市民與公主[短編]: XVIII. 離別(3)

上次之後，我都冇再收到過婆婆病情有再惡化嘅情況，佢嘅精神都一樣，冇差到，但都冇好過。

我亦像往常一樣，每日都會去醫院探佢

今日亦都一樣，但今日佢向我提出咗一個好過分嘅要求。

「乖孫，我想見下我孫新抱仔，可唔可以帶佢嚟俾婆婆見多次佢呀？」

「但係...但係最近佢比較忙，應該...」





「唉～我想臨走之前見多佢一面。」

「婆婆，妳一定福大命大，一定仲有好長命架。」

「希望啦。」

我冇可能滿足到佢嘅呢個願望，我地而家都已經分開咗，仲要係我親手葬送呢段關係，冇可能挽回到。

我都唔能夠同婆婆講出事情嘅真相，一嚟講咗我知道佢會好傷心，因為佢真係好鍾意女神，成日都講起，密到我都開始有啲煩嚴。二嚟我怕講咗出嚟會刺激到佢，心跳加速，血壓上升，令病情再惡化落去。





分手後已經過咗一個月，佢並冇任何回應，我亦都唔知佢有冇睇到，訊息仍然係保持住雙灰剔。

而係學校佢都係同往常一樣，同朋友有講有笑咁。

而我就變回一隻不起眼嘅螻蟻，係學校中冇任何地位可言，係不值一提嘅平民百姓。

——————

「喂！近排女神同男神行得好埋喎。」食飯時間阿金同我講。





「係咩，咁又關我咩事。」我淡淡然咁同佢講。

「講下俾你聽啫。」
「不過佢哋一齊真係郎才女貌，男嘅貌若潘安，女嘅美若天仙，真係天生一對。」

「咁咪好囉。我去便利店買啲野，你係度等我一陣。」

反正都唔關我事，同邊個一齊隨便佢。不過男神先至係配得起佢，都要恭喜佢搵到好歸宿。

然後就到我，我都要徹徹底底忘記佢。

——————

今日嘅午飯時間就班際籃球比賽，而阿金係其中一個選手，我就唔係，所以今日我係要一個人出去食飯。我都約定咗阿金返嚟睇佢比賽。





而家得返我一個我都唔知道食咩好，隨便去便利店買個三文治食完再周圍行吓算。

途中俾我再次經過個間日本餐廳，第一次同佢出街就係呢度，一直佢都想再食多次，不過到最後都冇呢個機會。或者佢可以同男神食嘅。

行完街返到去學校就徑直行向操場睇吓場籃球比賽進行成點。現場情況比我所想嘅更誇張，有非常多嘅人係度圍觀，我而家先知原來咁吸引嘅咩。

睇一睇個分牌，目前我地個班落後緊成10分咁多，睇嚟要贏都有啲難。

而且我唔覺意仲見到女神都有份睇，佢咁唔鍾意運動都會睇，真係稀奇。

「阿樂！」
下一秒全場都係度大叫男神個名，原來呢班觀眾嘅目的並唔係場比賽。

睇嚟我都搵到唔鍾意運動嘅女神睇呢場比賽嘅目的。





男神攞咗分，兩邊嘅分數又再拉遠咗，睇嚟我都冇需要再睇。

記得要掉晒同我嘅所有黑記憶，忘記我，毫無迷戀咁離開。
離開我一定要幸福咁生活，唔好好似係我身邊嘅時候咁痛苦。