【愛情/奇幻】《只能用餘光看見你》第二部曲:暗戀的餘光: 22
深夜，易天恆坐在書枱前，手中拿著打火機不斷撻火，再次重新思考起那個假死計劃。
「你而家就諗啦? 兩點幾喇喎，聽日先啦。」劉世檜坐在床邊說著
手機中不斷播著當時毛月永他們說話的錄音，易天恆在筆記簿寫著重點，喃喃自語道說「佢哋係最近先收到死亡名單……」
「而家已經過咗十幾日，我哋唔知道名單上佢嘅deadline係幾多……」
「所以，個計劃，越早越好。」易天恆依舊埋頭在筆記簿上
劉世檜撓了一下頭，有些遲疑的開口「仲有樣嘢唔記得同你講，如果個計劃要成功，仲要有一個法術。」
「法術?」
「我哋要喺佢哋眼前扮殺死佢，但係又唔可以畀佢哋幹擾，所以，要一種法術類似結界隔住佢哋。」劉世檜停頓了片刻繼續說 「重點係……」
「我哋呢啲冇修行嘅人同鬼，要維持一個物魔雙防結界係好難。」
「物魔雙防?咩意思。」易天恆不解的問
劉世檜無奈的說著「唔記得你唔打機嘅添，即係……黑白無常你知啦……一個極陰一個極陽……點解釋呢……除咗佢哋嘅肉體，我哋要創造兩幅同樣係極陰極陽屬性嘅結界。」
易天恆徐徐說著「……根據能量守恒定律，能量只會轉移或者轉化，唔可以被抵消。所以我哋嘅結界係咪會藉住轉移或者轉化佢哋嘅能量，再用佢哋嘅能量互相維持嗰兩個結界，等佢哋入唔到嚟，類似咁樣?」
劉世檜呆滯了片刻，隨後豎起大拇指「完全唔知你噏乜，但係應該差唔多原理㗎啦，你當係咁啦。」
「咁樣要點樣阻住佢肉體入嚟?」易天恆再問
「呢樣就簡單得多……」劉世檜緩緩走到門口「兩個字，鎖門。」
「搵個佢哋入唔到嚟嘅地方就得。」
「OK……咁你頭先想講咩?」易天恆又再問
「鬼靈修煉似乎會快好多……但係，幾個月就唔甩。」劉世檜說著
「幾個月……唯有期望嗰日冇咁快嚟……」易天恆繼續埋頭看著筆記簿。
經過一段時間，我重回著規律的生活，只是回家後自學的不是教科書，而是關於道教手印與結界的書籍，早上和晚上多了冥想的習慣，而在放學後，劉世檜會暫時拿走幾小時，走去不知哪裏修練。
每日她就在我身旁，不知道什麼時候就會……
下課的鐘聲響起，我夾著那本教學書，一邊走，雙手練習著手印「呢個係……請神……」
「小易!今晚我哋去打邊爐好唔好呀?」鍾婉恩與秋淑儀無聲無息從我背後出現
「搞咩呀扮火影呀?」秋淑儀在我身旁輕輕嘲諷
「唔好意思，唔得閒，你搵錢卓鏗啦。」對，時間已經冇多，我拿著手中的書籍，便緩緩離開。
「佢呢排學都冇返，邊得閒理我哋?」
鍾婉恩看著易天恆背影顯然有些失落，秋淑儀接著說道「佢呢排又奇怪……應該話正常咗? 好似變返原本嘅佢咁。」
在轉角之際，我卻不小心撞到別人，手上的教學書掉落在地。直至我重新拿回抬頭看的時候，我才發現，不是我撞到別人，而是別人刻意等在這裏。
「睇嚟呢排……你哋準備緊啲特別嘅嘢喎。」毛月永雙眼彷彿看穿我的靈魂，隨後視線移到那本書上。
「你選擇信佢? 希望你唔會後悔。」毛月永說罷走過易天恆
劉世檜傾刻間佔領身體，用著他身體說著 「今次唔會好似上次咁，我，唔會再等運到。」
毛月永緩緩停下，劉世檜接著說道「我知道曬，想收我，冇咁易。」
「上次?」毛月永擺出一下困惑的表情，隨後瞬間恍然大悟，不禁一笑「可惜你冇佢咁聰明，我今次收硬你。」
在毛月永走完的時候，劉世檜繃緊的神經才放鬆起來，讓易天恆重新甦醒
「你同佢講咩?」易天恆問
「轉移視線啫，嗰樣嘢你練成點?」劉世檜不慌不忙回覆
「預期進度，我哋係咪應該差唔多要同佢講?」
劉世檜有些擔憂反問「……你諗好點同佢講未?」
毛月永在走廊處仰望天上，感覺時候不早，來到一間空班房前打開門，走了進去。
「我漏咗個銀包，你等我一陣。」一個女同學跑回自己的班房，在空無一人的班房中翻找著自己櫃桶。
與此同時，鍾婉恩在地下的活動室獨自整理著接下來要用的道具，她揭開一塊白布，塗滿假血漬的全身鏡映照著她，忽然鏡中的她雙眼變黃，鏡子彷彿如河面一樣波動，一隻黑貓從鏡中跳出。
「我勸你都係唔好睇。」黑貓的說話透進鍾婉恩腦海，白布獨自飄落蓋住了鏡子。
「點解?」鍾婉恩疑惑地問
「因為，誓約。」黑貓言出法隨，儘管忘記了誓約內容，鍾婉恩整個人卻感受到一陣疼痛，強烈的預感與痛感阻止著她接近鏡子。
黑貓擺出一副嘲諷臉 「你要唔要返去? 時間，無多，滴答滴答……」
「未搵到佢之前，我唔會返去。」鍾婉恩堅決的說著
「加油，唔好放棄。」黑貓隨著門外一位老師的開門瞬間化為烏有，彷彿從沒存在過，鍾婉恩轉頭看著氣喘噓噓的老師，身後還站著易天恆與秋淑儀，兩人都一臉凝重，未等鍾婉恩開口，老師便催促道「你快啲出嚟!」
一頭霧水的鍾婉恩跟著他們坐上老師的私家車「而家係做咩?去邊呀?」
秋淑儀低下頭沉著臉解釋「錢卓鏗……想自殺。」