【愛情/奇幻】《只能用餘光看見你》第二部曲:暗戀的餘光: 8
「易同學，我諗你搵我嘅目的應該都係同佢哋一樣，係唔係呀?」校長託一托眼鏡，面露微笑地問著
我輕輕點頭，他繼續說道:「我非常欣賞你哋嘅付出，但係劇本方面我睇過，對於……」
我搶著回應「關於呢一層唔使擔心，我已經連夜做好一個新嘅劇本，可能你已經聽過副校或者睇過原本劇本嘅不足……我已經盡力改好咗，所以希望可以畀多一次機會我哋電影學會!」
我把劇本連同昨天請求其他家長寫的請願信一起交給校長的檯面上，我這個舉動不只是校長，似乎連其他成員也略顯驚訝。
校長拿起請願信和劇本簡單審閱一番之後除下眼鏡，面帶笑容繼續說「短短一晚可以做到咁樣……不愧係可以做到年年第一嘅學生呀。」
「其實原本其他同學今日嚟說服我嗰陣，我已經諗住畀你哋繼續搞學會，只係比賽方面承諾唔到畀你哋繼續……即使佢哋全部都承諾體操行同成績方面會改善，但係我都好難相信到……」
「而家咁睇嚟，劇本進度冇落後……易同學，你可唔可以輔助其他同學嘅成績達到佢哋嘅承諾?」校長雙手合十，身體微微靠前詢問。
「我會盡力輔助佢哋。」我堅定的回答
「我相信你嘅承諾，副校嗰方面我親自同佢講，你哋可以繼續搞學會同埋繼續參加比賽，但係之後考試如果你哋其中一個成績退步，都要即時解散，仲有冇其他問題?」校長微微攤開雙手，眾人露出微笑齊聲高喊著「多謝校長!」
「好啦，就打鐘快啲返去啦!」校長說罷，我們連忙離開，在操場中尋找鍾婉恩分享這個好消息。
踱步樓梯間的我，被鍾婉恩從後叫住，她的臉容比我更加憔悴，聲線相比往日更加低沉。
「聽講你……幫我哋做咗好多嘢。」鍾婉恩說著
「尋日對唔住……」我輕輕回覆
她忽然向我走近輕聲問道「可唔可以畀你篇劇本我睇下?」
我默默遞出，她拿起手便埋頭看著，眼睛輕掠一番後，目光停留在角色表中，目睹女主角的設定後，手上的劇本捉得更加緊，頭垂得更低……「……鍾隨心」
「你冇……」我伸出手想要詢問她的狀況
「你玩乜嘢?」
「吓?」我一臉茫然
她抬起頭，已經是滿面淚光「你知唔知我好辛苦?你係咪玩緊我?」
「對唔住……我係咪……做錯啲咩?」
她控制著自己的情緒，用手擦乾淨的眼淚「喂。」
「係?」待我反應到的時候，她已經一把手將我抱住……
那一瞬間時間彷彿停頓了，而心跳卻不知不覺加快了。
她在我懷中輕笑了一聲，隨後輕輕放開手「我只係……太攰，做咗啲奇怪嘢唔好意思。」
她急步走上樓梯，我依然在茫然中站在原地看著她的背影，她忽然停下「係啦，份劇本寫得幾好，只係有好多細節仲需要改……搵日，我同你一齊去取材一下。」
她現在的背影與當時的她重疊了，時間彷彿回到小學那時。「易仔，你篇作文寫得幾好喎。」
「明明你高分過我咁多……」我無奈的回應
「你呢個年齡嘅男仔嚟講你好勁㗎喇。」她笑著說
「你唔覺得我好奇怪咩? 其他人都唔同我玩，你唔驚畀佢哋杯葛埋一份咩?」
「唔會呀，相反我覺得你好成熟，做咩都好最緊要自己開心!」她明明比我年紀還小，可是永遠也像個大姐姐一樣。
「但係我都想同佢哋傾計……不過我哋睇嘅嘢都唔一樣，佢哋講緊動物橫町但係我淨係睇過動物農莊……我可以點?」我一臉認真的問她
她彷彿在認真思考，但不知為何我總覺得她在忍著笑「咁樣啦，我教你一個咒語，當佢哋再傾緊計嘅時候你就去搵佢哋傾計!」她靠近我的耳朵悄悄說著
有三位同學在小息的小賣部中聊天，其中一人是秋淑儀，我回頭看著，鍾婉恩躲在後方的柱子中向我比著加油。
我深呼一口氣走過去……
秋淑儀注意到我走近，開口說道「你咪隔離班嗰個?易……天恆」
「記住，你要認真咁講，如果唔係人哋感受唔到!」鍾婉恩的聲音在我腦海中響起
我清一清嗓子，表情嚴肅認真的向他們說道「唔係，我係山並。」隨後表情僵硬的露出笑容。
他們先是一呆，隨後一陣爆笑「你好搞笑呀!山並先生多多指教!!」之後莫名其妙的就跟他們混熟了。
在我記憶中鍾婉恩一直都與眾不同，思維方面亦是如此……那天，我們在傍晚的公園散步，微風輕拂著我們的臉龐。我轉頭看著鍾婉恩，突然問道：「如果我話愛你會點?」
她停下腳步，凝視著遠方，良久才輕聲回答「咁你要先答我，覺得愛係乜嘢。」
「無論幾多次，都要為對方做到最好……」那是我的童言童語，每次談到有關的話題，她都一臉沉重，距離好不容易拉近了，每次也會被她再次遠遠推開。
我好想知道，她在想什麼。
秋淑儀剛好在梯間見到剛才的經過，她一言不發便拉著我的手，將我帶到梯間的一個角落。
「小易，我知道你一直都好鍾意鍾婉恩……」
「但係，放棄啦。」
我微微皺了皺眉頭，不知為何她的說話總令我有些不悅「我點樣，關你咩事?」
「我係為你好咋……都係為佢好。」秋淑儀眼神中透露出一絲哀傷。
「呢樣嘢唔到你決定，點為之好，我自己知。」我直接轉身離開