市民與公主[短編]: XI. 夢魘(1)

中四升中五嘅呢一個暑假係我人生中最後一個仲有自由仲可以玩嘅暑假，所以我都好好珍惜呢個機會同阿詩玩。
佢雖然好著重成績，但係亦都願意陪我，呢方面佢真係好體貼。當然個代價就係下年開始要為DSE努力啦。

升到上去中五，明明係同一班人，但成個氣氛沉重到透唔到氣咁，可能係大家都知時間冇多，每個人都埋頭苦幹認真學習。
講真個句，我同呢個好似世界格格不入。係課堂上面，我見到其他人都喺度寫筆記、真摯咁聽老師講嘢、做書上嘅練習，包括阿金，得我一個係度四圍望發呆諗其他嘢。
得我仲停留係過去。

有時都會擔心將來，都會覺得自己比唔上其他人。

喺咁凝重嘅氣氛當下，唔單單係為咗已經升咗上中四中五嘅學生，亦都為咗即將面臨DSE嘅中六學生，都會有啲非學習嘅活動，等大家唔會太繃緊，可以適當放鬆一下，同埋為中六學生創造回憶。




例如係陸運會同埋學校旅行。
而唯獨係呢啲時候我先有返少少嘅歸屬感，同我個班係同一個體，我地係融洽嘅。

阿詩上到中五要比我讀多一科，就係M2，數學延伸部份，比起普通數學係難好多倍，我中四嘅時候有同佢一齊讀過，但係發現真係唔啱我，我亦都唔夠料去讀，所以我就卸下咗個重擔。
而我地M2係放咗學先讀，一個星期兩堂總共4個鐘，所以加加埋埋都少咗時間一齊談心。

我都係第一次見到佢會咁頭痕，咁若惱，皺晒眉頭，成績一向穩守第一嘅佢都會有野難到自己，見到佢咁我都唔好意思再增添佢煩惱。
不過要講嘅係，佢依然願意撥時間出嚟同我一齊溫書，願意教導我，同我講嘢嘅時候唔會有唔耐煩或者唔好嘅情緒，語氣都非常溫和。
俾著我遇到啲難題，一直困擾住我，心情會變差，脾氣會變差，耐性會變差。





所以我真係好對佢唔住，我一直都冇聽佢講，冇兌現我嘅承諾。

——————

「話咁快時間就得返一年多啲，我地就要考人生最重要嘅試。」真係感慨。

「嗯，到時...都唔知仲會唔會有機會見得返中學嘅舊朋友。」阿詩係側邊一樣都好感概。

「我相信有心見冇話見唔到嘅。」





「希望啦～不過我可以肯定我地一定會繼續一齊，可以朝夕相對！」

「一定！」
「...妳上到大學，有冇話想讀咩？」

「嗯...我想讀醫，呢個係我由細到大嘅夢想。做醫護救人真係好偉大！」
「你呢？」

「我？...唔知呀，入到大學先算啦～」

「實入到啦！比起之前，你而家有勤力溫書，繼續落去冇話冇可能嘅。」
「好喇！我地要去集合喇！今次呢個學校旅行真係好！時間定得好天氣唔會太熱或者太凍，又有得俾我地接觸大自然透下氣！」

對唔住，我呃咗妳嘅信任。
但我真係記唔到入腦，希望妳可以原諒我。