市民與公主[短編]: V. 邂逅(5)
自從上次同女神出咗街之後，唔知點解俾全校嘅人知道晒，而家嘅我成為咗全民公敵，無論去到邊都好，操場，班房，禮堂，健身室，廁所，我都聽到有人講「佢憑乜野呀～又樣衰又矮讀書又差」，甚至一啲更過份嘅言論「聽講佢冇老豆老母架」「唔怪得之啦，成個壞學生咁，上堂淨係識訓覺」「點至呀～佢黑社會嚟架，一定成日打交又掂毒品又盛啦」
「阿金，我今鋪濕滯啦。」好彩阿金佢仲未離棄我，果然係好兄弟。
「抵你架，同公認女神出街喎～幾多人恨都恨唔到呀～我都好妒忌你，連男神阿樂都唔得，你得？！」
「唉～不過我都幫你唔到，你地真係俾人見到咗。不過你收手一排，低調啲，好快冇人講架啦～係咁啦。」
唯有係咁啦，希望真係如阿金所講，過一排冇人講，等時間沖淡一切。
我呢段時間真係低調咗，盡量減少同女神之間不必要嘅互動，食飯都同返阿金一齊食；放假女神約我出街都以有事做推咗佢。
就連下個月嘅聖誕派對嘅比賽都唔敢參加，生怕會出錯，加劇件事情嘅惡化。
「俊哥，學生會公布咗喇喎～」食食下飯阿金同我講。
「咩呀？」
「聖誕比賽囉！你唔係唔參加嘛～」
「阿金哥，你唔係唔知我咩情況架啦，仲叫我參加，你真係想我死喎！」
「係～你又冇樣又冇高度又冇腦，呀唔係，讀書又差。但你有把聲嘛～你唱歌最叻架！到時冇人會講你架啦！反而係敬佩你呀！」
「況且而家都過咗半個月，冇人講架啦～你守行為守得好好呀～」
我都明，但...但出錯就死架喎～
算啦，唔參加又唔會死嘅。
點不知...
「俊，你參唔參加聖誕比賽？」
夜晚，女神突然send咗個訊息俾我。
「唔會啦，我又冇一技之長。」
「盡力咪得囉，唔通個個都係隱世歌手隱世舞王咩。」
「會俾人笑架喎～」
「起碼你有勇氣呀，笑你嘅換句話講咪證實佢地做唔到，同埋笑咪笑，唔使理佢地架，活好自己就得啦！」
「至少我唔會笑你吖～」
佢都講有道理嘅...「但...」
「唔使但喇，我幫你報名！」因為呢個活動係學生會負責，而女神就係今屆學生會嘅會長，所以佢可以處理報名事宜。
「唉～好啦，我唱歌啦～」
「嗯！遲啲send首歌俾我！」
「放心！我會嚟睇你表演同支持你嘅！」
妳有所不知，妳嚟我反而仲驚，好驚會出錯會出糗。
個頭經已洗濕咗，已經冇得逃避，唯一可以做嘅就係出盡全力準備。
歌曲我一早揀好咗，既然要唱，就由我嘅歌單入面揀首我最鍾意嘅，然後係反覆嘅練習，練習同練習。
時間過得好快，眨下眼就嚟到初賽嘅日子，講真嚟到呢刻準備時間都冇野好做，唔通無啦啦大聲唱歌咩，又唔係表演。唯一可以做就係深呼吸，放通心情。
去到現場，女神亦如佢所講有嚟到睇，我臨上台前佢都有講聲加油鼓勵我，真希望冇人見到呢一幕，唔係我又要低調做人。
係台上嘅呢分幾鐘，可以話係我呢半個月嚟最自在嘅時間。
之後就要等結果宣布，入咗圍嘅先可以係聖誕派對當日係台上表演。
聖誕派對當日除咗有個比賽之外都冇咩特別，就係返各自班房玩下食下咁，有啲班房會有交換禮物嘅環節，例如我呢班。講就講交換，其實就係抽。而因為係抽嘅關係，啲禮物就會比較悶比較普通，大眾化一啲，而又因為大家仲係學生嘅關係，啲禮物不外乎都係文娛用品，價格限制又唔高，成個環節精彩極有限啦。
不過都有得避嘅。
——————
「號外！號外！」
呢一晚，女神又send訊息嚟，究竟係啲咩野事要用到號外呢個字呢？
「咩事？有咩特別事發生咗？係咪外星人入侵學校變咗做啲老師學生校工清潔工雜工？」
「係一啲更重要更令人興奮嘅事，新鮮滾熱辣今日先啱啱收到！做好心理準備未？！」
「嘩，有啲驚添，不過OK嘅，嚟啦！我頂到！」循例都要做啲反應配合下嘅。
「就係...」
「你入圍喇！恭喜晒！」
「嘩...多謝...多謝晒...我有今日要多謝唔少人...(下刪5000字)」
講真我都估唔到我入到圍，個日嘅表演其實有啲失準，可能個日未開聲就要唱歌就唱得差啲。
「咁你記得做好準備，我會好期待睇你精彩嘅表演。」
而家除咗份禮物，又多樣煩，人生真係艱難。
——————
女神係出面介紹完我之後入返嚟，就係我出場嘅時間。
如果可以同台下觀眾有啲互動嘅話我會開心啲，因為首歌係比較開心嘅。但考慮到近排嘅事，沉醉於自己嘅世界，享受屬於自己嘅時間！
最後攞到歌唱組嘅銀獎，都不過不失啦，我已經好滿意。
而現實往往就係咁，當你擅長一樣野，或者出名一樣野，啲人一有機會就會叫你表演一下，我個班都唔例外。
結果我就成為今日嘅娛樂節目，其他人就一路食住野聽我唱歌。雖然係有啲辛苦，但見到大家接受返我呢個盟友，冇再當我係敵人，呢啲辛苦值得嘅。又或者我係佢地心目中價值提高咗，有資格接近女神。
交換禮物嘅環物，我就以唔記得成功避開咗。
終於完晒成日嘅活動，除咗得到個獎，得到同學嘅接納，仲得到咗喉嚨痛...
所以一放學我就返咗屋企休息。點知一訓就訓到夜晚，頂！我仲有野要做架！
我嚟到咗屋企附近嘅一個公園，因為今日係閒日，而家仲係夜晚，現場都冇咩人。
「做咩呀？」等咗一陣，佢就嚟咗。
「咁急叫得妳嚟緊係有事啦。」女神問我。
「咩事咁緊要？換晒衫咁樣嘅。」冇錯，我呢身裝扮係出街衫，波鞋，西褲，裇衫，再加件外套。不過...我的確係出咗街，都冇錯吖。
反觀女神，佢就係正正宗宗落個街嘅裝束，不過就係著住條短褲，帆布鞋，仲拎咗個袋。
「咁妳又...」
「你...你理得我吖，我...我見...落得嚟，諗住買啲野啫。」
「嗯...」
「阿詩，雖然我同妳相處嘅呢段時間唔長，但係已經足以令我察覺到妳嘅魅力，令我無法自拔咁愛上咗妳。平時妳表現得好硬朗好細心好體貼，但妳心底裏係有顆少女心，非常可愛，活潑，天身無邪，令我好想保護妳照顧妳。我知我未必俾到最好嘅生活妳，我又樣衰，成績又差，個人又生得矮，又賤格，又唔乖......」
「夠喇，你講夠未呀。」
「但係...你同時都好細心，好溫柔，好識照顧人...仲要唔係外貌協會...」
「...但係我都會盡我全力俾最好嘅妳...妳可唔可以做我女朋友？」
「我諗下先...咁...」
「...你又可唔可以...做我男朋友？」
一聽到呢句，我忍唔到，打從心底裏展露最真摯嘅笑容，感覺我地先可以配上「幸福」呢個字，無人會愛得比我地多比我地深，我地之間嘅呢份愛先可以叫到「戀愛」。
「可以！」
「我都可以！」
「我有禮物要俾妳，睇下。」
佢打開我遞出嘅盒，入面係一條頸鍊，上面有隻藍色嘅蝴蝶。
「個日同妳行街，見到妳望咗好耐但最後都冇買，我就買咗返嚟送俾妳。」
「如果...我係睇唔啱呢？」
「咁...咁死喇...」
「咁唯有送我俾妳啦，我都冇其他野可以送。」
「我一定要架？！」
「咁妳而家要唔要？」我張開我嘅雙臂等住佢。
「要！我要keep一世！仲唔會退貨！」佢講完就上前攬住我，我亦都攬實佢。
「不過點解你唔係學校送，要而家咁夜特登叫我出嚟？」
「因為...我都想低調啲。」
「唔會係因為啲輿論呀？」我聽到即刻垂下頭。
「使乜理人地講咩呢，唔使理人地嘅目光或者講啲咩，做自己就得！」
「因為你咁，我地相處嘅時間就少咗個半月，我好孤單。」
「嗯。我都好後悔咁怯，以後我會做自己！唔理人地！對唔住，我愛妳！」
「好啦...我都有份禮物要送俾你！」
佢由佢個袋度攞出咗一個盒俾我。
我打開盒，入面係一隻錶。
「呢隻...」
「你識觀察我，我唔識觀察你呀？」
「但係...隻錶好貴架喎～」
「唔緊要！最緊要你開心！」
「仲有一張相，係當時我地一齊影嘅！」
盒入面的確係有一幅相，係當時我地食雪糕嘅時候影，呢張係正常版。
「我會好好珍藏好好保管！」
「但係...即係妳個袋係用嚟裝份禮物，而唔係去買野嘅？」
「我而家想買呀～你陪唔陪我去？」
我地相視而笑。