市民與公主[短編]: IV. 邂逅(4)
今日雖然係星期六係放假啦，之但係我都一早就起咗身，俾著係平時嘅我訓到晏晝先會起身。
至於點解？因為今日約咗阿詩aka女神。
雖則我本身對佢都冇咩興趣，因為我並唔係一個睇樣嘅人，但自從上次同佢去食飯相處過後，我發現到咗佢嘅吸引之處。而且都要尊重返人，冇理由隨隨便便咁又或者遲到，對方仲要係女神，我更加要隆重其事，以及早啲到！
我尋晚已經準備好今日要著嘅衫，並且燙到直一直咁！
可惜事與願違，世間事又豈能盡如人意呢？
我都已經早到架啦，點知佢仲早喎！痴～線架。
我從遠處行過去，打量住佢上下。及胸嘅長髮，同係學校見到嘅馬尾係兩種味道；黑色嘅上衣配上一件牛仔外套；下身係一條白色蕾絲短裙，再加上一對露趾嘅平底鞋，將佢一對完美嘅長腿展現出嚟；雙手攞住一個啡色細手袋。
唔記得咗講我嘅穿搭，因為我屋企嘅衫幾乎全數都係黑色，所以...黑色上衣，黑色上褲，黑色高筒帆布鞋，再加一件藍色牛仔外套。
「咁早嘅？」行到過去我第一句問佢。
「唔想你等嘛～」
「不過你都好早吖～」
「點呀，我今日著得靚唔靚呀？」
「嗯...」我再一次上下望住佢全身，乘機再飽受多一次嘅眼福！
「非～常靚，同係學校嘅你係兩種style，而家嘅你又可愛又充滿女人味，正呀～～」
「有冇咁誇呀～不過都多謝你。」
「好喇，快啲帶我去你口中個間5星級餐廳啦，我早餐都未食，餓到個肚都扁晒...」佢摸住自己嘅肚，扁住嘴講。試問有邊個男性見到呢個樣會抵受得住。
呢間意大利餐廳係網上有海量嘅好評，唔單止係我心目中係5星，網上面都係5星！你話勁唔勁，勁！
而因為我兩個都早到咗，仲未到我所預訂嘅時間，所以我地首先就去附近商場行下。
去到嘅時候一如我所料非常多人，好彩我有先見之明一早已經訂咗位，所以只係等咗一陣就有位坐。呢啲係咪就叫...遲嚟先上岸呢？
——————
阿詩如同其他女仔一樣，食物一上枱第一步就係打卡，手機食先。
而經過呢一餐之後，呢間餐廳都成功入咗阿詩嘅list入面TOP 1嘅位置。我地兩個都更了解對方多啲。阿詩平時鍾意睇書鍾意扮靚，但就唔鍾意做運動，因為好辛苦流好多汗。不過佢咁鍾意食野，但咁唔鍾意做運動，仲可以保持到咁靚同咁好嘅身材，佢天生就係一個美人，遊戲角度嚟講天職係女神，命中注定要肩負住「女神」呢個稱號。
驚訝嘅係今次係佢第一次同男性出街，唔計佢爸爸。原因係佢好少男性朋友，有嘅都冇約佢出街。我真係好幸運，做到第一個唔計佢爸爸同佢出街嘅男性。
——————
時間尚早，我地決定去行下街。
俾著係平時嘅我，一定唔鍾意。因為我係唔鍾意多人嘅地方，仲要係星期六係鬧市區，我會覺得好局促。
但而家唔係，周遭嘅人嘅目光都集中晒係我地兩個身上，我彷彿可以解讀到佢地諗緊「條女真係正呀！」「條仔咁嘅款都有個天菜級女朋友，真係唔公平！」唔好意思，呢個世界就係咁唔公平。
行行下我地見到間機鋪就入去行下。
入到去我地首先行咗一圈睇下有咩玩，講真個句，呢間機鋪都幾大，遊戲嘅數量同種類都非常之多，有音樂，賽車，街霸等等，但吸引到我嘅並唔多。
「你想玩啲咩呀？」
「嗯...我玩咩都冇所謂。」其實我想玩賽車，但係女仔普遍嚟講都冇咩興趣，頭先佢又唔點望過賽車呢邊。
「咁...我想睇下你玩賽車！」
「下？！」唔通佢識讀心？係讀心神探個女？
「但...」
「行啦！」
好啦，死就死啦，我都未玩過賽車遊戲。
隻遊戲係就係難玩啲，對我呢個新手嚟講，但都係幾好玩嘅，不知不覺都玩咗幾鋪。
「好可惜...攞唔到第一名。」
「都唔差吖，你頭先第一次玩包尾，但越玩就越上手，仲試過攞第二名。冇人第一次就上手架嘛～」
「咁證明我都有天份，大個都可以玩一級方程式賽車。」
「係喇係喇，你最勁呀！」
然後我地去咗玩釣魚機同太鼓達人，呢啲遊戲都可以兩個人一齊玩。
最後我地去玩跳舞機，因為佢唔識玩，所以就由我示範先。而我本身對呢啲音樂遊戲都比較擅長，所以對我嚟講濕濕碎！
我玩完就到佢玩，但係就俾我發現咗一樣野。
「等陣。」
我除咗件外套出嚟圍住佢條腰。
「...唔該～」
咁樣就可以放心咁玩，佢條裙嘅長度個動作大小小都會即刻走光，當時就係要做好防禦措施先。
動作唔會就住就住，自然都會玩得好啲。
我係咁以為，但應用唔到係佢身上，佢係完全唔掂，跳到好似個白痴咁。
我係隔離忍住笑，偷偷用手機將佢嘅「舞姿」拍低佢。
「唉～唔玩喇，好難玩，唔啱我。」
「我知道。」
「笑笑笑，笑夠未呀...咁我真係唔叻嘛～」佢鼓係雙頰憤怒嘅模樣，非常值得憐愛。
「明白嘅，唔使唔開心，我都係經過多次嘅苦練先可以跳到咁。我地而家去食雪糕好冇？！」
——————
我揀咗藍莓味，而阿詩就揀咗草莓味，我地坐係一邊嘅長櫈上面食。
突然我頭腦閃過咗一絲邪惡意念。
「妳要唔要試下我呢個？我呢個好好食喎。」
我伸支雪糕過去，而佢都伸個頭過嚟，一下！
「呀...」佢個嘴沾上咗我嘅藍莓雪糕。
「哎呀，唔好意思，我會小心啲，再嚟吖。」
結果佢又中計，發覺我真係好邪惡好賤格。
「我幫妳抹返。」我一路忍住笑一路用紙巾幫佢抹，佢都好配合嘟住個嘴。
「你又要唔要試下我個士多啤梨味雪糕？都好好食架。」
我心知到佢想點，但做得出就要負返責任。所以同樣我都中咗兩次計。
「你個樣真係好好笑，哈哈哈～不過我冇心架哈哈哈～」
「我覺得要記錄低先得！」佢笑住攞出部手機出嚟準備影相。
「咪住。」
「嗱～唔可以浪費食物架。」
好囉～
事後佢都有幫我抹返個嘴，正正常常咁合照，又好正經咁各自試過大家嘅雪糕。
不知不覺，快樂嘅時間覺得真係快，我地都係時候要返屋企。
係巴士上，玩咗成日嘅佢都已經攰到訓著咗，我亦好自私咁係佢唔為意嘅情況下同佢合照咗一張，將佢睡美人嘅姿態永久保存落嚟。
雖則佢平時表現得硬朗，但原來私底下有咁可愛活潑嘅一面。