市民與公主[短編]: IX. 熱戀(4)

一齊咗之後，我地每日都糖黐豆一樣，食飯又一齊，放學個時又一齊。
而今日阿詩終於都邀請我上去佢屋企。

「今晚我屋企冇人，你要唔要上嚟？」

「冇人？！咁咪做咩都得！」

「你唔好諗錯隔離，我想你上嚟陪下我咋～」

「都好吖，可以參觀下妳嘅閨房。」




我地各自返咗屋企先，我整理好晒所有野，做晒所有家務之後，傍晚我就出發去佢屋企樓下等佢接我上去。

同佢講我到咗，好快佢就著住居家服落嚟，淺粉色嘅T裇，白色嘅短褲仔，免仔毛絨拖鞋。
但我就係出街裝，明明都只係距離屋企幾步嘅路程，令我地有啲格格不入。

一上到去第一樣野就緊係去佢間房，沿路上都見到佢地一家三口嘅相，經過2間房，相信就係佢爸爸同媽媽嘅房。
至於點解我會知佢間房喺邊，就係佢已經同我講咗囉。

佢間房係純白色，裝修非常簡潔，有張書枱、化妝枱、書架同個衣櫃，房入面仲擺放住幾隻公仔，但我就並唔熟悉所以就唔知係咩公仔。
不過有一隻明顯係一隻兔仔，睇嚟佢都好鍾意兔仔。而個書架上面就放住3排書，當中都係愛情為主。





好奇心驅使下我打開咗個衣櫃嚟睇，色彩非常鮮艷，咩色都有，唔同我得黑色衫。款式亦非常多樣，有蕾絲，有透視，有露膊，有露腰，有連身褲，有連身裙，有長裙，有短裙。
呢個時候下面有一格，直覺話我知呢格係裝佢一啲比較貼身嘅衣物，睇唔睇好呢？

我想知佢鍾意啲咩款式，但係睇又好似好賤格變態咁。

「你睇夠未呢？」
呢個時候我身後響起阿詩嘅聲音。

「下...Er...睇夠。」





「睇夠就返出嚟。」
「我就嚟煮完飯，你睇住電視先。」

我好聽話出返去廳等佢，但而家電視又冇野好睇，所以我就入廚房睇下佢煮成點。

「妳係咪有病架，煮飯戴戒指，除咗佢啦。」

「係有啲唔方便，但我鍾意嘛～冇所謂啦～」

「我明白妳鍾意，但一陣跌咗落去冇咗就後悔啦，嚟啦，我一陣俾返妳。」

「保管好呀要。」
「不過你做咩入咗嚟架，出返去！」





但係出到去又冇野好做，所以我唔經唔覺就喺梳化訓咗覺。到我起返身都係阿詩叫醒我，個時餐飯都一早就煮好咗，亦都攞晒出嚟放喺飯枱度，有蒜蓉茄子，滑蛋牛肉，玉子豆腐，味噌蜆湯。
阿詩真係賢良淑德，性格又好又溫柔，又入得廚房出得廳堂，邊個娶到佢真係三生有幸。我心目中最好食TOP1嘅餐廳亦都已經變換咗。
食完餐飯洗埋碗我地就開始下半場。

「好！我地嚟溫書！」

「溫書？！」我冇聽錯嘛，而家先4月，6月先考，使唔使咁急呢。

「係呀，你上次考試成績咁差唔係都未知驚呀？」

「都唔差得晒吖，都合格吖，嚟啦～下次先再溫啦好嘛？嗯？」我擺出一副可憐嘅表情望住佢。

「……唉...好啦。但你要應承我之後要努力溫書冇得再咁懶散架。同埋下年唔會再有機會，要溫書嘅時候就要溫書，冇得再逃避，知唔知？」

「得啦～妳屋企有咩玩呀？」





之後我地玩board game同用電腦上網玩遊戲玩到11點我就返屋企。
冇辦法，我都想喺佢屋企訓，但係咁我聽日一定會遲到，我套校服根本都唔喺到！