每一次扑嘢，都係一場死亡挑戰: 57

我再次打開地圖，問身邊嘅Vincy：「飛越太空山定係灰熊山礦車，你諗住揀邊個？」

「Um…我仲未決定到…不如俾我再考慮下先？」對方有啲猶豫。

「太陽都差唔多落山啦喎，你唔係依家先嚟淆底下話？」

「咁人地未坐過，驚都好正常啫。」

「既然你揸唔定主意，咁我都係嚟幫你揀啦。」





我用點指兵兵嘅方法，喺兩者之中選擇，最後督中咗灰熊山極速礦車。

「好啦，我揀到啦，我地就搭呢個！」

「極速礦車？聽落好得人驚咁喎。」

「放心啦，有我陪你唔使驚！」我好似氹細路咁，半拉半扯帶Vincy去「灰熊山谷」。

俗語有話「人未到聲先到」，我地都未行到過去，離遠就不斷聽到尖叫驚呼聲。





Vincy齋聽到啲聲，就已經驚到想打退堂鼓：「Tony，我諗我都係未ready，一係我下次ready好先再嚟。」

「你六樓咁高跳落嚟都試過啦，區區過山車難你唔到嘅。」我拉住想逃走嘅Vincy，並帶佢去排隊。

「咁多人排隊，應該輪唔到我地架啦，不如都係走先。」Vincy繼續想搵藉口縮沙。

我趌高望一望前面條人龍：「都唔算好多人啫，應該唔使排好耐嘅。」

「但係架車飛嚟飛去，衝得咁快，我地會唔會一個唔小心飛咗出去架車外面架？」





「綁曬安全帶，無事嘅。」

「咁如果係成架車飛咗落街呢？」

我真係無佢咁好氣，見佢擔心埋啲無謂嘢，都唔知佢呢啲叫好笑定係可愛。

大約排咗半個鐘咗右，終於都輪到我地。

Vincy已經驚到講唔到嘢，淨係好緊張咁捉住我嘅手臂。

好彩我無扯旗，唔係嘅話可能我同Vincy就要喺過山車上面扑嘢。

而我其實之前嚟迪士尼，只係搭過一次飛越太空山，呢個灰熊礦車我係從來無坐過，望落好似都幾激，所以心入面都有啲淆淆地。

一坐上過山車，Vincy就已經瞇埋眼唔敢望。





架車向前一郁，佢就驚到嗌咗出嚟，兼且拖實我隻手，捉住我唔放。

隨即成架車突然加速，好似一支箭咁標出去。

「啊！！！」

除咗Vincy之外，車上部分乘客都大嗌出聲。

過山車高速入彎，繼而飛天遁地，上上落落，所產生嘅離心力令人心跳加速，十分興奮同刺激。

「啊！！！」

Vincy基本上全程都係瞇埋眼同大嗌，而且大大力咁捉住我隻手，用力程度係捏到我覺得痛。





我坐喺佢隔籬，可以話完全feel佢嗰種驚心動魄嘅心情。

經歷咗幾分鐘嘅大上大落，過山車最後返到起點，慢慢停低落嚟。

Vincy亦都終於敢擘大返對眼。

如果要比較嘅話，我覺得從醫院六樓跳落嚟嗰次更加刺激。