補習社的女同事: 番工

「Hi，既然都知你住將軍澳啦，不如一齊番工。」
 
等左一陣，手機就彈嚟通知。
 
你有一則新的whatsapp訊息︰「補習社同事Regina︰好呀」
 
佢仲加左一個笑容可掬嘅表情符號，係佢第一次send emoji比我。
 
落到港鐵站，我見到佢嘅身影，好快就行左過去。
 


「早晨呀Regina，尋晚訓得好嗎？」
 
「好，好呀，做咩咁問我嘅？」佢半帶微笑咁問番我。
 
「冇呀，因為你話想我關心你多d呀嘛，咁我諗到咩就問你咩。」
 
「嗯……都好過講『今日天氣好好』呢類說話嘅。」
 
「我可以同你一齊番工，心情都好似好d。」
 


「估唔到，我地前兩日先第一次一齊放工，今日就一齊番工。」佢有d腼腆咁講，令我覺得佢有d可愛。
 
我靜默左一陣，同佢一齊握住扶手，然後同佢講︰「Regina，多謝你比機會我繼續認識你，同你……」
 
「傻啦，都話左比時間同機會你，就唔好再提起以前嘅事啦。」佢似乎都知道我想講咩，嬉皮笑臉地打斷我嘅說話。「你再成日講嘅話我就嬲番你架啦。」
 
係我眼中，佢講野嘅語調越嚟越似一位女朋友。
 
「好啦唔講啦，我知錯啦。」
 


正當我以為氣氛變得尷尬同死寂之時，佢對我講出左心底話。
 
「我想你，唔係因為憐憫我而用愛我嘅方式作出補償，而係真心愛我。」
 
我冇特別講d咩，伸出雙臂輕輕攬住佢，而佢亦都慢慢將個頭貼落我嘅心口。
 
係外人睇嚟，我地就彷彿係一對互相安慰嘅情侶。大概，我地同真實情侶嘅差別，只係在於，我地仲未正式向對方表白要成為彼此嘅另一半。
 
行到去太子站嘅時候，列車急停，好多未扶穩嘅乘客都撞到隔離嘅人或者扶手。自問反應敏捷嘅我早就做好準備，聽到剎車聲就稍為分開對腳企，然後將Regina攬得更實。
 
列車停定後，我俯視係我懷抱入面嘅佢︰「你冇事呀嘛？」
 
「冇事，唔該你。」
 
尋晚佢腳痛我就拖住佢，今日列車急停我就攬住佢，感覺我會發現到更多佢需要我而變得面紅嘅一面。