補習社的女同事: 日曆通知

「Hello Miss同阿sir，我今日學校派卷，我數學攞左八十八分，進步左好多呀！」
 
「咁就好啦。」
 
「係呢Miss，我媽咪話想我跟多d阿sir嘅堂，請問有咩時間可以揀呀？」
「等我睇睇先……可以揀星期……」
 
呢個時候，佢部電話ding一聲彈左通知出嚟，我見到來自日曆嘅提示寫住︰一星期後就是你的生日，當天如有任何行程可儲存在應用程式內
 
噢……有左呢個提示，我就可以計劃係當日幫佢慶祝，為佢安排驚喜。先前我只係準備過突襲佢嘅邪惡計劃，今次終於係第一次為佢準備正正經經嘅計劃。


 
平時得閒就睇開韓劇嘅我，對佢地戀愛劇嘅劇情最為清楚不過。男女主角之間會產生情愫，離唔開係重要日子打動同感動對方嘅套路。男主角通常會從女方嘅一舉一動留意到唔少細節，然後幫女主角諗好行程，再打電話約佢出街。如果有一日時間就可能會去主題樂園，或者去郊外野餐，食完晚飯再去散步談心，將戀愛氛圍推到高點之後就可以表明心意。
 
以我對Regina嘅觀察，佢都鍾意小飾物，而且係佢嘅袋仲有Duffy嘅吊飾，推測佢應該鍾意去迪士尼。約心儀女仔去主題樂園呢d方法的確唔係咩新鮮事，但「橋唔怕舊，最緊要受！」只要有機會令到佢係工作以外有更多快樂時刻，我都願意去嘗試，願意去創造。
 
「阿sir你今日著得好好睇呀！」頭先果位女學生嘅聲音將我拉回現實。佢叫做陳思婷，係我嘅得意門徒。
 
「係咩？我又唔介意你讚下我嘅。」
 
「啦嗱講明先呀阿sir，我唔係咩人都讚架。」


 
「好啦好啦，服左你，去上堂啦！」
 
「咁Cyrus你帶思婷上7樓上堂先啦。」

因為睇到日曆通知，我大半日都係諗緊到底應該點樣主動約佢去主題樂園。直接開口？Send whatsapp？有意無意之間暗示我都鍾意去迪士尼，引到佢自己都話想去？

算啦，專心教埋今日嘅學生再諗，咁樣可能仲好。

今日Regina遲過我番工，所以其實我係可以早過佢少少放工。不過無論我講唔講原因，佢都估到點解我想等埋佢一齊放工。



聽到我話我想同佢一齊放工，佢好似笑得甜滋滋咁。

可以一直令到呢位女孩重拾笑容，實在太好啦。

「今日都係搭地鐵啦？」

「係呀。」

行多一陣，Regina同我講：「我今日約左朋友食飯，同唔到你食啦。」

「哦……唔緊要啦。」原來Regina同我食完大快活後，的確想繼續同我食飯。可以同佢一齊搭程地鐵，我都覺得係種幸福。

我同佢握住扶手，閒話家常，把握機會開啟迪士尼嘅話題。



「Regina你放假嘅時候鍾意去邊度玩架？」

「無咩特別，有時去油尖旺行下，有時去書店扮下文青睇書，同埋都想去主題樂園……不過約朋友就未必就到時間，同埋唔係個個都鍾意，諗到得我自己一個就會打消去嘅念頭，你呢？」

「我放假嘅時候都鍾意去主題樂園玩架，因為我鍾意佢地精心設計嘅主題佈置。」

「係呀？你唔使因為想就我或者氹我開心專登講你鍾意去主題樂園喎」佢一路笑一路講。

呢個時候，我嘅一句，令Regina安靜咁望住我。

「唔係架，Regina。我想同你慶祝生日。我地，去迪士尼啦？」

呢一刻，空氣凝住了，就好似我地對望嘅眼神咁。沒有半點遲疑，沒有半點迷茫，我，將呢段直球式嘅告白講左出口。