，聽講食得多會甜啲㗎。」「黐線嗰度甜又唔係自己受惠。」「你兩個日光日白講啲咁嘅嘢。」「咁買定包棉花糖啦，驚到時唔夠。」三個女仔七嘴八舌，可以講到天荒地老。
 
男仔嗰邊，氣氛同呢班女仔好唔同。
 
「今年聖誕得套《阿凡達2》好硬膠，第一集我得4歲咋，冇feel，《毒舌大狀》農曆新年先上，Splatoon 3又玩厭咗，唔想溫書。」也然企喺飲品櫃前蹺埋雙手，望住揀緊汽水嘅Francis，一邊講唔停呃搲水吹。
 
Francis扮聽唔到、或者唔想理也然講嘅嘢，黑口黑面咁專心睇嘢。以前嘅Francis，性格唔係咁，踏入中六呢年，耐唔耐就會好似M到咁，忽然沉鬱咗好多，唔係點講嘢，問佢一句，答你一句，或者半句，甚至唔答。
 
「疫情搞亂晒啲嘢，以前聖誕好多戲睇，又多活動，呢幾年乜都唔同晒……呀可。」也然雙眼望實Francis，睇佢幾時有反應。




 
Francis左手拎咗支日本進口嘅碳酸飲品，右手偏大力咁嘭埋個雪櫃門，雪櫃白光管嘅光，喺佢眼鏡反彈出嚟，再照入也然雙眼，配合幾大塊玻璃門令光線散射，忽然有股殺氣。
 
「聖誕你都係咁㗎啦，有女冇女都係咁，有咁多錢你又唔使。你唔做啲嘢嘅話，冇㗎啦！」呢句超過80分貝嘅說話，吸引埋在場同學同其他客人嘅注意力，目光全部落晒兩位身上，時間好似停頓咗喺呢一秒咁。
 
女人有專注力嘅時候，比工作中嘅男人更專注。以琳冇畀兩個男仔大聲講嘢分散佢嘅目標，「190，200蚊，嘩換到19個印花呀，就嚟夠印花換夠兩Set姆明啦。唔該晒你哋呀。」呢股自我沉醉嘅聲線，令到便利店內靜止嘅空氣恢復流動。
 
以前嘅Francis唔會咁，也然畀佢呢一句嚇到呆咗，企咗喺度。也然心諗，做乜膠啫，咁我冇嘢揀得啱吖嘛，又唔口渴，唔通為印花夾硬買咩。