市民與公主[短編]: III. 邂逅(3)

「好！落堂！」
老師嘅叫聲將我由睡夢之中叫醒。呢一覺睡得真係好爽，輕輕鬆鬆又到食飯時間！

基本上我每日返學都係咁，一返到去就訓，好彩就訓到食飯，唔好彩中間會醒咗訓唔返。所以我基本上係冇聽過書，但咁唔代表我成績係不堪入目，合格我都係確保到嘅，反正我目標又唔係做學霸。

收好晒啲野我就去搵阿金一齊出去食飯，食完飯返嚟繼續訓。

「阿俊，你而家得唔得閒？不如...一齊食飯？」突然阿詩走埋嚟講。

「下？」咁突然？一定有古怪。





「嗯！我請你食，當係報答你之前幫咗我！」

我拉阿金埋一邊叫佢稍為迴避一下，而佢都好識做咁自己行開咗，人生有個好兄弟真係好！做咩都順順利利！

——————

「你有冇話想食啲咩？」行出學校門口阿詩就問我。

「想食咩...嗯...呀！我知道附近有間餐廳好好食！食日本野嘅，妳有冇興趣？」





「日本野？好喎，我次次都係去附近茶餐廳食咋。」

「咁快啲行啦，遲啲就冇位架啦。」講完我就即刻拖起佢隻手係人群之中穿梭，務求盡快去到，因為真係遲1秒都可能會冇位，首先間餐廳好食，然後而家又係食飯時間，真係要分秒必爭。

而話咁快我地終於都到咗，好好彩仲有位我地可以即刻入到去食！

我地都睇下個餐牌諗食啲乜野，我好快都決定咗食啲咩。反觀返阿詩佢，仲係咁掀嚟掀去諗緊食咩，睇嚟佢係有選擇困難症？

「點呀？」





「我想食呢個飯，但呢個蕎麥麵又好幾好咁，而個烏冬又好正...」

「得啦，我幫你決定！」

「好！野飲我要...凍奶茶少甜少冰！」

「妳好鍾意飲奶茶架？」

「係呀！奶茶真係好好飲～」

叫咗侍應過嚟點餐，最後我幫佢決定咗要個蕎麥麵，至於我就叫咗個定食。

話咁快啲食物嚟齊晒，我地都唔客氣趁熱食，好好享受呢一餐。
不過唔係嘅，一陣應該都有排我受...呢個就係個代價。





「你真係冇介紹錯，真係好好食！好想繼續食呀...」

「緊係啦！我食家嚟架嘛～全港好多餐廳我都食過晒，邊間好食邊間唔好食我都知！中西日韓式全部我都有推薦！我仲知道有一間茶餐廳嘅奶茶係絕頂！」

「咁厲害！得閒你要帶我去試渾晒全港嘅美食先得！」

「有機會有機會，我去埋單先。」

「唔好～我講咗我請架嘛～」

不過我一於唔理佢，堅持自己俾！咁先可以展現到我嘅慷慨同男士風度～

「張單咁貴，冇理由要妳埋嘅，又係我堅持帶咗妳嚟呢度嘅。」





「咁...」

「唔使咁喇，如果妳堅持要報答嘅話...」我講住對眼望住佢。

「唔通...」

「哈哈...報答咗架喇！妳同我食飯係我嘅福份嚟。」
「同女神食飯喎～幾多人恨都恨唔到呀！」

「哼！唔理你！我去行街！」

「喂，做咩呀，等埋啦。」

一路上我都係跟係佢後面陪住佢行，呢一度有啲咩鋪頭我都清楚，所以我好明白我係冇野想行。
而呢個都係普遍男性同女性嘅分別，男性係有目標有計劃性，出發前就已經有個明確目標要去邊度買啲咩買完就走；而女性就係相反。





不過當然我都會周圍望下，見到啲稍為有興趣嘅都有望多兩眼，但並唔會忘記我此行目的——陪阿詩行街。同時我時不時都確認下時間，睇下幾時要返去。

可見佢停留嘅鋪頭都係女性化啲，例如化妝品，護膚品，首飾。不過都當然，佢係女性嚟。
其實我一直都好驚佢會問我「呢隻色同呢隻色邊隻靚啲？」類似嘅問題，並唔係我睇唔出分別，而係隻色差別唔大，出嚟嘅效果差得唔遠好難講邊隻靚啲。另外靚唔靚係睇你點襯啫其實。

行行下就行到去一堆嘅夾公仔機前面，佢企係其中一部機面前用代幣好用心，聚精會神咁夾佢嘅心頭好。
只可惜，佢用晒100蚊都夾唔到，睇得出佢勁失落。

好！我決定咗，幫下佢！

我一嚟就換100蚊嘅代幣。
夾咗幾次之後，我明白咗一樣野。就係個夾根本係冇力嘅，夾唔到係正常。
不過我既然決定咗要夾到！我就唔會放棄！除非冇錢...





但我越夾越沮喪，感覺係度倒錢落海咁，得返幾次我都已經打定輸數，唔會得架喇～

「...」

「...」

奇跡突然降臨，得返2次嘅時候，我居然得咗，不能置信...
阿詩都好驚訝，佢表情同我一樣都好愕然。

佢係下面出貨位攞咗隻公仔出嚟望咗一眼就上前攬住我。

「嘩！多謝你呀！我好鐘意隻公仔呀！」

而我繼續保持愕然，不過係因為阿詩嘅呢一個舉動而愕然。

前一刻仲係好失落嘅佢，下一刻就變得勁開朗。

望住佢拎住隻公仔，表現到細路女咁，真係好可愛，好想繼續見到呢個樣貌嘅阿詩。