佛誕怪奇短篇 - 廢棄村落之浴「罰」節: （十二）再訪牛屎湖村（三）
「走啦，唔好留喺度啦，坤達你都係，一齊走啦。就算嗰邊唔係啲咩牛鬼蛇神，呢啲荒山野嶺，如果遇到啲偷渡客都麻煩啦。」
阿棠聽到後，第一個提出反對。
「我明白你講咩，但牛屎湖村咁神秘，而且搵到嘅資料都係話佛誕呢日會有特別嘅事發生，如果今次唔去，就要再等一年。你放心，如果真係有危險，我都會逃走嘅，就算有偷渡客，我諗都唔會好大問題。況且，如果頭先啲紅光，係仍然生存嘅牛屎湖村村民，咁我就可以親口問返佢哋條村發生咩事。」
「痴線咩，依家好明顯有唔妥，小雅子晴你哋勸下坤達啦。」
子晴還在思考之際，小雅卻已先行回話。
「我，我決定同坤達一齊去。」
子晴和阿棠聽到後，驚訝地看着小雅，反倒是坤達，臉上沒有太大的表情變化，他是早料到小雅會答應嗎。
「子雅你冷靜啲啦，你唔好因為坤達話去你又去先得㗎。」
「吓，唔，唔係咁。我認真諗過先咁講㗎，你諗下，依家有兩種可能性，一種係對方發現咗我哋，一種係對方未發現我哋。假如無人發現我哋嘅，就變咗佢哋在明，我哋在暗，咁嘅話過去叢林嘅危險度就會減少。如果對方已經發現我哋，我哋仲分散兩邊，咁對方就會更容易對付我哋。邊種情況都好，我認為四個人一齊行動點都會好啲。」
子晴聽罷，側頭想了一會，也點頭表示認同。
「其實小雅講得無錯，無論有咩事都好，四個人一齊點都會無咁危險。而且，可能對方根本無惡意，只係我哋自己諗得太多。而且，如果坤達一定要去嘅話，我哋其實都應該一齊去，始終人愈多先愈容易互相照應。阿棠，我哋一齊去啦。」
阿棠到子晴的請求，雖然內心仍然不安，但他也不希望拋下子晴，而且比起一個人先行離開，跟大伙一起行動的確更為安全。
「你哋都決定好囉，我仲邊有得揀啫，死就死啦。」
「多謝你哋，咁我哋行啦。我帶頭，如果有啲咩事，我會頂住，你哋就乘機逃走。」
「啋啋啋，唔好講呢啲嘢啦，好似子晴咁講，話唔定對方根本無惡意呢，阿棠啊。」
阿棠意識到小雅希望緩和氣氛，便隨口附和着。
四人決定後，便繼續前行，然而叢林位置比眾人想像更遠，走着走着，十分鐘又過去了，這才終於到達。
走到近處後，眾人才發現叢林的樹林十分茂密，能穿透樹林的陽光十分稀少，導致裡邊看起來昏昏暗暗的，而且大概是因為樹林遮蔽了陽光，炎熱的夏日，竟然在叢林入口處感受到一陣涼意。
「你哋過嚟睇下。」
還沒有踏進叢林之中，坤達便被入口處的某樣東西吸引住目光。
「佛，佛像......」
三人看到坤達發現的，竟然是馮伯口中，刻有佛像的樹木。
「無理由，如果馮伯講嘅嘢係真，佢哋應該已經燒晒啲樹先啱。」
「會唔會，呢啲佛像係新畫上去嘅？」
子晴用問題回應阿棠的疑惑，但如果認同了子晴的假設，即是說牛屎湖村的村民，至今仍然生活在這片叢林之中。阿棠聽罷，實在不想承認這種可能性。
「唔係啩，邊個會特登走嚟呢度刻啲咁嘅嘢喺樹上面？」
「仲駛問，肯定係牛屎湖村嘅人啦！」
「吓，條村都被馮伯上一代啲人燒晒，仲返嚟為乜？」
「我點知呀，總之呢單嘢愈諗愈唔對路，趁依家未入黑，我哋都係走啦。」
就在阿棠和小雅說話期間，他們突然聽到叢林內傳來像是唱歌的聲音，四人馬上變得警戒起來。
「停咗，你哋係咪都聽到？」
坤達為了確認不是只有他聽到，他轉頭看着三人，阿棠和小雅馬上點頭示意，子晴雖然慢了一拍，但也點頭表示有聽到。
「如無意外，啲聲係入面傳嚟嘅，我哋入去啦。」
「吓？話唔定頭先啲歌聲就係用嚟引我哋入去，而且叢林同出面啲草堆唔同，入面肯定好容易蕩失路。」
「係囉，坤達，阿棠講得唔係無道理，叢林入面可能好危險，而且你睇下個天突然間黑咗好多，好似準備落雨，如果入到去突然間落雨，我哋可能會好危險。」
「嗱，唔係淨係我咁諗㗎，小雅都認同，子晴你出句聲，幫手勸下坤達啦。」
子晴還沒來得及說話，坤達便已經搖了搖頭。
「對唔住大家，我好多謝你哋陪我嚟到呢度，不過我係唔會走嘅。但我明白你哋擔心啲咩，趁仲未落出雨，你哋返出去先啦，或者去三椏村度避一避，我無事嘅話會出返去搵你哋。如果有咩事，就麻煩你幫我報警同通知我屋企人。」
坤達下定了決心，把早已準備好的筆記簿交給小雅，但小雅理所當然地不會讓坤達這樣離去。
「你講咩呀？咩報警咩通知屋企人，同埋你幾時準備好呢本嘢㗎？你唔講清楚我唔會畀你入去㗎。」
「小雅，大家，對唔住，我唔係唔想講，但其實連我自己都唔肯定發生咩事，你哋由我啦。」
坤達執意想離去，但小雅卻拼命地拉着坤達不讓他離開。
就在兩人爭吵期間，阿棠無意間看到坤達筆記簿內的一張照片，那是一個年青男性，感覺跟他們年紀差不了多少。
然後阿棠努力回想，終於知道了這男人是誰。
「我醒起啦，坤達，呢個係你細佬！」
因為阿棠突然大喊，三人都把視線放到他的身上。
「佢除咗係你細佬，佢仲係啱啱條短片，負責拍攝嗰個人！坤達，到底發生咗咩事？你係特登用做project嘅名義引我哋嚟呢度？」