佛誕怪奇短篇 - 廢棄村落之浴「罰」節: （十三）坤達的自白
隨着阿棠的質問，坤達停止了和小雅的拉扯，而小雅則擔心坤達會突然闖進叢林，雙手繼續緊抓着坤達不放。
「坤達，阿棠講嘅係咪真？你係特登引我哋嚟呢度？」
坤達聽罷，抬頭看着漸漸被烏雲覆蓋的天空，隔了一會後，便下定決心向眾人和盤托出他藏起來的秘密。
「阿棠、小雅、子晴，接落嚟我講嘅嘢，可能你哋未必會信，但我可以好肯定同你哋講，呢一切都係真嘅。拍片嗰個，的確同記事簿入面嘅係同一個人，亦即係我嘅細佬，Andy。」
坤達向三人表示，他跟弟弟相差了兩年，雖然就讀的學校不同，亦沒有共同的朋友圈，但時不時兩人會一起運動、看電影等等，感情算是非常不錯。
就在大約兩年前，坤達弟弟表示和朋友開設了一個Youtube頻道，內容主要以靈異奇聞和探險活動為主。
坤達本來對這種不科學的東西沒有興趣，但既然弟弟開設了這個頻道，他就抱着幫忙的心態去搜尋有關香港有怪異傳聞的地方，而空餘時間也會幫忙後期製作。
但Youtube其實並不是那麼好混的，經過了半年左右，頻道大約只有一萬左右的訂閱，而坤達的弟弟也開始失去幹勁。
本來事情應該就這樣落幕，可是好死不死的，當時頻道上傳了一條有關香港神秘邪教揭秘的影片，內容是直擊有關已經停止了活動的「攝理教」，這條短片，在短短三日內，便已突破了一百萬觀看次數，更令網上掀起了一陣探索神秘宗教的熱潮。
「你講完我就醒起啦，一年前我曾經有睇過同一個頻道幾條宗教揭秘嘅影片，其中一條就係講攝理教，本身都有追蹤嗰個頻道，但之後佢哋突然間無再更新，之後仲連個頻道都被Youtube禁咗，原來係你細佬嘅頻道。」
阿棠驚覺原來自己無意中曾經有關注過坤達的弟弟，而坤達在聽到阿棠的說話後，露出了苦澀的笑容。
「原來你都有睇過，不過都唔奇嘅，當時條片真係好成功，但我寧願佢哋從來都無成功過。」
當時攝理教的短片得到莫大的成功，他們亦找到了所謂的流量密碼，開始認真製作有關香港神秘宗教的影片，而大部份的題材，也來自於坤達。
坤達作為幕後製作，為他們提供了不少影片的題材，從比較有名的攝理教、青龍教、新天地教會；到鮮為人知的玄武財神教等，都獲得空前的成功。
而比起那些已經為人熟知的邪教揭秘，觀眾似乎更熱衷於本地的神秘宗教，因此，坤達開始以香港失落的宗教作為資料搜集的主軸。但跟大型宗教不同，本土的小型教派或失落的宗教資料少之又之，很多時候，更只存在於圖書館的紙本紀錄之中，所以難度比以往高出了不少。
然後，在偶然的機會下，坤達在大學的圖書館裡，找到關於牛屎湖村的零碎傳聞。
「我記得，嗰一日我喺圖書館度碰運氣，睇下會唔會有新嘅題材提供畀我細佬，但搵咗好耐都唔無發現。然後喺圖書館嘅角落，我發現地下有幾張紙，紙上面係被整理好嘅牛屎湖村資料，當我睇到上面嘅內容之後，我馬上就被入面講嘅嘢吸引住，如果啲資料係真嘅，我相信條片應該會被之前嘅更爆。不過，我都擔心係有其他同學漏低呢啲資料，所以我將啲資料影印咗一份之後，就喺圖書館度等咗差唔多成個鐘，但最後都無人嚟。無可奈何之下，我就將啲資料交去失物認領處，之後就開始搜索有關牛屎湖村嘅資料。」
不管坤達如何在網絡上搜尋，或是到圖書館去找尋，結果都是失望而回，甚至連牛屎湖村是否曾經存在也無法確認。
坤達弟弟知道這情況後，決定親自到牛屎湖村一探究竟，畢竟頻道剛剛才踏上軌道，如果不能拍出更多的影片，觀眾可能會慢慢失去興趣，始終在這訊息爆炸的年代，要維持熱度並不是一件容易的事。
在決定了前往牛屎湖村之後，坤達弟弟跟他的朋友開始商量細節，但因為資料實在非常不足，極其量只知道牛屎湖村曾存在一群人，會在佛誕當天以血浴佛而已。
為了令影片更有可看性，他們決定在佛誕當天去牛屎湖村，並計劃在牛屎湖村野營，如最後甚麼都沒有發現，他們打算按照資料所說，嘗試模仿以血浴佛的情形，呈現出當時的情況。
由於牛屎湖村位置偏遠，能夠補給的地方也只有三椏村，所以他們計劃在那邊野營露宿，拍出滿意的影片後才離開。
只是，他們應該沒有想過，這一次的拍攝，會成為他們最後的記錄。
「我細佬佛誕前一日已經離開咗屋企，應該係去其中一個朋友嘅宿舍度集合，到時再一齊出發。嗰日，係我最後一次見到我細佬......之後過咗佛誕，一日、兩日都無聯絡我。我開始覺得奇怪，但心諗佢哋可能拍攝出咗啲咩問題所以需要更多時間，所以我都無為意。點知到佛誕之後第三日，我聽到有人撳門鐘，以為係細佬終於返嚟，但開門之後，見到嘅係三個警察，佢哋都未開口，我已經心知不妙，之後佢哋開始問我Andy喺唔喺度，最後一次見係幾時等等......佢地問咗好多問題，我已經唔記得問咗咩答咗咩，但我知道一個事實，我細佬同佢啲朋友都失咗蹤，到依家佢哋都無再出現過。」
「咪住先，如果係咁，頭先你畀我哋睇條片又係咩一回事？你話你負責後製，啫係你將條片掟上去Youtube，再喺呢啲時間畀我哋睇，引我哋過嚟！」
坤達聽罷，臉上露出了傷感的神情。
「阿棠，唔係你想像中咁，你望下條片嘅頻道名同上傳日期就會明。」
阿棠聽罷，再次打開了剛剛的影片，這才發現這影片並不是上傳於Andy他們原來的頻道上，而且上傳日期只是一個月前。
「正如你頭先講嘅，我細佬嘅頻道喺佢哋失蹤之後就唔知咩原因被禁，我嘗試同Youtube嗰邊了解情況，但都無得到正面嘅答覆，佢哋只係覆因為我唔係頻道嘅擁有人，需要由擁有人提供證明文件，先可以處理。但我細佬失咗蹤，亦無搵到屍體，出唔到死亡證，根本無辦法同Youtube證明任何嘢，我只能眼白白睇住個頻道被禁。本來隔咗差唔多一年，我都開始接受細佬已經走咗嘅事實，但竟然被我喺Youtube發現咗頭先條片！」
坤達說到這邊，眼裡透出的怒火，仿佛要把人整個吞掉似的。
「我一睇到條片就認得係我細佬同佢啲朋友，如果佢哋仍然在生嘅話，無理由唔同自己嘅屋企人聯絡，於是我問晒佢哋啲屋企人，但都無任何消息。嗰一刻，我知道呢條片，肯定係兇手放上去嘅！一定有人殺咗佢哋，拎走晒佢哋啲嘢之後，再放條片上去，目的就係要嘲笑我哋咩都做唔到！」
小雅抓住坤達的雙手，明顯感受到坤達身體在顫抖着，那大概是憤怒的表現吧。
「既然你發現咗條片，點解你唔報警？」
「報警？你以為我無咩？雖然班差佬一直都搵唔返我細佬，但既然有新線索，我就抱住一絲希望，希望今次佢哋能夠幫我搵返我細佬。去到差館嘅我，將發現條片同當值警員講咗之後，佢只係簡單記錄低之後就叫我走，我之後每日都去差館問情況，佢哋只係不斷敷衍話會再跟會再跟，但佢哋根本無放喺心度，佢哋係要做嘢嘅，肯定可以好快追蹤到條片係喺邊度上載，甚至上載嗰個係咩人。但無，乜都無，佢哋根本就懶得理呢件事！我同細佬朋友嘅家人一齊嚟追，結果都係一樣，乜都無！我哋稍為激動啲，佢哋就話我哋搞事！無辦法之下，我只可以自己嚟調查！」
聽到這邊，大概明白到坤達為何如此執着於牛屎湖村了，只是，阿棠很想知道一件事。
「咁點解要我哋一齊嚟？」
阿棠提問後，坤達臉上充滿了歉意。
「呢個，係我對你哋唔住。其實頭先條片，佢簡介度有寫，牛屎湖村神秘事件，只會在四人一組的情況下才會出現。我唔肯定係咪真，亦都唔肯定係咪隨便寫，但如果係真嘅話，我只可以湊夠四個人先嚟。原本我諗住同細佬朋友嘅屋企人一齊嚟，但佢哋唔係年紀比較大，就係已經唔喺香港，咁啱我哋幾個又一齊讀中華文化，因利成便，所以就用今次機會去帶你哋過嚟。」
小雅和子晴聽罷，臉上露出了複雜的表情，而阿棠則是青筋暴現，明顯為坤達所說的話感到氣憤。
「你係咪痴線㗎！你要搵你細佬又好，幫佢報仇又好，你想點咪點囉，但關我哋鬼事咩？上傳條片嘅就算唔係你係其他人，都肯定係不懷好意啦，你有無自私啲呀！我都有屋企人㗎！」
「我......我駁唔到，你可以打我可以鬧我，因為我的確係呃咗你哋嚟。我知道可能有危險，接落嚟我自己一個入去啦，你哋返去先，我有咩事嘅話，幫我報警同通知我屋企人，呢個係我最後嘅請求。」
「你放心，我實走，我唔想死住。你放心，你真係有事我點都會報警，我無你咁自私。小雅，子晴，我哋走啦，由得佢自己一個入去啦。」
阿棠看着小雅和子晴，等待着兩人的決定。