市民與公主[短編]: 阿詩給阿俊的信

俊：

好耐冇見，你近排過得好嗎？我好開心可以見返你，不過見到你嘅反應好似唔係好願意見我咁。唔緊要啦，我都係有段說話好想同你講。

我一直都知道你好責任感自己當初所做嘅事，好內疚傷害咗我，而我亦都係傷心咗一排，我冇諗到你會咁樣做。不過諗返轉頭我都有做得唔好嘅地方，明知到你個排心情比較差，亦都觀察到你愁眉苦臉咁，有野煩惱緊，但我都仲逼你做啲你唔想做嘅野，無視你嘅意願，我都好內疚。都知道你係被憤怒沖昏頭腦，所以先沖口而出講咗個番說話，知道你唔係有心，所以開咗學一直都想搵機會同你好好咁傾下，不過你就一直都避開我。

估唔到嘅係，之後突然收你嘅訊息，當下我真係好興奮，會唔會係你想同返我一齊呢，個時我係真係咁諗。不過萬萬都估唔到，你係要同我分手，知道咗我成個人真係崩潰，曾經諗過你當時嘅說話係咪講真？係咪真係你嘅心底話？但因為我仲係好鍾意你仲係好愛你。不過我都係繼續等繼續等，希望我地緣分未了。

十二月個時雖然見到你冇睇，但係咪好驚訝呢？中五個時你有講過想我都上台表演下，不過個時嘅我未夠膽，所以冇陪到你上去。直至到中六，發生咗呢件事之後，我希望俾你見到我另一面，亦見到我願意為你作出嘗試，希望你見到我更多嘅魅力，吸引到你，可以令你回心轉意。不過都好開心，係你令到我有呢一個咁美好嘅回憶。





然後就冇諗到個日會係最後一日見你，個日之後你都冇再返嚟，畢業禮都冇嚟。

及後從你朋友阿金聽返嚟，先知道你發生嘅一切事情，你婆婆，你家人。真係好對唔住我冇顧及到你嘅心情。亦都好對唔住曾經話過會陪你經歷一切，面對一切，做你嘅後台，但結果我兌現唔到承諾。知道你當時嘅心情，我相信你當時所講嘅並唔係你嘅真心話。都知你當時以為我同阿樂一齊咗，見到佢各方面都俾你好，所以就完完全全放棄晒，真係好笑。只想講你地男仔真係好蠢，有冇諗過點解我當初會揀你，而唔揀佢？我記得有同你講過。我同阿樂冇一齊到，只係學業上同埋畢業禮度我地有野要做，先會多咗接觸，你諗多咗喇。我一直都鍾意住你，一直都等緊你架。

佢仲有講到你嘅近況俾我知，你搬咗屋，去咗茶餐廳做野。以為見返你，我地之間有希望，但睇嚟並唔係。尋晚我係公園度等你，一直唔見你，一見堅信你會嚟，結果空歡喜一場，只係我一廂情願，或者我地緣份已盡？

或者你仲未面對到我，仲係原諒唔到自己。但我想同你講，我一早已經原諒咗你，亦都一直等緊你。同你一齊嘅時間亦係我一生人中最幸福嘅回憶，我會好好記住。

聽日晏晝我就要離開香港，去加拿大讀書，開始新生活。你都要努力！我地一齊為新生活加油！





詩