佛誕怪奇短篇 - 廢棄村落之浴「罰」節: （八）馮伯的女兒

「吓？咁就完咗啦？之後呢？」
 
小雅聽到這邊，本來期待故事的後續，但想不到馮伯就這樣停了下來。
 
「無啦，完晒啦。」
 
「吓？消失嘅村長呢？剩低嘅村民之後嘅生活呢？有無再去調查牛屎湖村？牛屎湖村點解會做啲咁詭異嘅嘢呢？」
 
小雅十分不滿。
 




「仲邊有咁多呀，嗰陣班大人執返條命都算係咁，返到嚟之後我哋去其他村到請咗個人返嚟做場法事，之後就無啦。之後我哋就無人敢再去牛屎湖村。」
 
「村長消失咗啫，但有兩個村民死咗喺牛屎湖村，你哋無再派人去搵返條屍咩？」
 
阿棠想了一想，還是覺得不合理，畢竟本來三椏村的人，就是為了救人才再次去牛屎湖村，證明他們都是有情有義的人。但在解決事件後，反而沒有再到牛屎湖村去把死去的村民帶回去安葬，怎想也不太符合他們的性格。
 
「你既然問到，我都唔怕講。事發之後我哋全村人，包括當時仲好細個嘅我都有去，但，唔好話屍體，我哋連條村嘅痕跡都搵唔到，成件事就好似無發生過咁。」
 
馮伯在說話的同時，身體不期然在顫抖着，是想到當年的畫面在害怕嗎？
 




「既然成件事完咗，點解你哋每年呢個時間都要離開呢條村？」
 
坤達把剛才的資料整理好後，提出了眾人心中的疑問，而馮伯則眉頭緊皺，一副不願回想的模樣。
 
「唉，話唔講話唔講，我都講咗咁多，唔爭在啦。其實當年件事完咗之後，我哋用咗好耐時間先慢慢丟淡死咗幾個人嘅事實，好快咁樣一年過去，我同村入面其個朋友又去咗牛屎湖村嗰邊。」
 
「吓？又去？你哋唔驚嘅咩？」
 
小雅聽到這邊，忍不住打斷馮伯的說話。
 




「以前嘅日子，村入面嘅人嚟嚟去去，我哋已經好習慣突然人員嘅變動。而事實上當年我哋幾個細路，根本就唔知有人死，頭先講嗰啲咁恐怖嘅事，都係我大個咗，再聽返我老豆老母講先知。所以我哋一直以為只係丁爸一家人同其他村民離開咗，雖然大人一直有提我哋唔好去牛屎湖村，但細個嗰陣點會話咁聽話先得。」
 
小雅聽到馮伯的回應，和其他人一樣點了點頭，接受了馮伯的說明。
 
「雖然係咁，但其實我哋都好少去牛屎湖村嗰邊玩，始終被人發現咗又會被啲大人又打又鬧。當日會再去牛屎湖村，都唔知係巧合定有其他原因，總之我哋就諗住去嗰邊玩水，但去到附近嘅時候，我哋聽到一班人諗經嘅聲音。我哋諗住靠近嘅時候，死咗嘅小丁竟然出現喺我哋面前！」
 
馮伯緊張地揉着雙手，表情也變得緊張起來。
 
「當時嘅我哋咩都唔知，諗住同小丁打招呼之際，我哋群體入面最年長嘅人制止咗我哋，仲叫我哋快啲走。我仲記得，當時我最靠近小丁，仲未意識到有咩問題，小丁嘅樣突然間改變。流血、腐爛、白骨，依家回想返，就好似親眼睇住一個人由死去到腐爛見骨嘅過程。當時我嚇到唔識反應，淨係記得我被人拉住手咁逃走。返到村之後，村入面嘅人大概了解咗發生咩事之後，就決定全部人離開。」
 
「你哋無派人再去牛屎湖村咩？」小雅對村民毫無保留相信小朋友的說話提出疑問。
 
「無啦，基本上所有大人都無忘記過當日嘅事。我記得第一次離開咗三日之後先夠膽返村，之後慢慢就變成佛誕當日要離開三椏村，呢個傳統就一路延續到依家。」
 
其他人聽完馮伯的故事後，也沒有太大感覺，畢竟這種遠離市區的小村落，總是會流傳着不同的故事。




 
而當中，只有坤達在整理好資料後，露出了疑惑的神情。
 
「坤達，做咩皺晒眉咁？」
 
細心的子晴注意到坤達表情的變化，坤達想了想後，便向馮伯提出了心中的疑問。
 
「馮伯，我想問多句，你一開始明明話早二三十年過嚟嘅話，牛屎湖村可能仲有人。但，照你嘅講法，發生呢件恐怖事件嘅時候，你只係小朋友嚟，即係應該起碼都四五十年前嘅事。」
 
面對坤達的疑問，馮伯點了點頭。
 
「係六十年前嘅事，我仲有兩年七十歲啦。其實喺牛屎湖村事件之後，偶爾會有啲人適應唔到市區嘅生活，會想嚟啲僻靜嘅地方生活。牛屎湖嗰邊因為有淡水湖，而且四周圍比較平坦，所以都有唔少人會想定居喺嗰度，而牛屎湖村同我哋三椏村相隔十分之近，所以一定會有交流。基本上，每次嚟交流嘅人，過咗佛誕之後就唔會再見到，然後又會有新一批人過嚟。就係咁過咗幾次之後，我哋都心知不妙，懷疑嗰啲人都係因為喺佛誕嗰陣消失，所以每逢有人嚟我哋呢邊，我哋都會好心提醒佢哋，但其實呢啲嘢，無經歷過又點會信呢。」
 
坤達跟其他人都一樣點了點頭，的確，即使馮伯說到這邊，他們也沒有太大的實感。
 




「大概二三十年前，當時有兩公婆嚟我哋村買嘢，講下講下先知佢哋嚟呢度做啲咩生態考察，加埋佢哋啲助手都有五六個人，同我哋講話會喺附近停留一年左右，想我哋幫手分啲物資畀佢哋。對我哋嚟講問題唔係好大，但經過幾次交流之後，我哋都係唔忍心驚佢哋出事，就將牛屎湖村嘅事同佢哋講，只係佢哋又點會信。本來呢件事同以往一樣，過咗佛誕大概就唔會再同我哋扯上關係，但當時嚟考察嘅人入面，同我哋村嘅一個女仔發展成為情侶，後生一輩嘅無直接經歷過牛屎湖村事件，所以佢哋其實都當係普通嘅習俗，亦因為咁，嗰個女仔，就喺佛誕當日，偷偷去咗牛屎湖村去見佢男朋友。」
 
馮伯說到這邊，開始哽咽，並忍不住落下淚來。
 
所有人被馮伯嚇了一跳，子晴向馮伯遞上了面紙，馮伯默默地接過後把眼淚擦乾。
 
「嗰個女仔，其實就係我個女。當我發現佢唔見咗嗰陣，我即刻要求其他人一齊嚟搵佢，但可惜，老一輩嘅無人想涉險，我只能夠一個人再去牛屎湖村。但......當我去到嘅時候，牛屎湖村已經空無一人，無論係考察嘅儀器，電池，臨時搭建嘅住屋，乜都無晒......留低嘅，就只有我個女由細到大都戴住嘅玉佩。」
 
馮伯從口袋中拿出了一個玉佩，上面刻了一個「芬」字，大概就是他女兒的名字。
 
「所以之後，我每一年都會喺度留到最後一刻，希望提醒啲人唔好再去牛屎湖村。至少，唔好今日過去。」
 
本來還沒有實感的眾人，在馮伯牽扯到女兒的部份後，漸漸也變得相信起來。試想一下，又有誰會拿自己的親生女兒，去虛構一個如此詭異的故事。