每一次扑嘢，都係一場死亡挑戰: 56

Vincy無啦啦摵起條筋話想去迪士尼坐過山車。

見佢琴日望住砌好嘅Lego過山車，望到入曬神，原來當時佢係諗緊呢樣嘢。

「但係我俾人通緝緊，去迪士尼呢啲咁多人嘅地方，好容易俾人認得出架喎。」我同Vincy講。

「唔使擔心，我有辦法。」

Vincy嘅辦法就係將我改頭換面。





佢搵啲藍色嘅顏料搽落我個身同塊面度，再喺我嘅下巴黐撇鬚，將我扮成《阿拉丁》入面嗰個神燈精靈。

「咁樣包保無人認得出你啦，我係咪好醒呢！哈哈！」

我對住塊鏡，望一望個look，莫講街外人，就連我都認唔出自己。

「咁你呢？你係咪諗住扮公主？」我問Vincy。

對方搖搖頭，跟住行入房換衫。





大約五分鐘之後，佢換完衫出嚟，原來佢唔係扮公主，而係反串扮成「阿拉丁」。

《阿拉丁》有分動畫版同真人版，Vincy扮嘅係真人版電影嗰一個造型。

佢著住白色間條恤衫，搭一件紅色馬甲，下身係一條麻質卡其色長褲。

除此之外，佢紮起頭髮，化埋個鬚根妝，搖身一變變成一個「男人」。

「點呀？我扮得似唔似？」





「都認真幾似，你平時有玩開cosplay？」

「呢套衫係前年參加Halloween party買嘅，嗰陣我叫我個ex扮精靈但佢唔肯，最後得我一個扮成阿拉丁出席。」

時間都差唔多九點半，打扮完一輪之後，我呢隻藍色燈神就同「阿拉丁」出發去迪士尼。

行出門口，咁啱撞到隔籬個師奶買完餸返嚟。

佢見到我油到成身藍色，嚇咗一跳：「嘩咩年代呀？仲扮藍精靈咁老土？」

佢呢句說話果然好符合佢嘅年紀，真係後生少少都隨時噏唔出呢個名。

扮成卡通人物行喺條街上面，的確好引人注目，但入到主題公園，就完美融入樂園嘅嘉年華氣氛，甚至有啲細路以為我地喺職員，主動搵我地影相。

「迪士尼好似有兩個定三個過山車，你想玩邊一個？定係想全部玩曬？」我打開地圖問Vincy。





「Er…難得一場嚟到，不如先周圍行下先。」Vincy搶走我手上嘅地圖，拉住我四周圍逛一逛。

我地到處影下相，玩下啲「輕ken」啲嘅遊樂設施，例如係咖啡杯、旋轉木馬之類。

肚餓嗰陣又搵地方坐下食下嘢，一路由日頭玩到下晝，差唔多所有地方都行過曬，唯獨係爭過山車未玩。