市民與公主[短編]: XIX. 離別(4)

但係我就忘記唔到佢，心入面一直都有佢係度，令我耿耿於懷。嘗試過做其他嘢嚟分散注意力，逐漸忘記佢，但返到學校一見到佢就會喚起返佢嘅回憶。

咁咪永世都忘記唔到，有時忘記真係一種異能，唔係個個人都有能力忘記野。

叮！

收到電話我即時衝去醫院，去到嘅時候見到婆婆訓係床上面。

「今日你婆婆病情再一次惡化，幸運地我地成功搶救，你婆婆佢暫時平安。但...佢情況越嚟越差，真係真係要好好心理準備。」





「嗯。」

到底...到有幾多日。要我做好心理準備，但當件事真係嚟做，我當下都未必真係反應得到。

——————

「俊，你尋日做咩唔返呀？」一入到班房，老師即刻問我。

「我...病咗。」





「嗯，記得俾假紙。」

實質係我尋日起身勁頭痛，咁頭痛都係病嚟嘅。

今年我冇參加到比賽，一嚟冇人推我上去，二嚟我而家俾全校唾棄，冇理由仲要上去。

但今年唔同嘅係，女神有上到去參加比賽，唔知點解，往時佢都冇，但今年有。

睇嚟係因為我，拋低咗個包袱之後，終於可以輕輕鬆鬆，開開心心咁生活。





台上嘅主持介紹後，女神同佢嘅其他朋友出場，佢地表演嘅係跳舞。

我冇心機睇落去，即刻就走咗。

我唔想又再次鍾意佢，唔想鍾意到無法自拔，明明我決心係要忘記佢！

個銀包，係佢送嘅，要放低就要拋棄晒所有野。

我攞晒啲野出嚟就掉咗落廁所垃圾桶，然後等到班房開派對先上返去。

我係度可以話係有啲掃興，其他人個個都咁開心係度玩，而我就係側邊獨自痛苦。

不過我都唔起眼，都冇所謂啦，影響唔到佢地。

因為今次係我地係呢間學校過嘅最後一個聖誕派對，所以放學之後老師會要我地留低一低影相。





不過算啦，我對呢間學校會歸屬感，對班同學又唔會記掛住，多我一個唔多，少我一個唔少，係我自己選擇離開。

今日之後就係假期，我要用呢個時間盡力將佢忘記。

——————

即使隨時都做好心理準備，真實來臨嘅時候都係會承受極大嘅衝擊。

當我去到醫院嘅時候，我真係完全崩潰，我成個世界都突然崩潰。

真係好笑，以為過年時會有希望，但仲未過個天就終結你嘅幻想。

而家我真係咩都冇晒。





離開咗醫院我都唔知做咗啲咩，淨係知......

「阿俊？」

朦朦朧朧之中我聽到有人叫我，但係係邊個？

「阿俊？你點呀？對眼喊到腫晒嘅？」

睜開眼睛，想望清楚面前係邊個，但視線好模糊，完全睇唔清。

「你飲酒嚟呀？成地啤酒罐嘅？」

但呢把聲好熟，係邊個呢？

「我扶你起身，返屋企。」





阿詩？

「唔好理我！」

下意識地甩開佢隻手，但呢一下動作令我由長櫈上跌落地。

——————

呀！個頭好痛！尋晚發生咩事？

入到廁所照照鏡發現自己對眼腫晒，到底尋日發生咗啲咩事？

我盡力回想尋日嘅事後先記得，我婆婆嘅事。





係，我已經可以唔使再去醫院探婆婆，咁我人生就𣊬間多咗好多時間。

——————

間屋都差唔多一年都冇執過，呢一年都非常忙，日日都早出晚歸，返到嚟都即刻訓，都唔小心當咗呢度係酒店。

其他人就係出面慶祝緊新年，而我就係度執屋。

執好個客廳，執好婆婆同媽媽間房，pack好晒要嘅野同唔要嘅野，先知道都來夜晚，既然咁就第日先再執我間房。不過都已經用咗兩日時間，即係前後都要用三日時間。

今日一早我梳洗完就開始執我間房，開工！

「咦？」執執下發現櫃嘅深處有一個盒，我幾時有擺個盒係度？入面又係裝咩架？

打開先至發現裏面裝嘅都係我同佢之間嘅回憶。

明明都已經忘記咗，而家我又突登摷返啲記憶出嚟回想返，我真係犯賤。

忍唔住好奇心，我仔細查看住入面所有野，禮物、相片、信。

冇錯，入面係有信，係好老套，亦都唔合時宜，但就係有保存價值。就好似書同電子書咁。

睇嘅過程中，漸漸地，唔知點解我會喊咗出嚟，真係唔知。

好喇，都已經唞夠，要繼續做野。

咁，到底係掉定唔掉。

既然我地都已經結束咗，就無謂再記起，就埋葬係腦海深處。

我放低係「掉」係區域中記返房繼續。

係喎，差啲唔記得。

我攞出手機打開相簿，刪除舊照片。

處理好手尾，先能夠踏上忘記嘅路途。

希望佢都可以清空晒同我一齊嘅黑記憶，清空我，開始新旅程。