佛誕怪奇短篇 - 廢棄村落之浴「罰」節: （十四）再訪牛屎湖村（四）
「做咩呀？你兩個做咩唔出聲呀？唔係到依家你哋仲要跟住坤達呀？」
「阿棠講得啱，你哋無必要陪我，成件事都同你哋無關，等我去就可以啦。」
坤達邊說邊打算掙脫小雅雙手，可是小雅卻比之前抓得更緊。
「有，有關，點會無關。我哋唔單只係組員，更加係朋友，係.....總之我唔會掉低你自己一個。」
阿棠瞪眼看着小雅，沒有想到他會做到這個地步，為了這個男的竟甘願涉險到這個地步，而坤達似乎也沒有預料到小雅會有這樣的反應，一時不知道怎麼回應。
「有個人陪你，點都好過你自己一個人啦，唔好以為我係女仔就睇小我，我運動神經好好㗎。阿棠你陪子晴返去先啦。」
阿棠眼見小雅心意已決，輕嘆了一聲後，便轉為看着子晴。
「嗯，我諗，我都係同你哋一齊入去啦。」
「子晴，點解？唔通你都好似小雅咁......」
阿棠以為子晴跟小雅一樣，都是被愛蒙蔽了雙眼，但子晴的說話卻十分合理，合理到令人懷疑除了和坤達一起行動外，便沒有其他選擇。
「另外阿棠，我覺你都係同我哋一齊入去好啲。」
「吓？」
「你諗下，先唔理件事有無馮伯講到咁古怪，依家好明顯係有人係叢林入面，如果佢哋係監視住我哋，佢哋最希望見到嘅，就係我哋幾個鬧翻之後各自為政，到時無論要對我哋做啲咩，都會易好多，所以我哋四個一齊行動其實先係最安全。而且，你望下個天。」
子晴指了指天空，原來在他們說話期間，黑雲已幾乎把天空覆蓋，只餘下微弱的太陽光穿過厚重的黑雲，看樣子隨時會下起暴雨。
「我哋行過嚟都用咗差唔多成個鐘，依家翻轉頭應該都要差唔多時間，途中如果有暴雨，我哋就算無被人襲擊，喺暴雨之中行走都會好危險。叢林嘅話，我哋至少可以有啲樹擋下雨，好彩搵到牛屎湖村，可能會有殘餘落嚟嘅屋仔可以避雨，衡量起嚟，一齊走點都安全啲。」
聽到子晴的說話後，阿棠像洩了氣的氣球一樣，似乎沒有考慮到這麼多。
而下一秒，他們再也不用爭論到底是去是留，老天爺幫他們做了決定，幾聲雷晌過後，天空便淅瀝嘩啦的下起雨來。
「阿棠，行啦，再企喺度被雨淋濕，就算唔死都會大病一場。」
「小雅講得啱，行啦阿棠。」
子晴走近阿棠，輕輕拉了拉阿棠的衣角，示意他動起來。
「好啦好啦，依家都唔到我揀，我哋入去啦，但我只係去搵地方避雨咋，等雨停咗我就即刻走。」
在阿棠下定決心後，四人便往叢林方向走去。
坤達走在最前方，帶領着其餘三人筆直地向前走着，但走了不到五分鐘，雨便愈下愈大，雖然茂密的叢林已經為他們擋了不少雨水，但落下來的雨水仍然嚴重阻礙他們前進。無計可施下，他們找到一棵大樹並躲在下方，至少不用被落下來的雨水淋濕身體。
「明明嚟之前睇過晒天氣預告，都無講過會落雨，有無咁黑仔呀！」
阿棠從背包中拿出了毛巾，其他人也各自拿出自己的毛巾，把身上的水給擦掉。
「唔好講啦阿棠，我睇啲雨應該好快停嘅啫。」
「咦？」
坤達突然發出疑問的聲音，眼睛朝着叢林深處看過去。
「你哋聽唔聽到？」
「咩，咩呀？又有人唱歌呀？」
阿棠豎起耳朵，但沒有聽到雨聲外的聲音。
「唔係，唔係歌聲。有一把好低沉嘅聲音，感覺好似野獸嘅咆哮聲。」
坤達邊說邊用手電筒往叢林深處照射，但天氣實在太惡劣，手電筒的光線不夠強力，完全沒有起到任何作用。
然後除坤達以外的三人，都將身體彼此靠得更近，這樣才能比較安心一點。
「但我真係咩都聽唔到，小雅小晴，你哋聽唔聽到有咩奇怪嘅聲？」
兩人也搖了搖頭，似乎只有坤達聽到怪聲。
「會唔會係你聽錯咋？始終依家咁大雨，同埋香港依家應該無晒啲猛獸，最多咪野豬或者豹貓呢啲。」
「我都希望係聽錯，不過你都講得啱，香港應該唔會有咩猛獸，老虎都絕跡咗好多年，我哋都係擔心下有無人嚟襲擊我哋好啲。你哋趁依家休息下先，我會負責監視住周圍情況。」
坤達大概是對三人感到抱歉，便提議由自己負責監視四周的情況，只是在這大樹底下，能勉強擋住大雨而已，根本無法好好坐下來休息。
「仲休乜鬼息，啲雨大到咁，依家坐又無得坐，行又行唔到，你話點算好啦。」
「阿棠你咪嘈啦，我同子晴都未出聲，仲有唔入都入咗嚟，幫手睇下有無好啲嘅地方避雨啦，如果唔係都唔知落幾耐。」
子晴聽到小雅的說話後，好像想起了甚麼。
「欵，你哋記唔記得馮伯講嘅嘢。如果佢講嘅嘢係真嘅，呢度應該離牛屎湖村唔係好遠，與其喺度等唔知要落幾耐嘅雨，不如試下喺附近搵下條村，如果搵到，起碼我哋都叫有瓦遮頭。」
「但馮伯話佢哋嗰陣將條村燒咗喎。」
阿棠搖了搖頭，似乎對尋找村子不抱希望。
「就算搵唔到條村，起碼搵下有無啲屋仔之類可以避下雨，我哋匿喺度頂唔到幾耐。」
小雅邊說邊準備行動，而阿棠想了一下後，也點頭附和。
「我哋唔好走散，揀定一個方向行。頭先我聽到嘅怪聲喺右手邊傳嚟，我哋朝住怪聲嘅反方向行啦。」
坤達向他們說明後，三人並無異議，於是決定冒雨前行。