市民與公主[短編]: XIV. 夢魘(4)

——————
——————

「呢個女人邊個嚟架？！」一個女人攞住部電話質問男人。

「做咩睇我手機呀？！尊重下私隱好喎！」男人從女人手中搶回屬於佢嘅手機。

「個女人邊個嚟！」女人繼續質問。

「同事呀！得未呀！」





「同事講野會咁露骨咁肉麻？！又用埋啲心心？！」

「又要問又唔信！費事理妳！」

「你出去偷食你對唔對得我住呀？！下！」

男人已經入咗去廁所，得返女人喺度獨自呐喊。

一個小朋友從房嘅門隙中偷看一切情況。





——————

「老婆～老婆！衰婆妳去咗邊呀！」

老公起身打開房門，見到老婆訓喺床上。

「死八婆！訓訓訓！唔知我返咗嚟咩？！」

「唔好咁大聲啦，個仔啱啱訓咗咋。」





「妖！」男人隨即一手打向女人面上。
「叫咁耐都唔應！知唔知我返工好辛苦架！」

「你又飲酒嚟呀？」

男仔喺床上望住呢一切事情嘅發生。

——————

「小朋友，你鍾意媽媽多啲，定爸爸多啲？」

小朋友喺人群中被人問咗一個咁嘅問題。

「...媽媽。」





——————

「俊仔，今日開始你就同婆婆一齊住好冇？」

「媽媽呢？」

「媽媽...媽媽佢要工作好忙，不過放假嘅時候會陪俊仔你架。」

俊仔就跟住婆婆去到一個新屋企。

——————

吱呀～砰。





媽媽終於都返咗嚟。

「媽咪～」呢個時候未訓嘅俊仔出嚟迎接久時未見嘅媽媽。

「俊仔，做咩咁夜都未訓呀？」

「媽媽，做野係咪好辛苦呀？」

「唔辛苦呀，見到俊仔肥肥白白健健康康，一啲都唔辛苦。」
「好喇，去訓啦，聽朝仲要返學架。」

——————

俊仔跟隨婆婆入到一間房，床上訓住一個人，被白布冚住。揭開後，就見到媽媽。





「成日都叫妳唔好咁辛苦，唔好成日掛住做野，而家想見個仔都見唔到...」

「俊仔...以後就得返我同你咋...」

——————

「俊仔，唔好溫書住，過嚟食飯先。」

「嗯！唔該婆婆！」

「近來網上傳有個人碩士畢業，但係出到嚟社會見咗幾份工都冇一份見得成。今日我地有幸邀請到呢個人嚟同我地做個訪問...」電視正播緊新聞。
「…係呀，咁辛苦用咁多錢咁多時間咁多精神考個碩士返嚟，以為畢業可以搵到份好工啦，點不知一份都搵唔到！唔通做便利店做快餐店咩！...而家諗返都唔知當初咁辛苦讀個碩士返嚟做乜，不如中學一畢業就就出嚟搵錢，仲搵得多過而家畢業嘅人呀！...」電視中個位碩士畢業嘅男士講。

——————





而家俊仔一個人喺屋企廚房，一路望住手機，一路煮飯。

「嗯...可以再淡啲。」佢自言自語。

到夜晚。

「婆婆，今晚開始我煮飯俾妳食！」

——————

「俊，今日要唔要出嚟踢波呀？」俊仔手機傳嚟一個訊息。

「唔喇，我要溫書。」俊仔傳咗個訊息就繼續煮午餐。

「書蟲，唔好再再讀書喇，出嚟玩下啦～」呢一日俊仔又收到個短信。

「俊仔，做咩放假都唔出去玩下呀？」呢個時候婆婆喺隔離講。

「唔啦，我都想同婆婆妳喺埋一齊多啲。同埋我想盡孝心照顧妳，我細個妳都照顧咗我咁耐。」

——————

我現時望住塊鏡整理衣裝，然後攞起書包就出房。

「婆婆我而家返學喇。」

終於都上到中學，我挨多6年就得，6年啫。

——————
——————