佛誕怪奇短篇 - 廢棄村落之浴「罰」節: （九）決定
坤達一行人，在馮伯那邊補給了一些物品及作出道謝後，便準備離開三椏村。
「年輕人，記住唔好去牛屎湖嗰邊呀，就算要去，都唔好今日去呀。」
馮伯對坤達一行人作最後的囑咐。
四人離開茶室後，便走到不遠處的碼頭，稍為拍照和做一些筆記，畢竟他們主要目的，仍是來到考察的。
「呢邊睇嚟都無乜特別，唔見有啲咩宗教嘅嘢，同埋可能始終附近有人住，唔係好感覺到歷史嘅痕跡。」
子晴撐着傘子，避免被烈日曬傷的同時，仍然盡好考察的本份，仔細觀察四周，但經過一輪觀察，得出了沒有甚麼看頭的結論。
「唉，唔通今次又係得個吉？上次鎖羅盤村已經無乜發現，今次直頭可以話係零。早知我帶件泳衣嚟淤水算。」
「既然呢度乜都無，不如走啦。我哋等到冬天再嚟考察啦好無？」
小雅脫掉鞋子，光着雙腳浸水解暑，而在旁邊的阿棠，亦把褲腳摺疊起來，直接把雙腿放到水中。
「你個肥仔咪亂噏啦，等到冬天嘅話我哋全部人肥佬都似，我唔想retake呀！」
小雅怒瞪着阿棠。
「但阿棠講得啱，呢度既然乜都無，我哋不如早啲走，返去再做下Research。香港咁多廢棄村落，應該總有啲地方有我哋想要嘅嘢。」
子晴附和阿棠。
就在三人討論着是否離開之際，坤達則獨自一人在翻查着資料。
「大家，過嚟睇下。」
坤達整理好手上的資料，做好確認後向三人喊話。
三人靠近坤達，看到一大疊資料上圈着一個又一個的紅圈，而其中一個紅圈，是一尊佛像，但佛像上面，卻沾滿了不知名的液體，由於是黑白印刷的關係，無法判斷那到底是甚麼東西。
「呢個係咩嚟？」
阿棠看到後，不禁聯想到馮伯的說話。
「呢個部份嘅資料，係我之前網上資料搜集嘅時候搵到。當時我都無乜為意，但聽到馮伯講嘅嘢就諗返起，喺東南亞好多信奉佛教嘅地方，都會有呢類嘅異教徒，認為要用人嘅血液去喚醒神佛，去保佑佢哋，甚至實現某啲嘅願望。而佛誕當日，佢哋會唔只會用人血，而係將活生生嘅人去做獻祭。照道理呢啲異教徒嘅事件，應該會留低好多資料先啱，只係，除咗啲零零碎碎嘅資料之外，就咩都搵唔到，當初我都覺得呢啲應該係假資料，但估唔到會喺呢度聽到一個咁類似嘅情況。」
坤達指着零星的資料，語氣變得有點興奮起來。
「會唔會係馮伯聽過類似嘅故仔咋？」
小雅不以為然。
「照計應該唔會，如果呢個故仔出名啲都仲有機會，但連坤達特做資料搜集，都係無意中搵到呢度咁少嘅資料，一般人應該唔會聽過。再加上三椏村雖然唔算與世隔絕，但都絕對唔係一個通訊方便嘅地方，可以判斷馮伯講嘅嘢，至少對佢嚟講係真事嚟。」
子晴解答小雅的同時，坤達興奮地接着說。
「無錯，若果淨係得馮伯嘅說辭或者淨係得網上嘅資料，都可以當係假嘅，但依家好明顯唔係咁嘅情況。同埋，如果呢件事係真，我哋將會係確認異教徒真實存在嘅團隊！你哋諗下會係幾咁偉大嘅事！」
小雅和子晴也漸漸覺得是一件大事，但阿棠此時提出了另一個觀點。
「咪住，如果馮伯講嘅嘢係真，咁佢頭先話死咗幾個村民，同埋仲有恐怖，識郁嘅佛像，咪全部都係真嘅？咁我哋應該快啲走，唔好去先啱喎！」
三人似乎沒有想過這部份，興奮過後恢復了冷靜。
「但......馮伯講嘅嘢太過怪力亂神啦啩，咩識郁嘅佛像，好難相信呢部份係真，話唔定佢只係想嚇我哋。」
「小雅，話唔係咁講，我諗唔到點解馮伯要嚇我哋，至少可以認為，馮伯係真心相信牛屎湖村係好危險嘅。而且，即使撇除怪力亂神嘅部份，如果馮伯口中嘅異教徒仍然存在，我哋兩個女仔，再加上阿棠同坤達，都唔可能應付到呢班異教徒，到時我哋就會好危險。」
「算啦，我哋都係走啦。我咁肥，有咩危險到時肯定第一個出事。」
坤達聽罷，皺起了眉頭，顯然不太想就這樣離開。
「你哋講嘅嘢都有自己嘅道理，但我覺得唔可以就咁放過呢個機會。咁啦，如果你哋覺得危險嘅，你哋返去先，我自己過去得啦。」
三人聽到後，均不同意坤達的決定。
「你哋冷靜啲，呢個係我嘅決定嚟。而且，我認為馮伯口中嘅怪力亂神部份，好可能係以前班大人想嚇啲小朋友而作出嚟。異教徒方面，事隔咁多年，我認為佢哋就算曾經住喺度，都應該已經走晒。如果唔係，無理由咁多年都無人報導過關於牛屎湖村嘅事。反而如果錯過今次機會，被其他人先一步發現牛屎湖村以往呢啲異教徒嘅習俗，到時我肯定會好後悔。不過我明白你哋會擔心，所以你哋走先，我去考察完，影啲相就返嚟同你哋集合啦。」
坤達明確表達自己的意願後，便開始收拾好行裝，準備前往牛屎湖村。
「一係我哋聽日先再嚟啦。」
「阿棠，多謝你，但唔嚟都嚟咗，無謂再浪費多一日時間。而且，今日嚟同聽日嚟，都唔會好大分別。」
其實阿棠還是對馮伯說的故事感到恐懼，害怕萬一那些怪力亂神之說是真實存在，但坤達始乎不以為然。
「我，我陪你啦！唔好睇小我，我有學過柔道，有咩異教徒都唔成問題。」
「我都一齊去，我唔想自己一個行呢條山路出返去。」
小雅和子晴的說話令阿棠沒有退路，最後也只好答應一起前行。
「咁......咁我都一齊啦，如果真係有異教徒，多一個人點都多一分力，但我哋睇完如果無發現就即刻走啦，好嘛？」
「多謝你哋肯陪我，好啦，我哋快啲過去，入黑之前就走，咁得啦啩。」
坤達臉露笑容，三人也只能順着他意向牛屎湖村前進。