市民與公主[短編]: XIII. 夢魘(3)

放完個假返到嚟又要繼續上堂，又要繼續奮鬥。

「今日我想去返個間餐廳食飯。」午飯時間阿詩突然提出呢個要求。

「但係未必有位個喎。」

個間餐廳就係我地第一次一齊食嘅日本餐廳，個次僥倖去到嘅時候有位，但之後就冇咁好彩，去到嘅時候都冇晒位要等，然後我地就去其他餐廳。
經歷過一次又一次嘅失敗，我地漸漸放棄咗希望，之後直接去其他地方食午餐。

但唔知點解今次佢會突然興起想去。





「唔去點知呢？」

「我地咁遲先出嚟，冇可能有架，然後又要去便利店，然後妳又要唔開心。」

「咁我自己去得喇，你唔使陪我。」

「喂！唔好嬲啦，對唔住囉，我地一齊去啦。」我衝上前拖實佢隻手一齊行。

而結果當然就如我所料係冇位嘅，意味住又要去便利店食。





「係咪呢，話咗架啦，又唔信我。走啦，下次再嚟過囉。」

「妳有聽我講就唔使喺度食微波爐野啦。」我地坐喺附近公園食喺便利店買嘅微波爐餐。

「對唔住囉，係我衰，你啱晒，你有先見之明。」

「發咩脾氣啫，我都係講下之嘛，咁大反應做乜呀。」
「...妳要唔要試下我呢個飯？好好食個喎～」我遞隻匙勺去佢嘅嘴仔前面。
「嚟啦，擘大口，呀～～～」我都擘大個口，擘到大一大。





「嘻～真係好樣衰呀你！」

「笑返咪好囉，嚟！食飯！」

「我隻手唔舒服，喂我！」

「得得得！奴才遵命～」

今日如常地放學阿詩要上堂，雖然我堅決要留低等佢落堂，但佢三番五次咁堅持要我返去先，我都𢯎唔贏佢。基本上每一次都係呢種推拉狀態下我輸咗，但頭幾次我係贏嘅，我係真係有留低等佢落堂一齊返屋企。

基本上每次我返到去未到晚飯時間，都係訓覺多，但今日難得地開咗部電腦睇下有咩玩，發現到以前成日玩，但而家已經冇玩咁滯嘅遊戲。
自從同阿詩一齊咗就少咗玩，上到中五阿金突然發奮圖強，少咗個人就開都冇開過。

「阿金，你喺邊？」我搵阿金諗住約呢個舊戰友玩下。





「屋企，做咩？」

「打機？」

「唔喇，要溫書。」

「求下你啦，一場啦！一場咁多！」

「你唔洗陪女神咩？」

「佢仲喺學校上緊堂。」

「唉～咁好啦，一場咋。」





終於可以久違地同好朋友一齊玩遊戲，個感覺真係好懷念。
但開心嘅時候總覺得時間行得比較快，一場就咁就過去咗，我都要迫於無奈要放佢走。而我都要煮晚飯。

時間一日一日咁過去，每個星期除咗阿詩放學要留低個兩日外，有四日我都要同阿詩一齊溫書，一嚟有佢喺度我有唔識可以即刻問佢，二嚟有佢喺度可以篤促住我。
但我都係唔係好情願，不過有佢喺身邊我都好開心，每次見到佢嘅笑容都俾到動力我繼續撐落去。

之不過今日，係唔需要一齊溫書嘅日子，我就一個人踏上歸家嘅路途，順便諗下今晚煮咩，去超市買餸。
但係一返到屋企有樣野同平時唔同，就係我婆婆唔喺度，唔通佢落街同朋友吹水吹耐咗？
唔緊要，應該一陣就返，我訓一陣，轉頭再起身煮晚飯。

「鈴鈴鈴～鈴鈴鈴～」
電話嘅鈴聲整醒咗訓著嘅我。

「喂？…係...係...好吖好吖...好唔該晒。」收咗線我就二話不說落車即刻搭的士趕過去。





一去到上到去，
就見到我婆婆...訓喺病床上...插住喉...戴住氧氣罩...