市民與公主[短編]: XII. 夢魘(2)

日子一日一日咁過去，好快距離中五第一次考試得返1個月，我嘅時間亦都冇多。
阿詩亦好都體貼，明白我成日讀書會唔慣好辛苦，所以俾我做返啲我擅長我享受嘅事，就係唱歌。

我本身都有諗過邀請佢同我一齊合唱，但係佢又唔敢，再加上我聽完佢唱之後，發現佢嘅phrasing、tempo同常人好大分別，所以都無謂勉強佢。
而今次我就得個台風獎，金銀銅都冇。不過唔緊要，結果並唔係最重要，享受過程就可以。

成個聖誕假我地都即使喺一齊，雖然都只係出去玩過一兩日，其他日子都唔係。
其他日子佢一係就同爸爸媽媽一齊過，一係就留係屋企溫書。既然我留係屋企都冇野做，咁就同佢一齊過囉。

今次佢又再次著力係M2之上，真係戥佢辛苦。





「其實...我並唔想溫書，我並唔想考好個試。」我將心中收埋好耐嘅說話講咗出嚟。
「應該話，目前嘅成績我已經滿意。我目標唔係同妳一樣，我合格就得，我冇需要再努力再攞咁高分。我真係唔明讀咁好有咩用。」

「…」
我地兩個都默不作聲。
「咁...你畢業之後想做啲咩？又或者想讀啲咩？」

講真個句，我完全諗唔到，唔係我冇諗過，而係我有諗，但...好似咩都唔啱我咁。





「與其而家係度諗將來嘅出路，與其係度咩都都唔做，不如讀好啲，到時再諗都唔遲吖，然後成績好啲，想讀咩都得，就唔係人揀你，而係你揀人。」
「我明白你好辛苦，你好想同我出去玩，但而家考好個試先好冇？我要求唔係好高，你成績返到去以前咁，今次全部都合格好冇？然後再慢慢進步上去，永遠都唔會遲架。」
「考完個DSE我地再玩！上到大學我地再玩！」
「嚟，攬下錫啖先，然後唞一陣再嚟過。」

——————

今次考試我比起以前更落力，俾個交代自己，亦都俾個交代阿詩。

由考個時開始到派卷嘅時候我都一直好緊張，以前從未試過，從來攞到咩分數都係一笑置之，但今次唔同。




當我攞到份卷睇到個分數嘅時候，我真係唔知應唔應該開心。

「都話你得架啦，睇下！全部都合格！你肯努力係一定得嘅！嚟緊我地放年假嘅時候一齊出去玩下！」

「嗯！」
呢個分數先至係真正嘅我，原本嘅我，所以係應該嘅，係冇野值得開心。但係我又能夠重回正軌，又滿足到阿詩嘅要求，係有資格開心。
呢個感覺真係好矛盾。

呢個新年假我地除咗拜年之外，都有久違地輕輕鬆鬆好好咁玩返次。假期最尾個幾日我地走渾晒全港九新界，食咗唔同種類嘅美食，做咗好多我哋嘅第一次，例如係去博物館，唱K，做手作等等甚至係去離島，仲去咗我人生第一次去嘅主題樂園玩，雖然係好多人，因為假期，但我地兩個都玩得好開心。

但唯一依舊嘅，就係我打從心底裡唔想讀書。