【愛情/奇幻】《只能用餘光看見你》第二部曲:暗戀的餘光: 3
班主任走進課室，身後跟著了一位素未謀面的女學生，她身材小巧，把身子轉向我們時，坐我旁邊的錢卓鏗不禁發出異常大聲的讚嘆，惹來旁邊數人嘲笑。
「你有女朋友㗎喇。」我輕輕提示他
「欣賞下啫，你有幾可會遇到呢種質素嘅女仔?」不只是錢卓鏗，整個班級的男生似乎也在與旁邊的人碎碎念。
直至老師敲了三下桌子，課室才恢復安靜。
「呢位係新嚟嘅插班生……」聽著老師的說話，我重新看向那位女學生，的確，皮膚如此白嫩而且瞳孔炯炯有神的人，的確不太常見……會是混血兒嗎，看起來又不太像。
在我思考的過程中，那名女學生開始自我介紹，轉身拿起粉筆變寫下自己的名字「各位好，我叫常日羲，你哋可以叫我啊曦或者日羲~」
「……」碟仙又再露出一副難以置信的態度
說起來這位女學生的自信也非常少見，沒有因為到了陌生環境而怯懦，反而像是一個觀察者，目光不斷掃視在場的同學，最後把目光放在我身上。
她那悠然自得的態度，總覺得像某一個人……
「咁樣你就坐……呢度啦。鍾婉恩就麻煩你幫一幫呢位新同學。」在老師的分配下，常日羲坐在了鍾婉恩另一旁。
無意間聽到她們對話，似乎她們都很投契，接著的小息或是午息他們都影形不離，就像我與她初中那是一樣……
「有冇覺得有少許變態呢。成個跟蹤狂咁。」 碟仙嘲諷
「只係我觀察力強，而且咁啱出現喺同一個地方啫。」
「不過佢都犀利，常日羲顏值都算係接近滿分嘅女神級，喺佢身邊都毫不遜色，而且心地仲咁好，難怪你咁鍾意佢嘅。」碟仙讚嘆了一番
「呢樣我唔否認，但係你又知佢心地好?」我視線移向他
「我……識讀心㗎嘛你唔記得喇?」感覺他總是有事情瞞著我。
轉眼間又放學，我站在活動室大門前，久久未開門。
「我一陣用咩表情望住佢好? 我頭髮有冇亂?」我稍為窺視一眼裏頭，她獨自一人坐在裏頭看著書。
「呢啲嘢唔使諗咁多，入去啦。」碟仙已經是第三次這樣說，顯然已經有些不耐煩。
「一係你幫我……?」
「渣㗎你。放鬆!」碟仙操縱著我的身體，此刻我們就像用兩個手掣控制同一個角色一樣。「放鬆啲啦，我行唔到路呀!」碟仙拍一拍我的臉。
「你畀我去廁所冷靜一下先。」我緊張地說的同時，強行控制身體離開。
忽然身後的活動室大門被推開，鍾婉恩猛吹一口氣在我後頸「我望咗你好耐，捨得入嚟未?」
那一瞬間，我腦海中湧現出一道身影，但很快亦都消失不見，碟仙睜大雙眼，但又立刻收起了情緒，似乎不想讓我看見他的記憶。
他俐落的轉過身，當我察覺到的時候，我已經控制不到我的身體，這刻的他佔據了身體的主導權，幸好，他沒有對我不利的心思。
「我就係企喺度等你邀請我咋嘛，咁耐先理我，差評。」碟仙脫下眼鏡，伸出拇指畀著倒讚。
鍾婉恩只是冷臉看著，沒有說什麼，直至走到房間的中心她才緩緩開口「其實有啲嘢我想同你講清楚。」
「突然咁講我好驚㗎喎。」碟仙回應著
「放心唔係啲咩重要事……我……只係希望你唔好對我有奇怪嘅幻想。」
碟仙沒有理會她的臉容，依舊開玩笑地說著「你點知我當你係外星人?」
「你可唔可以唔好咁幼稚? 你平時都唔係……」鍾婉恩回頭看著我們的臉龐，說話停頓了。
「我都冇話過溝你，所以你冇得拒絕我。」碟仙認真的注視著鍾婉恩。
碟仙繼續說著「如果，我要追一個人嘅話，點樣都阻止唔到我。今世唔得就下世，下世唔得就就下下世，再唔得就下下下世!你點避開都避唔到㗎喇。」在她的瞳孔我看見自己的面容，現在我才知道，原來我也能擺出如此熱切真誠的表情。
「……前題係，我要追你嘅話。」
鍾婉恩顯然被他的回應弄得有點驚訝「……你係邊個?」
她肯定是意識到不妥吧，我心中默念著「佢平時好鍾意研究靈異嘢，你小心啲唔好畀佢發現你的存在。」
「咁咪幾好囉。」碟仙默念回覆
「唔得，你話過要幫我追佢，既然係咁，點可以畀佢知?」
「所以你係咪應承嗰個條件?」碟仙問我
我搶回身體主導權，重新帶回眼鏡「冇嘢，只係突然想做下戲啫。」
「你唔係電影學會主席嚟㗎咩? 頭先表現如何?」說罷我心底隨即默念著碟仙的魯莽回應。
鍾婉恩像是在猶豫什麼，低下頭片刻後才緩緩開口「……頭先嘅嘢，你當我冇講過。」
秋淑儀一直面無表情在門外偷聽，從手機倒影當中整理自己的容貌後，她打開活動室大門「唔好意思又畀人罰，遲咗到~」
「唔阻你哋，咁我走先。」我輕輕說道，慢慢步出活動室，開門當下與錢卓鏗迎面相撞，他手中的稿紙散落一地。
我一聲抱歉後連忙幫他撿起地上的紙，驟眼看似乎是他們的劇本。
「差啲唔記得咗……你都係電影學會嘅添。」我看了一眼錢卓鏗
「好快記得㗎喇，等我過多幾年出咗名，乜嘢那些年呀，言葉之庭嗰啲愛情都唔夠我呢套玩。」錢卓鏗自信的說著
「有目標係好事嘅，但係小心啲由愚昧之巔跌落嚟嗰陣……爬唔返起身。」我溫馨提示道
「喂，易天恆」鍾婉恩急步來到門前。
「你要唔要加入電影學會?」她提問的當下，其餘兩人亦有少許驚訝。
「我……」
碟仙用著我把口說出「好呀。」
「呢個係可以接近到佢嘅好機會!」碟仙凝視活動室裏的眾人。
「你哋傾緊乜嘢?」毛月永師兄捧著一堆器材進門。
碟仙略顯驚訝不禁用我的嘴說出聲「你都係電影學會㗎?」
「幕後，打燈。」毛月永回覆著
秋淑儀忽然把我推到門外「你喺出面等一下先， 我哋要開內部會議！」
猛得一聲關上門後， 我只能無奈的站在外頭等候著。
「你真係要畀佢入嚟？ 你之前講過唔想佢參加㗎喎？！」秋淑儀降低聲量與鍾婉恩說著
「我突然之間改變主意……而且我哋都突然之間缺人，唔係咩？」鍾婉恩言行間無奈的看著錢卓鏗。
「嗰樣嘢我都唔想嘅~ 但係……係咪即係你要同佢講？」錢卓鏗問著
「我暫時唔想講住， 所以……」鍾婉恩眼神有些黯然
「我哋明㗎喇， 你決定咗嘅話…… 我哋都冇咩嘢講。」秋淑儀微笑著說
毛月永事不關己的弄著攝影器材「咁樣Set，可以嗎?」
「點解你永遠都可以冇反應嘅啫?」秋淑儀被他弄到哭笑不得
這時候獨自在外頭等候著的我，腦海中正在與碟仙談判。
「我唔覺得有能力可以幫你，我對於玄學靈異嘅認知係零。」我如實說道
「不如咁樣，一個星期你分三日畀我，我用你個身體自己搵線索，過程順便幫你同佢拉近距離。」碟仙說道
「咁樣好影響我學習…」正當我想這樣回答時，腦海卻閃爍了一些畫面。
「我愛你」我與她互相對望，站在沙灘中深情的看著對方「我都係。」
那些預知畫面在我腦海中揮之不去，這一刻我動搖了，快速思考一番後……
「可以，不過有限制，每日唔可以用超過一百蚊，做咗啲咩要做個簡單紀錄，盡量維持我嘅形象同埋人際關係……遵守法律……」
「得啦，意思我都明!但係可唔可以多少少錢? 你諗下如果嗰日鍾婉恩約咗你出街……」
「一口價，300。」
「合作愉快!」
「我可唔可以問一個問題?」我忽然記起
「?」
「其實你叫咩名?」
「……叫我，喂，得啦。」 碟仙淡然一笑。
「既然你唔想講，唔逼你。」