佢用3粒Bitcoin買起一間7仔: 第一章 2022.12.16 BTC/USDT=$17,400 三之三

 
「先生，唔該你喺店內戴返口罩丫。」
 
「請問你係唔係呢度老闆？」
 
「請你戴返口罩！」
 
見到「老細」以為自己玩嘢或者投訴，兼且防護網着晒燈，也然費事壞咗大事，施施然勾返好個口罩，「請問你係咪老闆，我想買咗呢度。」綵排咗N咁多次嘅說話，講出嚟流暢又自然，一take過，配合堅定嘅眼神，氣場強大到舖外都感受到。
 
「吓！？」老細腦海浮起無限個黑人問號，眼前呢個後生仔唔似嚟打劫，正正常常斯斯文文，又唔似白卡，乜料呀。




 
「我呢度賣下飲品同零食，如果你自己想有間便利店，可以打上公司申請。」老細指向舖外玻璃門，門上貼咗張海報，歡迎任何人士申請特許經營開分店。
 
「我話，我想買你呢間舖，指定要呢間，主要想用嚟緊呢幾粒鐘。」也然雙眼望實粗黑框眼鏡老細，意志好firm，「我大概數過你舖面嘅貨，連埋你身後嘅貴價煙酒，同埋遊戲卡點數卡，頂多值20萬以內，計埋我睇唔到舖後嘅存貨，唔會多貴嘢，零食汽水居多，畀盡30萬。」老細聽到呢度，已經目瞪口呆，心諗呢條友係應該真係白卡。
 
「你當我計錯數，你公司網站寫明開業有要有約480,000港元至780,000港元資金做經營費同存貨按金，不如你計40萬你喇。」
 
「先生！」老細忍唔住打斷嘅也然嘅話說，「先生，你係咪精神壓力太大？我有個細侄女做社工，或者幫到你，定係我請你飲杯思樂冰，冷靜下，唔好搞住我呢啲小生意開舖喇。」遇到癲佬，正常嚟講應該話「你講得啱」先係標準答案，但眼前啲個小朋友話要買起自己嘅事業，點都要推的可行嘅方法去解決。
 
也然等老細「喇」字講完，零秒接上話：「我知我要求奇怪啲同唐突啲，但我真係有誠意㗎。」一邊講，一邊喺背囊拎出佢部黑色、唔係成日用嗰部iPhone出嚟，「今日Bitcoin 17000美元一粒左右，我齊頭畀夠三粒你，Hot Wallet打畀你，如果你冇Hot Wallet，我教你開。」




 
老細開頭以為也然會癲到喺背囊到拎40萬現金出嚟，全部1000蚊紙都400張，如果500蚊紙就800張，個背囊裝到亦都好合理，點知只係拎咗部最新款嘅iPhone。
 
老闆好早已經買過以太幣，一聽到係用crypto畀錢，即刻覺得有得諗，相對畀現金或者支票、銀行過戶更佳，亦都證實眼前呢個小朋友，唔係精神有問題，除非佢個Hot Wallet係假嘅，或者到呢一刻都係膠吹。
 
如果也然真係即場畀三粒比特幣佢，總公司唔知佢有錢銀交易，扮壞咗冷氣閂門一日半日應該冇影響。三粒袋袋平安，神不知鬼不覺，慢慢轉返USDT用又得，等佢幾年後真係to the moon又得。
 
老細對也然嘅戒心，由60分減到25分，「好呀，我有Hot Wallet，但唔好玩爛我間舖，你真係畀三粒比特幣我？」
 
「係，驚你唔要咋，呃你做乜？又唔係經銀行過錢畀你，依家即時畀你冇Delay，一手交一手啦，冇得呃，我驚你收咗唔畀我玩間舖咋。」




 
老細已經掏出自己部手機，打開個Hot Wallet，佢反而一啲都冇驚訝點解一條𡃁仔咁有錢，唔係，係咁多幣。
 
好多加密貨幣一升都升一萬甚至十萬倍，唔關你信唔信、識唔識區塊鏈事，只要神推鬼㧬買中暴升嗰隻，發咗都唔知有人知。好多小朋友或者你覺得佢係毒L嘅人，甚或係乜嘢金融常識都冇嘅師奶，因為幸運之神眷顧，早年衝咗去買加密貨幣，用法定貨幣計佢哋依家已經係千萬，甚至億萬富豪。亞洲地區中，韓國泰國新一代買得最勁，賺得最多，但市回又輸得最慘。
 
所以也然亂使錢，係幣，亂使幣，唔奇啫。反正賺返嚟嘅，而且冇乜技巧，亦冇乜付出過努力。
 
「我依家畀三粒比特幣你，但有三個條件。」老細聽到也然呢句，即時停低喺手機滑動嘅手，抬頭望住呢位唔似冇富豪外表嘅富豪。
 
「首先，我要晒你舖頭嘅印花。」
 
「吓？總公司Check到數㗎喎。」
 
「唔好唔記得三個Bitcoin今日係值成40萬港幣，我名義上同實際上都係買晒你全舖的貨，只係冇經收銀機。買20蚊嘢一個印花，每10蚊多一個，一口氣買40萬嘢應該有39,999個印花，我唔覺得你有咁多印花存貨。」
 




嘩，呢位DSE考生好犀利，思路清晰過唔少大人，談判時得勢不饒人。谷德昭諗唔到任何反駁嘅餘地，靜靜等也然開出其他條件。
 
「第一個條件係要晒舖入面啲印花，第二係要你delete對上半日嘅閉路電視錄影，兼且熄咗個系統，直至我離開。」
 
「呢個冇問題。係喎，其實你可以直接要埋啲Moomin精品，唔使換嚟換去喎。」
 
「我要印花，唔要精品。」也然覺得用印花換，比直接收到精品，儀式感重好多，加上拆盲盒過程會有緊張，有期待，以琳會更加開心同難忘，咁多印花，直頭永誌難忘、刻骨銘心、下一世都記得。
 
「咁第三呢？」
 
「第三就係我想要⋯⋯⋯」