市民與公主[短編]: XX. 離別(5)

6個月後。

「1位個邊。」
有個女仔入咗間茶餐廳入面，佢坐咗係其中一個卡位就攞係餐牌揀食咩。

而家並唔係繁忙時間，所以呢間茶餐廳都未有好多人，淨係坐咗大概6成位左右。

個女仔睇咗一陣餐牌之後就舉手落單。

「係！嚟緊嚟緊！」




「靚女食咩......」

我望到佢即刻當場呆咗，我用咗一陣冷靜自己。

「靚女食咩呀？」我從袋中攞出一本簿仔同一支筆準備寫野。

「阿俊...」

「…」





「好耐冇見，好似都半年有多係咪呀，最後一次見已經係聖誕派對個日。」
「你近排點呀？」

「…靚女我諗妳認錯人喇，我係叫阿俊，但我應該唔係妳識嘅個個人。」
「想食啲咩呀？我地個個餐都好抵食，妳可以試吓我地個廚司推介揚州炒飯喎。」

「你係要扮唔識我？我都願意返嚟搵返你，點解你唔肯面對過去呢？」

「或者我曾經係識妳架啦，但唔好意思我唔記得晒，我份人係特別善忘架，所以我小小事都特登寫低佢。」
「妳係咪見我地個個餐都咁吸引決定唔到呢，不如我幫妳決定吖？食A餐幫妳轉揚州炒飯，飲凍奶茶少甜少冰。」





「嗯，唔該晒......講大話，明明就仲記得......」

——————

「俊！5號枱客埋單，去執執張枱。」

「收到！」

張枱除咗碟、餐具仲有杯之外，仲有一張紙。
上面寫住「俊：今晚10點舊屋樓下公園見」

我輕輕唉咗一口氣，點解......
我知我心入面真正嘅諗法，之但係......





「快手啦俊！」

「係係係！」

我隨手將張紙連埋啲垃圾順手就掉咗。
當日返到屋企而經唔記得咗件事。

——————

第二日佢又嚟咗，同樣叫咗一模一樣嘅食物，野飲。

今次佢係枱上面放嘅唔再係一張紙，而係一封信。

今次我終於抵唔住好奇心，將封信摺埋袋咗落褲袋。可惜嘅係我返到屋企嘅時候太攰，冇沖涼就直接係梳化度訓著咗。





直至到第二日，當我諗住係返工前沖個靚涼嘅時候先記得呢封信嘅存在。

就睇下半年冇見嘅佢，見返面會寫啲乜嘢俾我，不過應該已經放低咗之前件事，唔係都唔會肯嚟見我。傷害人同被人傷害，竟然係傷害人個個唔願面對。

睇咗一陣之後，我嘅淚不自覺地如泉湧般流出嚟。

估唔到...真係估唔到...

我真係好痛恨我自己！

望一望個鐘，而家係早上11點幾，仲趕得切嘅。
我換咗套衫之後就即刻出發。

「司機，機場唔該，盡快。」一上到的士即刻報上目的地。





而家嘅我真係心急如焚，想即刻就到達機場。幸好天公做美，一路上都唔塞車。

一到機場俾咗錢就二話不說落車去機場尋找佢嘅身影。但其實咁樣猶豫大海撈針，我淨係知佢係下午飛，同埋個目的地，完全唔係準確時間。

不過我都會搵。

但我都蠢唔晒，間唔中睇下航班表，睇吓係T1定係T2，縮細個搜索範圍。

可能佢冇寫到準確資料就係唔想我去搵佢，但點解要寫今日飛呢，不如直接唔好寫。
所以我直覺佢係俾緊機會我，同時想睇吓我哋之間仲有冇緣份。

肯定有！

唔係有機會先去做，而係做咗先會有機會！





今日嘅我仿彿有異能，就係超強嘅耐力。
我來來回回一直係T1同T2間走，一直嘗試尋找住佢。

但越搵我就越感絕望，越感沮喪，隨住時間越嚟越夜，我心情就越急，時間已經無多，我一定要加把勁。

——————

夜幕已經落下，外面嘅天空已經全黑，而家已經係晚上9點37分。

航班表上面顯示住前往目的地嘅航班得返一班，時間係23點20分。

時間飛快，轉眼間已經嚟到23點30分。

我忍唔住流下眼淚。

竟然...最後一次機會都......

…阿詩...