市民與公主[短編]: XV. 夢魘(5)

因為我同婆婆兩個人相依為命，冇其他嘅親人，親戚又一啲都唔親，我都冇同其他人講，所以一直以嚟都係得我去探佢。

比起最初，佢情況好轉咗，由深切治療部上返去普通病房。可惜嘅係佢精神都唔係太好，好多時佢都訓咗覺。
有時我都好痛恨自己點解唔夠心思細密，點解唔再關心佢多啲，如果有嘅話，都唔會淪落到呢個地步。

基本上每日一放學我都即刻過嚟，希望可以盡快得到好消息，而結果就係每日依舊。

「乖孫，你又嚟咗呀？」

「嗯，今日情況點呀？」





「咪都係咁，精神不知幾好，佢地又唔俾我出院。」

佢講就係講，但係人見到都知佢面容變得好憔悴，講句野都冇力，真係有精神咩？

「而家都夜，你都陪咗我好耐，返屋企喇。」

「但係...」

「唔好但係喇，你返咗成日學，放咗學都仲要過嚟，你都好攰，返去休息下啦。」





「嗯，咁妳好好休息啦，我走喇。」

我的確係真係好攰，返到屋企都冇心情煮飯食，應承咗阿詩要做嘅嘢我又做唔到。
我估到時阿詩應該會真係發嬲，一齊咗咁耐都冇見過佢嬲。

每日都係咁樣度過，返到屋企沖完個涼就瞓，打開書本嘅力氣都冇。

「今日都唔同我溫呀？」放學阿詩問我。





「嗯，對唔住。」

「其實你係咪有啲咩緊要事要做？或者有野煩緊呀？講出嚟睇吓我幫唔幫到你？」

「多謝晒，不過...我真係冇事。好喇，我走先喇。放心啦，我返到去會自己溫架。拜～」

佢本身都已經有好多野要煩，我唔想佢要同我一齊唔開心，唔想又要增添佢嘅煩惱。
而佢都好似明白我一樣，同我一齊嘅時候都冇咗講呢件事，亦都講好多好有趣嘅野，都係我面前笑多咗，我明白佢，想為我帶來一啲正能量，想感染我令我可以向好個方面諗。

但唔好意思，我做唔到。
我知我婆婆嘅身體狀況係點，佢本身都有慢性病，令到個病情再嚴重啲，亦都更難痊愈。

「咦，你今日又嚟咗呀？」呢個時候一個護士行過嚟。

「呀，係，妳好，平時辛苦晒妳同其他醫護人員照顧我婆婆，以及其他嘅一眾病人。」





「嗯，好難得會有家人成日嚟探老人家，呢間房嘅其他病人都好少有人嚟探佢地。
「所以你真係好有孝心，婆婆有你呢個孫真係幸福。」
「婆婆佢而家要做檢查，都要做幾長嘅時間，不如你返去休息下，聽日再嚟？」

「好，辛苦妳，再見。」

唔知道幾時婆婆可以出院，幾時可以好返，幾時可以再好似以前咁同我一齊玩。
一直都希望聽日就係，一直都希望一返到屋企就會見到婆婆，一直都希望一起身呢一切都係夢，我可以醒返。

如果我冇出現，呢一切會唔會變得唔同，媽媽可以健健康康同婆婆快快樂樂一齊生活。

仲有唔夠一年時間我就畢業，到時就可以出嚟做嘢，雖然做咩仲未知，但至少我可以全職做野養活婆婆。