市民與公主[短編]: X. 熱戀(5)

叮！
手機傳來訊息提示聲，我確認咗之後就即刻落去樓下。

「上去喇。」

「嗯！」隨後我就拖住阿詩入去大廈。

「妳做咩事著到咁隆重呢？」

「話晒都係見你屋企人嘛，著得太隨便唔好嘅。」





「嗯...不過...我爸爸媽媽佢地未放工，而家屋企得我婆婆喺度。」

「唔緊要，你爸爸媽媽遲啲先見。」

上到去我就著手開始炮製今晚嘅晚餐，阿詩就參觀下我屋企同我間房，同埋同我婆婆傾下計。

話說點解阿詩會上咗嚟呢？
其實都係一時興起，今晚佢話想嚟，咁我OK，咁咪嚟囉，唔通唔俾咩。





「婆婆，呢度小小意思唔成敬意。」阿詩向婆婆遞出一個袋。

「上嚟使乜送野吖。」
「係呢，妳同我個孫仔識咗幾耐？」

「我同阿俊中一就識，一直都係同一班，但就係近來先一齊嘅。」

「你咁靚女又咁有禮貌，仲咁有孝心買野送俾阿婆，我個孫仔真係有福咯～」
「佢平時怕怕醜醜咁，朋友都唔多個，讀書又差。」





「都唔係嘅，佢都有好多優點，係平時冇點表現出嚟啫。」
「係呢，我想問阿俊間房喺邊？我想睇下。」

「哦，喺個邊，睇下男朋友仔間房都好嘅，咁我自己睇陣電視先。」

我間房比起阿詩間房更簡潔，得張床，書枱同衣櫃，冇咩多餘，仲有幾本書囉，但都係得幾本。

說時遲那時快，我煮好飯亦都食得，食完我都送阿詩返去。

「我婆婆係咪好煩呀？」

「都唔係吖，老人家係咁，多啲同佢地傾下計就得架喇。」
「同埋你媽媽都好靚女，你都生得好似佢。」

「嗯，多謝晒！咁聽日見啦。」





「嗯，記得溫書，得返1個月咋。」

返到去我婆婆就同我講咗句。
「人地好女仔嚟架，記得好好對人呀知唔知呀。」

「嗯，知架喇。」

——————

話咁快短短一個月就咁就過咗去，終於都迎來中四最後一次考試。
講真個句，我並冇十足嘅把握，係合格方面，呢一個月嚟我都冇好好咁認真溫過書，就算上堂都同以往一樣係冇聽。啲內容好似突然變深咗咁，自己睇都睇唔明學唔識，上半年我都可以淨靠自己努力學得識。

「你真係識？」





「嗯，我真係冇問題。」

「但我見你呢幾板來來回回掀嚟掀去睇咗好耐喎～」

「真係得呀，係有少少難度，不過我搞得掂。妳都唔好淨係顧住我，妳都要溫架嘛，妳係咪都有啲kick吖？」

「嗯...」

「咁一切努力啦。」
即使係同阿詩一齊溫書嘅時間，我都冇同佢講，明明有個學霸喺我隔離，全級第一，我都冇請教佢。
點解呢？尊嚴？我知我係庸才？我嘅目標？我無心向學？

結果派返啲卷嘅時候都一如我所料，幾乎炒晒，考嘅時候都預咗。
樂觀啲睇，6科都有2科冇炒到，4科炒咗嘅都只係差少少。
或者我都仲有啲天資嘅。





當時阿詩見到呢個分數係唔開心，但係都冇嬲我。
「你又話得嘅？」

「係囉，溫個時明明係得，考個時又唔記得晒，完全記唔到。」

「…唔緊要啦，仲有年半嘅時間，繼續努力就得，我亦會一直陪住你。」

對唔住，辜負咗妳，講咗大話。