市民與公主[短編]: VII. 熱戀(2)

個試話咁快就完咗，然後我地有2日假，咁啱就撞正阿詩嘅生日。

呢一日我地晨咁早就出咗嚟，無他，因為阿詩有套戲好想睇，而早場係平啲嘅，所以好唔情願地我都要早起。
至於睇啲咩戲，我係一啲頭緒都冇，皆因佢冇同我講，淨係俾咗個集合時間我。而我去到先知道係一套科幻片，呢點真係估唔到，完全冇諗過佢會對呢啲科幻野有興趣，以為都係睇啲愛情野又或者係笑片。

睇完戲我地去咗附近一間韓國餐廳食燒肉，當然係我埋單，畢竟我係男朋友，畢竟今日係佢生日，畢竟我生日當時係佢出錢。
過程之中少不了係會啲情侶間嘅互動，我餵下你，你又餵下我咁。呢個舉動真係羨煞旁人，不過今日係閒日，而家又係晏晝嘅關係，冇乜人受到傷害。

「嗯～嘩～韓牛真係好正好好食～」見到呢個畫面，我不禁笑咗出嚟。
「笑咩啫你？」





「冇，第一次見妳有啲咁豪邁嘅表現啫。」

「所以你而家係嘲笑我？」

「邊敢呢，反而好開心好慶幸見到咁多面向嘅妳，估唔到妳有呢一面，又了解妳多一啲。」

食完烤肉之後我已經好飽，但係阿詩佢就仲未曾飽，叫多個湯飯食。
見到佢食得咁幸福，唔知點解我會覺得開心，真係好奇妙。





本身諗住影低佢呢個美麗食相，但係佢就即刻反應過嚟，咪埋雙眼，擺個V字係右眼旁邊，擺出可愛活潑嘅姿勢俾我影。

「俾我睇下...唔錯唔錯，影得幾好。」

到我攞返部電話嘅時候，我手機嘅背景畫面已經變咗呢幅相。

食完飯我地就周圍行下順便食飯後甜品——雪糕！食得雪糕，就順便行下傢俬舖。
從前，呢度仲係一間傢俬舖，而家已經變成一間食肆，啲人嚟呢度都係食野多。

行完一圈就嚟到我地嘅目的地，佢要咗一個朱古力雪糕，我就係抹茶。





「我諗好咗第時間屋要點裝修佈置喇。」食食下雪糕佢突然講。

「咩屋呀？」

「我地嘅安樂窩～」

「有排啦，使咩咁急呢。」

「…」佢望咗我一眼。
「食完！走喇！」

之後我地繼續係呢個商場中周圍穿梭，行下唔同嘅店舖，服裝店、日用品店、運動用品店舖等等。

「要唔要溜冰？ 」





「唔...嗯！」佢思索咗一陣就猛然點咗一下頭。
「但係...我唔識溜喎。」

「我識！我教妳！」

我地換好晒溜冰鞋同護具就踏入溜冰場之中，一入去就即刻走過去有扶手個邊。

「首先呢，妳個人唔好震住，明白妳好緊張，但我哋一齊放鬆先，做個深呼吸練習，跟住我...」
然後我再逐步逐步慢慢教佢溜冰嘅每一個步驟，再串連起身。初學溜冰跌倒係少不免嘅事，最緊要唔好放棄，識得企返起身，繼續練習，要記住冇野係可以一步登天，所有事都係需要經過長時間嘅歷練先做到爐火純青，高樓都唔係一日建成。
我就一直係旁邊勉勵住佢。

而阿詩天資聰敏，好快就學識咗。

「你唔好走住...」





「好好好，唔走唔走，我拖實妳。」
佢一手就扶住扶手，另一隻手就拖實我，慢慢嘗試再出發。

「唔得呀，我溜唔到呀。」

「妳得嘅，信我，我會一直係妳身邊，支持住妳，成為妳嘅後台。所以俾啲信心自己，放膽去啦！」

佢跟住我嘅步伐一步一步咁去，從要扶住扶手到唔使扶，速度亦逐漸加快，從憂愁嘅面孔到歡樂嘅笑容，我亦不經意咁鬆開咗手，所以...
佢而家係憑自己努力做到成件事！無論係作為教師、男友、觀眾，都非常感動！

「我終於做到喇～」

「都話妳得架啦～」我舉出兩隻大拇指。





結果佢即刻就向前跌，我亦及時扶住咗佢。

「至少妳靠自己成功完美溜到冰，攞返頭先個感覺就得！」

——————

溜完冰食埋晚飯之後我地去咗附近嘅海邊吹住海風望住個海。

「多謝你。」
「同你一齊嘅呢段時間好開心。」
「實不相暪，今次係我第一次有人同我開心咁過生日。」

「！」以為阿詩作為女神一定有人同佢慶祝生日添，睇嚟我嘅偏見太多了。

「嗯...自細我爸爸媽媽關係都唔好，根本都冇試過三個一齊開心過。到我大個都冇再慶祝過生日，1月對學生嚟講又唔係一個慶祝嘅好時機。」




「你係第一個男仔俾到我咁特別嘅感覺。」
「你知你地啲男仔架啦，個樣靚啲就衝埋去。上到去中學仲無啦啦多咗個「女神」嘅稱呼，真係好辛苦，好無奈，好大壓力，個個男仔接近我對我獻殷勤都只係因為我嘅外貌，所以我特登表現得硬啲，希望可以舒緩到情況。」
「偏偏就俾我發現！有一個男仔好特別！同其他男仔唔同，佢完全冇理過我！即使我搵佢同佢講野，佢個表現都同其他男仔唔同，係好冷靜好冷淡。」
「你知唔知係邊個呀？」
佢雙目深深咁望住我，手指輕輕點咗我鼻頭一下。

相信呢個人嘅真身我地大家都心中有數。

聽到呢度我真係忍唔住咧嘴露齒笑，冇想到我係阿詩心中係如此特別嘅一個存在。

「妳只要記住我永遠都會留響妳身邊，做妳後台，為妳承擔一切，接受一切，死都不離開。」

「…」
「絕世好男人，我嘅生日快樂呢？」

「生日快樂！仲有一份禮物！」我攞一個盒。

「呢個唔通...」佢望一眼個盒再望住我。

「冇錯！」

「幫我戴！」
我攞出入面嘅戒指戴上佢嘅無名指上。

「我願意！」在月光下我地緊緊抱住。

「嗯。遲啲我攞隻大粒啲再同妳求。」
「同埋...呢隻其實係情侶戒指，我都有一隻！」我從褲袋中攞出一隻銀色，大啲，冇鑽石係上面嘅戒指出嚟。

「咪住！」佢搶走我手上嘅戒指，幫我戴上。
輕輕吻咗我一下。
「我知你今晚冇準備蛋糕，要懲罰你！」

「呀～！」
突然佢捉住我隻手咬咗一啖。

「唔洗誇張喎，留咗個牙印係度啫，又冇出血。」
「好喇！返屋企lu~」