市民與公主[短編]: VI. 熱戀(1)

過咗個聖誕假之後返到嚟就要考試，而理所當然地我緊係冇溫過書啦，成個假期都喺度食、玩、瞓。
至於阿詩就當然係好勤力咁溫書，始終佢都係乖乖學生嚟，始終佢都係學霸，始終佢嘅目標都係遠大啲。

我地兩個嘅生日都喺1月份，而唔知好彩定唔好彩，我嘅生日喺考試中間，我個人冇咩興趣過生日，可能由細到大都冇呢個習慣；但生日要喺考試中度過好似有啲可憐。
不過算啦，都習慣晒喇。

「你科科都咁快做完嘅？」考完之後阿詩就問我。

「下...係呀，我...我勁囉，係呀...」唔識嘅直接跳過，可以做幾耐？





「btw，生日快樂！我嘅男朋友仔～」

「嗯，多謝。」

「做咩咁呀？哦～因為仲考緊試所以開心唔到？」
「都係嘅，咁你又係慘啲嘅～嘻嘻。」

「妳都唔好得去邊咋～笑！」

「至少我係考完先生日吖！」




「今晚留返俾我！返到去好好休息下！」

「妳唔洗溫書咩？做唔到第一個喎咁樣。」

「我目標又唔係做第一。溫少1晚囉，應該冇野嘅。」

——————

返到去我首先就訓一覺，傍晚起身我煮好咗晚餐就出去接阿詩。





「嘩～你做咩過咗嚟架？明明係喺你樓下等架喎。」佢一落樓見到我喺樓下明顯係有啲詫異。

「咁妳係我女朋友，點可以要妳接呢？同埋...都係幾步路啫，咁介意做咩呢？」
「唔好講咁多，行喇！」

一路上我跟住佢尾，就嚟到一間西餐廳。就咁睇啲格局同裝修，都可以睇得出啲野食唔會平得去邊。

「其實呢...」

「其實呢我知你想講咩，難得生日，唔好計較咁多，好冇？」
我都冇謂要逆佢意，我都明白佢嘅出發點係好，係為我好，所以我都冇再講啲咩。
睇咗下個餐牌，我地叫咗個二人套餐，算係幾抵嘅一個選擇，但賣單連加一都要成千蚊...

最後我嘅預想應驗咗，佢係準備咗一個生日蛋糕，好彩嘅係冇一啲好誇張嘅表演，唔係就尷尬死。





有樣野漏咗講，幸運地我都著得算得體，唔係就真係失禮死人。

例牌野，雙手合十，雙眼合埋，許個願，吹蠟燭。

——————

「送俾你嘅。」歸家嘅車上，阿詩俾咗一個盒我，打開後，入面裝嘅係一個可可色銀包。
「我自己親手整架～點呀？」

「真係好香～充滿妳嘅香味～」
一聽到係佢親手整，我就聞下個銀包。

「痴線，聞銀包都有嘅。」

「本人更香～」好，咁我就直接聞本人，純粹嘅自然體香。




「我好鍾意。」

「咁就好。」
「你頭先...許咗啲咩願呀？」阿詩突然問咗我呢個問題。

「嗯......秘密！」
其實我並冇認真許願，因為我打從心底唔相信呢樣野。或者我係唔浪漫，我承認，但我喺同阿詩一齊嘅呢一輩子，學習一世。