補習社的女同事: 咖哩魚蛋

仲有一個星期就去迪士尼，點都要做資料搜集先可以有一個愉快難忘嘅旅程。

「睇下先，我地由將軍澳出發，要9點到迪士尼嘅話就要7點半開始……」我對住電腦螢幕諗緊時間表。

話說Duffy而家有位新朋友叫LinaBell，唔知Regina係咪都會鍾意呢隻粉色小狐狸呢？

一個人係房plan行程plan到夜深，唔覺意係書檯瞓著左。起身果時已經係十二點幾，我唯有早午餐都未食就趕番補習社。

「你做咩又跑番工呀？尋晚好夜瞓？」



「都幾啦。」我都唔記得左自己係幾點瞓。

「要keep到精神，唔好太夜瞓呀。」

每日番工，就算我點樣身水身汗咁趕番嚟，佢都會用關心嘅語氣同我打開話匣子，感覺真係好。

「係呢，Regina，你今日多野做嗎？」

「做咩呀？你好想幫我？」



「如果有工作我可以幫你一齊完成，咁就唔使係你生日前堆積未完成嘅工作，到時玩都玩得盡興d。」

「Ok啦，有d學校都已經考完試，唔算太多野做。你幫我對下excel表同支票啦。」

「好。」我專心工作，唔再刻意留意時間嘅流逝，

不過始終未食早餐，個肚都係好肚餓。

「Regina，我有d肚餓，不如我落去買d野食，順便買埋比你。」



「好呀，咁你陣間whatsapp比我睇下有咩野食。」

我轉個街口，去樓下有間成日有人龍嘅小食店。佢地d串燒同魚蛋都好香，應該幾好味。

「不如就食呢間？」我影埋相再whatsapp比Regina。

「好呀，咁啱我都想食呢間。」

「老闆，唔該我想要兩條雞肉串燒同埋一碗咖哩魚蛋！」

當Regina知道我買左咖哩魚蛋之後，佢好開心咁同我講：

「你又知道我想食佢地嘅咖哩魚蛋？」

「哦，因為我聽過你同趙sir傾計，你話你鍾意食辣，咁佢地嘅咖哩魚蛋都幾出名，所以我就買番嚟比你食啦。」



「多謝你！」話音剛落佢就忍唔住食左一粒魚蛋。

「唔駛客氣」我見到佢鍾意我買比佢嘅小食，仲開心過我自己食。

「咁Cyrus你食得辣嗎？」佢話口未完又食多粒魚蛋，睇嚟真係好肚餓。

「還好，平時食米線果d叫三小辣都接近上限啦。」

「你估下我食到咩辣？」

「都係……三小辣？」

「差唔多啦，我有時會挑戰中辣架……你都食到辣，咁得閒我就可以同你一齊食辣啦！」



估唔到咖哩魚蛋可以令我地了解到原來我地有食辣呢個共同愛好。

隨住學生考完試，學生們都陸續收到成績單。有人歡喜有人愁，開心嘅當然就會周圍同人share，而失落嘅就會愁眉苦臉，家長就會質疑小朋友有冇努力讀書，情緒激動嘅甚至會覺得老師未有盡本分教好佢嘅小朋友。

今日，有位家長知道佢個仔第一次考到三科唔合格，就想係補習社宣洩佢嘅怒氣，大發雷霆。

首當其衝嘅就係教佢英文科嘅Regina，今次，我可以幫到忙嗎？