【愛情/奇幻】《只能用餘光看見你》第二部曲:暗戀的餘光: 7.劇本
「救命呀，醒未?」熟睡時碟仙的聲音額外刺耳，他似乎非常焦急……
再次睜開眼的時候，我站在教員室內，面前的鍾婉恩一副失落的表情看著我，未等我搞清楚狀況，就默默離開。
只留下秋淑儀在一旁，滿面淚印似乎剛被老師訓話完，我在心中問著「你搞乜嘢?」
碟仙在腦海中說道「你終於醒啦，等你救命!」
早上時分碟仙用著我的身體上課
「英文默書? 有啲咁嘅嘢唔同我講嘅!?」碟仙心中暗罵著
默書期間，碟仙彈了一張小紙給鍾婉恩，她一臉奇怪，大概是不解為何全級第一的我要向他求救英文默書。
「鍾婉恩!你做乜嘢呀?」英文老師發現了。
「唔係呀副校，係我作弊喎，你拉我呀，唔關佢事!」碟仙開口說著，結果兩人被帶到訓導處。
這位副校是出了名的「大細超」，對待所謂劣等生的態度亦有目共睹，言行舉止毫不掩飾鄙視的態度。
副校的矛頭全都直指鍾婉恩，儘管是我(碟仙)作弊，但除了可能是我以往紀錄過於良好的關係……會這樣的原因還有一個……
午息時間鍾婉恩在訓導處外的走廊中罰企，電影學會的老臣子們除了毛月永都來安慰著她。
副校這時走出來，表情嚴肅當著眾人的面說著:「我原本今年都諗住解散呢個學會，你望下你哋啲成員，個個操行都彪炳，每一個都名列前茅，調轉嗰隻!」
「錢卓鏗，你係編劇呀嘛? 先唔論你個人行為，你份劇本簡直係荼毒青少年不知所謂!」副校指著他們逐個批評，他的目光集中在錢卓鏗身上，言辭中充滿不屑。
「早戀，示威，罷課……我畀你呢份出去，你覺得個比賽評委受唔受? 你自己想做呢啲嘢唔緊要，但係你而家係學校嘅名義!出到去係代表我哋。你憑咩覺得自己可以代表呢間學校?」 他的聲音漸漸提高，眉頭微微皺起。
「仲有你，秋淑儀企好啲得唔得? 唔守規矩唔尊師重道，自己都搞唔掂有時間就多啲讀書，唔好喺度搞對抗。」
「呀吓」秋淑儀隨意回應白眼相看。
副校看著鍾婉恩決絕的說道:「原本以為你會好少少……你哋衰唔緊要，唔好拖累人哋，總而言之你哋唔使諗住參加比賽，你哋呢個學會就到此為止。」
秋淑儀聽見後態度馬上扭轉，儘管表情依舊不爽，但態度卻變得誠懇「呢個學會我哋真係好畀心機，畀多次機會呀。」
「成績都唔掂，仲想玩?」副校繼續問
「唔係玩㗎，我哋好認真，你覺得份野有唔妥我改囉」錢卓鏗拿起手上的劇本，語氣夾雜著一些怒氣。
「你中文考第幾呀? 我同你講聽日就截止，你覺得你一日做得曬咩? 你唔係易天恆，人哋可以兼顧到興趣學業，你呢? 你唔自己都搞唔掂，就唔好再諗其他嘢啦。」
「副校，唔係做得好先去做，係要一直做先會做得好，我覺得你應該要尊重一下我哋，真係需要起曬弶咁樣咩?」碟仙緩緩說出
「總而言之我嘅決定唔會改，我會同你哋負責老師講。」副校獨自離開，只留下在教員室外排成一行站著的我們。
自剛才起鍾婉恩便沉默不語，我向她搭話也絲毫不理睬
碟仙一直說著早上的故事，言行中充滿致歉「對唔住……」
「你叫我起身，應該唔係淨係道歉吧?」我輕輕一問
「關於劇本，我已經諗到點樣寫一個新嘅，你成績咁好，我需要你嘅文筆同埋作文架構技巧!」
「副校唔批嘅話我哋直接踩上去校長度，如果有新劇本嘅話可能仲有啲機會!」碟仙不斷說著自己的想法
「但係可能性好細，先論你劇本質素如何，淨係用呢樣嘢搵校長嘅話……」
「咁都要試下㗎，你見到佢嗰個樣，你忍心咩?」碟仙說罷，鍾婉恩失望的神情瞬間在我腦海中湧現。
我在腦海中迅速思考「我嘅意思係，唔止做咁少……有邊個對住校長有話語權……佢講嘅話會考慮……」
「家長!」我與碟仙同一時間說出
「要把握時間，我負責搵家長寫一封請願信，你控制我隻右手，將你嘅故事寫曬落嚟先!」
整個晚上我們廢寢忘餐，左手我不斷用著鍵盤，簡單把事情原委說給原本有連繫的家長，以及家長教師會主席，不斷與他們溝通希望他們可以幫忙寫一封請願信。
我的右手被碟仙操控不斷在白紙上寫字，直至晚上兩點多我那部分已經完成，碟仙似乎也把他的故事大概寫得七七八八。
「所以呢個故事係講咩?」我拿起他的草稿一下，辛苦的看著凌亂的字跡。
「用返佢哋嘅基底，改成為人鬼戀嘅故事，撇除所有肉體接觸，主要著重於精神交流，主要講兩人互相嘅正面影響。」
「……壞學生玩碟仙愛上女鬼……想叫幽靈幫佢作弊，卻被教導……對抗社會變咗對抗命運……咁樣嘅話的確可以……」
我仔細審視著他的草稿「女主角叫鍾隨心……嗎。」
「你點樣係幾個鐘諗到呢啲橋段?」我把草稿整理好放在枱頭。
碟仙自信的說著:「我天資聰敏。」我餘光瞥著他，儘管看不見他容貌，但感覺他似乎在懷緬什麼……
「我要瞓覺先，我而家講啲嘢你執一執!同埋將佢變咗PDF編出嚟，聽日我去搵校長負責講!」說完後，碟仙比出一個Ok的手勢，我便漸漸失去意識。
轉眼間鬧鐘響起，碟仙用著疲倦的聲線呼喊著我，醒來後，剛才的凌亂草稿已經變成井然有序的劇本，我簡單檢查一下，昨天的叮囑他有很好的改善，甚至質量超出我預期……
他真的很用心，是因為他的錯而愧疚嗎?
但他有所隱瞞是一個事實，你為什麼要那麼拼命做? 碟仙?
整個早上他都毫無反應，這是第一次出現的狀況，也許他真的是太累了，這樣今天我是不是可以盡情思考我的疑慮……
不過首先要解決的是……
到了學校的我，輕敲校長室的門「入嚟。」一聲呼喚後，我深呼吸打開門走進去。
校長坐在自己座位上輕輕一笑，而他的臺前站著數道熟悉的身影……「你哋學會咁團結，我真係好欣賞。」
「你哋……」我呆滯了片刻
除了鍾婉恩以外的成員，包括最被動的毛月永，以及新來的梁晨光與陳明慧，幾乎全部人也有同一個想法，於更早的時間便來到了校長室。