【愛情/奇幻】《只能用餘光看見你》第二部曲:暗戀的餘光: 21
天后廟在熙攘的市區中，裡頭卻格外冷清。在一位男人安靜地打掃落葉的景象下，只有一個人在跪拜。
秋淑儀膝蓋著地，雙手合十，誠心祈禱。「天后娘娘保佑，希望你保佑佢……」
「我唔知你講咩林姑娘，呢度冇呢個人喎。」剛才在掃地的廟祝在外頭說著。
秋淑儀聽到熟悉的聲音便轉頭看去「你諗清楚啲，或者係年紀細啲鍾意著紅色衫嘅女人有冇……?」
「真係冇呢，唔好意思。」廟祝慢慢離開，一臉失落的劉世檜朝著廟內看去，兩人的雙眼對視一番。
「點解你會喺度嘅?」劉世檜有些驚訝地走近。
秋淑儀有些尷尬地說著。「係啊……就考試，所以求下學業進步。你呢？」
「係呀，我都係喎。」劉世檜不慌不忙地回應。
「你都要學業進步? 你平時都唔信呢啲嘢嘅，想呃我?」秋淑儀輕笑一聲。
「大家咁話，不過我都估唔到原來你成績咁差。」劉世檜輕輕說著，聽見這個回應的秋淑儀一臉疑惑。
劉世檜停了一下補充著「我嘅意思係話……原本以為你成績會更加好。」
「多得你囉。」秋淑儀回應
「又關我事? 我個個都有輔導㗎喎，即係話我教得唔好啦。」劉世檜輕輕一笑
「你教得好好，就係因為你樣樣都太好……」秋淑儀在喃喃自語，不斷在玩著手指「所以我唔想你有遺憾! 之前我同你講，叫你放棄追佢，係因為……」她欲言又止
「無論點，我覺得你應該都同佢講清楚，正正式式表一次白。」
「我有啲事走先啦。」秋淑儀倉促的說完後，頭也不回地離開，此時廟內一位老人家緩緩走來，皺皺眉看著遠去的身影「哎呀，哥仔嗰個你朋友呀?」
「呀，係呀，你搵佢?」聽到劉世檜回應，老人家拿出一隻被刮花的手錶「佢留低咗啲嘢，頭先佢話一陣嚟解簽，點不知急急腳就走咗。」
「解簽?佢求啲乜嘢?」劉世檜好奇的問
「佢係幫人求嘅，詳細唔方便講啦，不過佢頭先求極都係跌兩支籤，諗住話一陣再試過佢就走咗喇。」老人家將手錶放到劉世檜手上，隨後便準備揚長而去。
「我想問下你識唔識得一個叫林姑娘嘅人?」劉世檜的問題讓他停下腳步
老人家給予他一個意味深長的笑容「有問題，入去拜下天后娘娘啦。」
毫無辦法的劉世檜只能無奈的照做，緩緩步入廟內，在天后娘娘雕像的注視中跪下。
混合著線香和蠟燭的香味，濃郁的香氣籠罩著劉世檜，他在這寧靜的空間悄聲開口道「天后娘娘，天后娘娘，天后娘娘……我好需要你指點迷津。」
易天恆再次睜開眼睛的時候，從玻璃的倒影看見憔悴的自己，回過神來的他發現自己正坐在巴士上層，天色亦都暗淡起來，打開手機一看幾乎已是深夜。
「你哋傾到而家? 有冇……」易天恆正想開口問，玻璃卻多了一個人影，劉世檜彷彿坐在鄰座。
「有。」他簡單直接回覆
「咁係咩?」易天恆焦急的想知
「到你答我一個問題。」劉世檜凝重地開口
「乜野?」
「如果有危險嗰陣，你會唔會扔低佢唔理?」劉世檜依舊目不轉睛注視著他
易天恆先是一頓疑惑，隨後才緩緩說「嗰個方法係咩?」
「答我。」劉世檜回應
「唔會。一定唔會。我發誓!」易天恆被弄得緊張起來。
劉世檜有些遲疑的說「方法……就係殺死佢。」
「吓?」易天恆質疑自己是不是聽錯
「唔係真係殺死佢，而係，喺毛月永佢哋面前，扮殺死佢……」劉世檜看著易天恆的背包，他意會到什麼，立刻打開拉鍊，裏頭多出數樣東西，其中一把小小的桃木小刀尤為顯眼，他拿在手上觀摩，小刀手柄被道家符咒包覆，末端有一扎紅繩。
「但係，會好難。」劉世檜開始娓娓道來他的計劃……
「要喺鍾婉恩接近死亡時間，靈魂出竅嘅時候，快過毛月永佢哋，將桃木小刀插入鍾婉恩嘅靈魂。」
「把刀會封印佢嘅靈魂，但係從效果睇，會好似魂飛拍散咁。」
「再加埋呢樣……」劉世檜指一指背包的另一樣東西
「呢嚿係……紅色嘅蚊香?」易天恆不解的問
「呢嚿……通俗啲講……係會令到我哋隱形嘅法寶，喺附近嘅話，會搵我哋唔到，召喚我哋唔到。都係鍾婉恩假死要用到嘅法寶。」
劉世檜停頓了一下又再說「但係如果我哋咁做，毛月永唔會放過我哋，最後死嘅可能係我哋。」
「我唔驚。」在易天恆回覆的當下，劉世檜一直用著猶疑的目光看著他，而易天恆專注看著這些法寶沒有留意「就算呢啲都係真嘅……但係要點做? 未知數太多。」
易天恆腦海不自覺湧出更多的問題 「但係我哋點知佢幾時死? 如果肉體因為意外唔見咗，或者維持唔到生理功能……咁樣又點? 我哋又要點樣先快過毛月永?」易天恆的發問讓劉世檜沉默不語，一連串疑問之後他自己都安靜下來。
易天恆目光放空看著一轉而過的景色，直至巴士即將到站，視線才重新聚焦，看著那把桃木小刀「如果……」
「如果我哋做殺佢嘅嗰個人呢?」易天恆重新看著劉世檜「咁樣，佢死嘅時間同埋肉體損害程度……我哋就可以控制。」
「……」劉世檜顯然被他的說話驚住，不知怎樣回應。
直至巴士關門重新行駛，兩人才驚覺自己坐過站了。