【愛情/奇幻】《只能用餘光看見你》第二部曲:暗戀的餘光: 20
比賽完後，他們在一排長凳中休息，鍾婉恩輕輕在遠處叫走了易天恆，兩人在籃球架下聊天。
「頭先唔好意思，我只係……」鍾婉恩看著他雙眼說著
「唔使解釋，我冇放喺心上面，而且我抵鬧嘅。」易天恆淡然一笑
「畀返你，請你飲。」鍾婉恩隨即遞給他一瓶水，在後方看見的秋淑儀默默將手上的寶礦力收在後頭。
「肥仔，畀你。」秋淑儀隨手將那樽寶礦力遞給錢卓鏗。
換完衣服後，易天恆從更衣室出來抬頭看天，毫無先兆的下著大雨，碟仙從他後方出現，默默問「我瞓覺嗰陣發生咩事?」
易天恆站在原地看著濛濛細雨逐漸變大「事先講明，每次見到你，我個腦都分泌唔到多巴胺。」
「咩意思?」碟仙一問
「即係我好憎你，而且唔信你，但係……」易天恆逐漸捉緊拳頭「有啲嘢，要你幫手。」
易天恆腦海回想毛月永的說話，如實相告給碟仙「……而且佢仲話，你對佢最有影響。」
碟仙呆站在原地 「佢哋係鬼差……我最有影響……死亡名單?」
「嗰晚佢仲突然流鼻血，滴咗落張碟仙紙度」易天恆凝重的問「佢有啲唔妥，係咪你影響到佢? ……定係你會殺咗佢?」
碟仙肯定的回答「冇可能，絕對冇可能!而且影響……影響唔一定係壞，可能係好嘅影響㗎嘛。」
「咁的確係一個中性詞……但係，我可以點信你? 我到而家對你都係一無所知。」易天恆與他互相對視。
「我唔知。我淨係可以話畀你聽……我個名。但係你要應承我，唔可以同人講，任何人都唔得。」碟仙說罷後，易天恆默默點頭。
碟仙緩緩說出「我個名叫，劉世檜。」
「咁你有冇可以改命……可以逃避鬼差嘅方法?」易天恆繼續問「定係你有冇方法可以對抗到佢哋?」
「對抗?冇可能，一定冇可能。正面打，死梗。」劉世檜面容焦慮彷彿回憶著什麼
他皺著眉苦苦搖頭，忽然靈機一觸「……但係我諗應該有人可以幫到我哋。」
週末，他們找上了徐道士，自上次見面起已有幾個月，她肚子已然脹了不少，最近一直在家中休養，方便起見，他們約在徐道士的家裏等。
易天恆拿著手機導航尋找著她的那棟樓，劉世檜卻漸行漸遠「呢邊呀。」
「你又知?」易天恆快步跟上
劉世檜不以為然的繼續走「因為我勁。」
順著他的路線果真找到了那棟樓，當易天恆想進去的時候，劉世檜似乎分心看著遠方的公園，一對情侶剛好在哪裏玩著鞦韆。
「有問題?」易天恆問
「諗起啲往事啫，行啦。」兩人來到徐道士家裏，易天恆拘謹的坐在梳化上，不料這時雙手居然自己動，碟仙好奇的翻找旁邊櫃桶。
易天恆連忙阻止「你當你自己屋企呀，縮手。」
劉世檜無趣的放棄控制，在屋內四處張望，這時徐道士從廚房內斟了三杯茶出來「你哋飲杯茶先啦。」
易天恆禮貌的拿起茶杯「唔該……」
下一刻劉世檜與他才發覺不對勁，兩人同時在心中默念「你哋?」
視線移到桌上的三杯茶，加上徐道士那溫柔的眼神似乎便是答案。
「你哋今日過嚟，應該係有其他嘢問?係咪呀?」她緩慢的坐下
「點解……」劉世檜還在驚訝當中用著易天恆嘴巴開口說出
徐道士用開玩笑的口吻說「我咩都知哦，因為我勁。」
易天恆認真的開口說 「咁我都直接問你，我想搵逆天改命，逃避鬼差嘅方法。」
徐道士淡定的喝一口茶，語重心長的說著「道教有一派本來就係追求長生不死，你覺得有冇成功過?」
「萬物都係由道演化，就算你想逆天而行，最終都逃離唔到道。」
劉世檜搶過身子接著說「但係如果有人可以脫離到因果，例如……可以回到過去，脫離到天地萬物嘅演化運行機制……」
「只係證明佢……仲未意識到自己依然喺道嘅掌控入面。」徐道士眼神逐漸變得憂慮。
「咁樣，逃避鬼差嘅方法呢? 延長命定壽命總有方法吧?」劉世檜焦急的問
「點解你咁想知?」徐道士輕輕一問「就算有方法話畀你知，冇修行冇道行冇經驗嘅你哋，做到啲乜嘢?」
「生死有命，唔好咁執著。」她好言相勸，似乎不再打算說什麼，眼見氣氛有些僵持，易天恆奪回身體寒暄別的事情，隨後告別了她。
在升降機內，易天恆語氣有些失落「你仲有冇其他方法?」
「我鬼嚟㗎嘛，邊度識咁多人，仲要係神通廣大仲要肯幫我哋嘅人，一係求其廟街搵個占卜師囉可能……」劉世檜忽然一怔
「路邊占卜師……我哋去搵一個路邊嘅占卜師!」劉世檜語氣變得認真，讓易天恆分不清楚究竟是認真還是說笑，只能擺出一個疑惑的表情。
劉世檜帶著他來到一個簡陋的路邊占卜檔，披著紫袍的女人在看著手機吃著外賣，獨自坐在攤檔前，在易天恆困惑的眼光中，女人將吃完的雞骨吐回碗內，再大口吃著米線。
「你確定要搵嘅人係佢?」易天恆一副不可置信的表情
「通常大師都係深藏不露㗎嘛，行啦。」劉世檜獨自控制身體朝著攤檔走去。
女人偶然抬頭，發現一個中學生無聲無息坐在自己前面微笑著，被手中那碗米線嗆到，一陣咳嗽，米線居然從她的鼻孔中出來了。
「你講嘅大師都幾……獨特喎」易天恆睜大雙眼腦海默念
一陣狼狽過後，女人裝作無事的尷尬一笑「學生哥，我估到今日你會出現㗎啦。」
「廢話少講，入正題先……」劉世檜焦急的想繼續說，卻被女人伸手打斷「你咁心急，無非都係因為愛情啫。」
易天恆有些無言的附和「都算係嘅。」
「而且學業上都有少少煩惱係咪呀?」女人悠然自得的看著他
易天恆輕輕搖頭「完全冇……」
「你唔使講，我會算到出嚟，但係首先……」女人隨即拎起一旁的價目表「明確咁講你想知道啲乜嘢?」
易天恆輕輕咳嗽一聲，在腦海中抱怨「夠啦，懶係神秘嘅語氣同態度我頂佢唔順，整暈我唔該，你哋傾完再叫我出返嚟啦。」
接管身體後的劉世檜，再三確認易天恆是否睡著後，用著更加焦急語氣，身子靠到女人前說「你記唔記得我? 我之前搵過你㗎!」
「我呢度開店冇耐咋喎。」女人有些不知所措
「你之前話睇過我前世! 我仲帶咗個女仔嚟，你話佢前世叫婉恩……」劉世檜捉著她雙肩
「搵食啫大佬，我唔識你㗎!冷靜啲先，年輕人唔好咁迷信……」女人見他似乎冷靜了少許便繼續說「如果有精神問題應該要去睇……」
劉世檜無奈的拍了一下桌子，留下一句「神棍。」便快速走去。
女人在攤檔探頭高喊著「再唔係返學校搵社工幫下手都得㗎!」
「社你條命咩，如果社工幫到手就……」劉世檜忽然停下來看著前方一個穿著紅色衣服的路人。「社工……點解我諗唔到。」
他的腦海回憶起一位紅衣婦人對他說的話「欲知前世因，今生受者是。」
「唔好意思啦，易天恆，睇嚟你要瞓多陣。」喃喃自語後，立刻便截了一輛的士，來到一棟天后廟前下了車。