市民與公主[短編]: VIII. 熱戀(3)
自從同咗阿詩一齊已經過咗幾個月，我地都亦都冇刻意去隱瞞我地之間嘅關係，所以全校師生都已經知道我地一齊咗，好彩啲老師都唔係守舊派，冇話啲咩唔可以拍拖個啲野。
即使係咁，阿詩依然都受到好多色瞇瞇嘅眼神攻擊，都唔怪得佢地嘅，人類就係咁嘅一種動物。
至於我，可以話個情況好咗好多，再冇啲九唔搭八嘅言論出現，但每況我同阿詩一齊出現都會受到凝視，呢點仲要時間適應下，始終我從小到大都唔係萬人迷。
轉眼間又到陸運會嘅時間，講真我並唔係咁鍾意呢個日子，雖然係唔洗上堂，但係返到嚟除咗參賽同幫手就係坐喺看台度，認真係幾無聊。
「你會參加啲咩？」體育堂上阿詩問我。
「唔知呀，可能唔會參加。」
我參唔參加我估到最後我應該都係要落場。
「咁成日坐喺看台到咪好悶囉。」
「唔會呀，有妳喺度陪我點會悶啫。」
「你又知我會陪你？我可能會落去呢～」
「嚟啦～參加一兩個都好吖～」
「咁...唉～跳遠囉。」跳遠係我認為最輕鬆嘅一個項目嚟，又唔洗跑咁多，又唔洗用力，係對鞋會入沙啫。
「仲有1500米。」
「痴線！1500米點跑呀！」
「唉～估唔到我男朋友咁細膽，落場跑下都唔肯，咁算啦～」
「報啦報啦，報1500呀。咁妳又報咩呀？」
「咁咪乖囉～至於我報咩，到時你就知！」
完晒成個報項目嘅程序，我就同班上其他男仔去打波。
從而都得知阿金報咗3個項目：200米，100米跨欄，鉛球。
——————
嚟到第一日，我地上晒去看台就開始開幕禮，又要聽人講野真係好鬼麻煩。
完晒個開幕禮，都開始準備比賽，啲健兒都去晒做準備，阿詩都即刻走咗。
「我要落去喇，一陣間再見啦。」
「妳報咗項目呀？妳報咗咩項目呀？」
「冇報呀，我落去幫手做工作人員，年年都係咁架啦，前3年你冇留意到咩？」
佢咁講又好似係，我好似真係冇認真留意過佢。
換句話講我得返阿金喺度陪我，就喺呢幾個鐘入面我地無所不談。
「話時話，你點樣溝到女神架？我記得初中三年你都對佢冇興趣架喎。」
都唔知點答佢好，成件事嚟得好突然。
「唉～一匹布咁長，唔講。」
「真係唔明，你究竟贏啲咩呢？點樣突然幾個月就將女神追到手。過去三年你地根本就可以話係冇講過野，你又唔似我地咁對佢展開攻勢，佢又唔似用幾個月就可以追到手。」
「你又因咩事本身對佢冇興趣，突然又會追到呢？定係你本身就鍾意佢但就收得好埋，埋到冇人察覺呢？會唔會你有啲咩愛情魔藥可以100%成功追到手呢？」
「喂健兒，你個鉛球開始召集啦仲唔去。」1
「呀！係咩？！我走先喇拜拜！」
再聽落去真係人都癲，只可以講你地睇野太膚淺，觀察唔夠入微，了解人不夠深。
不過反正你地都已經輸咗，知嚟都冇用。
呢個時候俾我見到一個人經過，佢就係我地紅社嘅社長——方Sir！我即落去搵佢吹水。
而家先知原來我坐緊嘅地區嘅前面係黃社嘅陣營，我攞本場刊睇一睇，跳遠同1500米項目都係今日上午。我就打下氣，坐下咁等。途中阿金返嚟就同我一齊坐喺度打下氣傾下計，雖則佢唔係黃社。
落去比賽嘅時候都可以見到阿詩，但因為佢做緊野所以只可以簡單傾幾句，唔係我地兩個都會俾老師罵。
1500米比賽，會喺200米線起跑，每經過一次100米線都會有一條手帶，換言之衝線時會有3條手帶。
我眼見參加1500米嘅人比想像多，唔通真係咁多位長跑好手？！
我亦見到派手帶嘅人入面其中一位就係阿詩。
講真個句，一早估到，我係落去陪跑嘅，但估唔到我並唔係墊底個個，仲有人係跑得慢過我。
不過我諗都要多得阿詩嘅鼓舞，我每經過佢一次佢都會鼓勵我一次，第三次嘅時候仲偷偷地送咗個飛吻俾我。
其實都唔算偷偷地，都有其他人見到，啲老師仲要笑添。
無論如何，佢嘅鼓勵好似為我入滿咗靚油，令我可以加速向前衝。
——————
嚟到第二日，今日我係完全冇項目嘅，應該。
今日如同尋日一樣，阿詩一早就落咗去做工作人員，我就同阿金一齊喺黃社到暢談。
睇返場刊先，阿金今日係有200米同100米跨欄，一個上午一個下午。
而今日我唯一一次可以見到阿詩嘅機會，就係出去食飯嘅時侯，所以我地都特別珍惜今次機會，用盡晒成個食飯時間。
「俊！一陣有冇野做呀？」方Sir突然走埋嚟問我。
「冇呀，做咩呀？」
「幫幫手跑社際接力吖。」
果然，我嘅預感係冇錯嘅，即使我唔報名都係要落場。
「係呀，我地唔夠人呀。」
「我唔跑得個喎～搵我落去輸緊個喎～」
「湊夠人嘅啫～」
「唉...好啦好啦。」
既然佢接受咗我唔跑得呢樣野就OK，輸咗就冇得賴我。
但落去都唔係真係差，一嚟可以幫我個班同幫我個社加分，二嚟可以再見到阿詩！
至於點解我會有預感，因為早兩年佢都有搵我跑。不過佢呢個老師係幾好嘅，同啲學生關係好好，個人好nice，對住佢嘅時候好輕鬆，唔似對住其他老師咁。
我諗每個人嘅校園生活總有一位咁嘅老師。
去到集合嘅時候知道我被安排跑第二位，對於唔識跑嘅人嚟講應該係幾好？
但有一點可惜嘅係，落到去、跑完返上嚟都唔見阿詩，唔通佢咁啱去咗廁所？
好快所有項目都經已完晒，要經歷閉幕禮。公佈四社冠軍、班際冠軍呢啲嘅時候全場都好興奮。
最後先知到阿詩當時原來去咗準備跑班際接力，咁唔怪得知我見佢唔到，亦唔怪得之我前2年都見佢唔到，佢都係去跑接力。成件事根本就唔係我冇留意佢！