每一次扑嘢，都係一場死亡挑戰: 58

坐完之後，Vincy仍然心有餘悸，依然拖住我隻手唔放：「頂你！你又話從六樓跳落嚟得人驚過坐過山車，根本都唔係嘅！」

「唔係呀嘛，我覺得跳樓驚險好多喎。」

「但係跳樓跳落嚟，就算幾驚都好，都係驚嗰幾秒，但過山車就唔同，佢係折磨足你幾分鐘，全程大上大落，總之就嚇到我個心怦怦跳。」

「如果咁比較嘅，你都講得無錯嘅。」

我地邊行邊講，行下行下，我雙眼嘅目光不經意咁移向地上面嘅影子。





喺夕陽照耀下，我地兩個拖住手並肩而行嘅身影，映照喺地面上。

唔知點解，望住我同Vincy嘅影子，我突然間有一種幸福嘅感覺。

怦怦！

嗰種感覺好強烈，令人面紅且心跳加速。

怦怦！





個心卜卜跳，連隨「細佬」都有反應。

為免觸發靜止之力，我拿拿臨縮開自己隻手。

呢個時候，Vincy先發覺原來一直拖住我無放手：「Sorry，我頭先驚得滯，驚到唔記得鬆手。」

「…唔緊要…」

避免身體接觸，我稍稍行開少少。





本來手拖手連埋一齊嘅影子，一下變成咗兩個分開而行嘅身影。

喺我縮開咗隻手之後，雙方之間嘅氣氛突然間變得尷尬。

Vincy靜咗無出聲，我亦都無講嘢。

大家沉默咗幾秒，我想開口同對方解釋，其實我係驚唔小心發動能力，所以先會縮開隻手。

只不過未開到口，就俾對方搶先一步打破沉默：「係啦，我阿爸阿媽應該聽日返嚟，我諗你可能住埋今晚就要搬走。」

「呢樣我知，你放心喎，我唔會瀨死唔走嘅。」

「咁你之後有咩打算？」Vincy問我。

「一係自首一係走佬，除此之外，我諗我都無其他路可以揀架啦。」





「點都好啦，多謝你嗰日救咗我，同埋今日肯陪我嚟坐過山車。」

「做咩突然咁客氣，你肯收留我，應該係我多謝你先啱。」

講完呢句，我地望住大家笑咗一笑，跟住又靜咗無出聲。

離開迪士尼後，我地一路向住巴士站行去。

行到半路，突然間風雲色變。

晚霞映照嘅藍天，一下子變得暗黑陰沉。

晃眼之間，喺我地面前出現咗兩個人影。





兩個我熟悉嘅人影。

佢地身穿黑衫黑褲，雙手放喺後面，身上散發住強烈嘅殺氣。

我無眼花，呢兩個人就係Mandy同Emily。