補習社的女同事: 特殊關係

「我的兒子，這次竟然有三科不合格，以前成績都沒有這麼差，到底是甚麼回事？」呢位衣著看似斯文嘅家長操住帶點上海方言嘅普通話，對坐係reception 嘅Regina作出如此質問。

「葉太，我地都明白你擔心仔仔嘅成績。我地確實留意到佢中英文兩科嘅語法有點弱，而考試前我地都有針對性咁比各類型練習比佢……」Regina嘗試耐心解釋，不過呢位葉太接下來火氣變得更大。

「我跟你說普通話，你就不能跟我說普通話嗎？你中文不行所以說不了普通話，也就不能教好我的孩子，對嗎？」形勢越發嚴峻。

平時Regina聽到家長用普通話查詢，佢都係用廣東話回覆，對方聽得明亦都覺得冇問題。呢位家長想借題發揮，仲要誣捏Regina中文唔好，真係有d過份。

我好想幫佢，但亦都想睇下Regina應唔應付到，而且我仲睇緊嚟上功課班嘅學生，若非事態失控我都未敢貿然走到reception。



「不是這樣的，家長你先冷靜一點……」Regina嘗試用普通話應對佢。

「怎樣？我家小孩在你們這裡上課，都有大半年了，怎麼反而會退步？難道是他在上課時打瞌睡嗎？」

「不是，他，他就是在我們的課堂上經常玩耍，所以有不少時間都花在提升他的專注力。我們也想花更多時間教他文法之類的東西……」

「好了，我來問問我的孩子就好。偉文，你上課時有玩耍嗎？」

呢個時候，佢當然會擺出一副無辜嘅嘴臉，再講：「沒有呀，姐姐老師記錯了。」



事實上，佢經常係課堂上玩文具，撩其他同學傾計，仲會趁老師離開房間去印野嘅時候係功課塗鴉，再話係其他人畫嘅。

一直偏幫孩子嘅家長，即管睇下大個會變成點樣嘅人。

「就是了，他都不會說謊的，所以呀，你們就沒有優秀的老師了嗎？下個學期之前，我耍我得小孩拿到九十分以上，聽到了嗎？」淨係我地聽到有咩用，最緊要你個仔聽到，然後自己願意比心機讀書。

呢個時候，其他家長都陸續帶仔女嚟到補習社，睇到家長對Regina發動言論攻勢嘅場景。

「好的，我們當然會盡力幫偉文，給他更多練習，但希望他也能更專心聽老師講課……」



「所以終究你還是覺得我孩子專注力有問題呀？」

睇到呢度，我決定出去解圍。

「這位家長，我明白要照顧小孩不是一件容易的事，而擔心他的學業成績，人就容易變得緊張起來，這是正常的。不過，我們身為老師其實也不容易，盡心盡力地同時照顧幾十名小孩，每天都細心地安排不同課業讓他們跟上學校進度。希望家長能尊重老師，讓老師可以更專心致志地教導學生，教導你的孩子。」

「好……我當然會尊重老師，只……只是……大家都要找個和平的解決方案。」

「這樣吧，我們可以先在課堂上給予偉文更多鼓勵，讓他主動學習和回答問題，然後家長可以檢查他是否有完成補習社的作業，如果有不明白的地方可以發短訊給我們。我們要令他愛上課本，不會感到太大壓力，這才是重要的事。」

「聽起來還好，就這樣辦……下學期再繼續拜託你們，偉文，我走了，自己小心。」呢位家長都冇咩意思再嘈落去，都知我想比個落台階佢。

Regina稍為平復心情後繼續接待家長，似乎冇受太大影響。

只係佢故作堅強，唔想係其他人面前軟弱。



收工時份，佢再次番到reception坐低，諗番起大陸家長對佢發火嘅情景，眼角流出兩行淚水。

我安靜咁坐係佢旁邊，等佢喊左一陣，我都差唔多忍唔住喊果陣，我將tempo紙巾遞比佢，鼓起勇氣安慰佢：「做好能力範圍內嘅事，其他人之後聽唔聽，我地都管唔曬。辛苦你啦，Regina。」

佢再喊左一陣，然後吞吞吐吐咁講：「我……我覺得自己……自己仲有好多地方可以做得好d。難教嘅學生我遇過唔少。其實……比起擔心……比家長話，我更驚嘅係……係……係我教得未夠完美令……令小朋友明白唔到……學習……真正嘅……樂趣……」

呢種時候，比起一味講「加油呀」去安慰人，不如透過比實質性嘅建議，證明你有認真聆聽佢嘅心聲。「Regina，我知你好比心機教，而佢有過度活躍，特別難教都唔係第一日知。我覺得……不如比佢試下做『小老師』？即係教完佢一陣之後比佢表演下，試下佢扮老師去教番我地佢學左d咩，咁就滿足到佢經常想同人傾計同埋展示自己才能嘅表演慾。反正佢都坐唔定，就唔好用傳統嚴加管教嘅方式教佢啦，只會令佢對讀書更加反感。」

Regina稍為抹乾淚水，再同我講：「聽落都似唔錯……多謝你呀，Cyrus……仲有多謝你，今日幫我應付個家長。」

「你做得好好架，唔好輕易比其他人改變你嘅教育信念同理念，仲有，我唔介意你係我面前喊，因為人需要空間釋放平日工作積壓落嚟嘅情緒。」

「我會係你面前喊，係因為……因為你唔係我嘅『其他人』。我想……係你面前……放下故作堅強嘅一面。」



我輕輕拍佢嘅膊頭，而佢亦將個頭輕輕挨落我嘅左肩，再放鬆身體咁比我溫柔地攬住。

堅強，唔係只係講緊一味忍讓、一味忍耐，而係懂得係釋放情緒之後繼續堅持信念，堅持要行正確嘅路。

無論係工作上同Regina拍住上，定係生活上更加愛錫佢，我都要表現得，更加堅強。