佛誕怪奇短篇 - 廢棄村落之浴「罰」節: （十）再訪牛屎湖村（一）

四人從三椏村碼頭離開，走了大約十分鐘後便停下了腳步。
 
「奇怪，前面無路嘅？」
 
小雅走在最前方，看了看四周後，卻找不到前進的道路。
 
「無理由㗎，馮伯明明話以前牛屎湖村有人住過，又有考察隊去過，點都應該有路先啱。」
 
子晴走到小雅身旁，同樣找不到可以走的道路。
 




「吁吁，吁吁，會唔會，自從上次考察隊之後，就無人去過牛屎湖。吁吁，話晒都已經成廿年，就算有路都應該生晒草，睇唔到好正常。」
 
阿棠上氣不接下氣地來到兩人身旁，認為原本通往牛屎湖村的路已被雜草佔據。
 
「咁依家點算？沿岸邊行？」
 
「唔可能，經岸邊行嘅路程可能相差成十倍有多，就算小雅你體力再好，都無可能一日來回到。」
 
「吁吁，吁吁，既然搵唔到路，我哋都係返去先啦。」
 




就在三人討論着時，坤達拿着地圖和較早前搜尋到的資料和四周進行對比。
 
「大家，過嚟望下。」
 
三人來到坤達身旁，小雅忍不住拿走坤達手上的照片。
 
「呢張相係幾時影？佢哋都係去緊牛屎湖村？」
 
「一年前，都係佛誕嘅時候影。至於佢哋係咪去緊牛屎湖村，我哋即管睇下。」
 




坤達邊說邊拿出手機，然後根據照片下的網址，搜尋到有關影片。
 
影片開始後，能看到藏鏡人拍着另外三人。
 
『好，咳咳，大家好，我哋今日終於嚟到呢個傳說中，有一班怪人，用奇怪嘅形式去進行祭拜，Shit......』
 
『未到呀，我哋未到呀！仲有，我哋個自介呢？去咗邊呀？再嚟過啦，唔好再NG呀，返去有排剪片呀。』
 
『好，ok，大家好，我哋係阿偉，嘉欣，Gigi，仲有我哋嘅Cam man，Andy。靈異探險隊今日帶大家嚟到呢度，準備去尋找傳說中嘅牛屎湖村。』
 
『阿偉，牛屎湖村有咩咁特別呀？』
 
『嘉欣，我聽講呢度呀，以前有班怪人，會喺佛誕期間，用向嚟淋嗰啲佛像。』
 
『用血嚟淋啲佛像咁嘔心？』




 
『係呀，聽講仲係用人血嚟淋！』
 
『咁恐怖，咁事不宜遲，我哋即刻帶觀眾去牛屎湖村啦！』
 
『好，阿偉，嘉欣，Good take。Andy，繼續錄就可以，我返去會做返Editing。』
 
『我哋行啦，雖然好多雜草，但仲睇到條路，遲一兩年應該連路都見唔到。』
 
然後片段一直顯示他們前進，片段時間大約有一個多小時，大概是有甚麼原因，導致片段未有剪輯便放到網絡上，坤達將時間快轉了差不多一小時後，總算有所發現。
 
『大家，我見到有啲嘢，係......人？唔係，走，走呀，大家快啲掉頭走。嘉欣，Gigi，走呀！』
 
片段裡的阿偉，突然回頭驚恐地大叫，但下一秒已經看到阿偉發出慘叫聲，但鏡頭早已因為嘉欣和Gigi碰撞到Andy的關係掉在地上，未有拍到關鍵的一幕。
 




然後鏡頭一直拍着地面，過了一段長時間，不知道是記憶體滿了還是沒有電源，片段到此為止。
 
「真係唔係講笑，我哋不如走啦。」
 
阿棠看完短片後，更加強了他想要離開的想法，而本身沒有離開想法的小雅和子晴，這次也沉默不語，他們也擔心再去牛屎湖村可能會有危險。
 
「阿棠、小雅、子晴，我知你哋可能睇完會有啲不安，但呢條片好大機會只係偽紀錄片嚟，目的就係為咗嚇人，你諗下如果真係發生咗意外，又係邊個上傳呢條片？」
 
坤達的說話令小雅和子晴頓時感到釋懷。
 
「係囉，我都覺得怪㗎啦，聽你講完就更加覺得係怪嘅。」
 
「嗯，我同意小雅，應該係做假嘅。」
 
「但，如果係做假，佢哋可能無搵到牛屎湖村。」




 
坤達聽到後，瞄了阿棠一下，然後再解釋。
 
「應該唔會，佢哋有提到見到有路，呢啲荒山野嶺行出嚟嘅路應該唔會好多，所以好大機會真係通往牛屎湖村。」
 
「就算係咁，一段做假嘅片會拍咁長咩？」
 
聽到阿棠再次反駁，坤達眼裡閃過一絲怒火，但轉眼又恢復了正常，用雙手搭着阿棠的肩膀。
 
「阿棠，我知你好驚，如果你唔想去嘅，我會尊重你，但好似我之前咁講，今次係一個好機會，我一定會去搵牛屎湖村，同埋依家連方向都知道，我更加無理由唔去。」
 
聽到這邊後，小雅和子晴已經決定繼續前進，而受不了現場氣氛的阿棠，亦只好無奈答應同行。
 
雖然阿棠決定跟隨他們繼續尋找牛屎湖村，但他對剛剛的影片有另一個疑問。
 




他發現鏡頭掉到地上的瞬間，鏡頭有一閃即逝的拍到藏鏡人Andy的模樣，雖然畫面不是很清楚，但他感覺這個人十分眼熟，應該是他認識的人，只是想不起來。
 
「算了，邊走邊想吧。」
 
抱持着疑問的想法，阿棠跟隨着眾人，往尋找牛屎湖村的方向前進。